لوک سبھا انتخاب کے دوران ہندوستان کے سرکاری ٹیلی ویژن نشریاتی ادارے پرسار بھارتی نے دوردرشن کے ہندی اور انگریزی دونوں چینلز کے لوگو اور حروف کے رنگ تبدیل کر کے زعفرانی کر دیا ہے۔ اس کے بعد سے ادارے پر چو طرفہ تنقید ہورہی ہے، خاص طور پر انتخابات سے قبل ایسا فیصلہ کرنے پر۔ چینل پر پہلے ہی بی جے پی کے تئیں نرم رویہ اختیار کرنے کا الزام ہے۔

ہندوستان کے سرکاری ٹیلی ویژن نشریاتی ادارے پرسار بھارتی نے دوردرشن کے ہندی اور انگریزی دونوں چینلز کے لوگو اور حرفی رنگوں کو زعفران میں تبدیل کر دیا ہے۔نیا لوگو منگل کی صبح ۱۲؍بجے سے باضابطہ طور پر نافذ کیا گیا ہے۔قبل ازیں لوگو پیلے اور نیلے رنگ کا ہوتا تھا۔ لوگو کے ساتھ چینل کی اسکریننگ کا رنگ بھی زعفرانی کیا گیا ہے۔
موجودہ تبدیلی پر دوردرشن نےبیان جاری کیا ہے جو ڈی ڈی نیوز کے سرکاری اکاؤنٹ پر پوسٹ کیا گیا ہے جس کا کیپشن ہے ’’ہماری اقدار وہی ہیں، اب ہم ایک نئے اوتار میں دستیاب ہیں۔ خبروں کے ایسے سفر کیلئے تیار ہو جائیں جس کا تجربہ آپ نے پہلے کبھی بھی نہیں کیا۔ نئی ڈی ڈی نیوز کا تجربہ کریں۔‘‘

DD News has changed its logo from red to saffron pic.twitter.com/5GhT28Vp5q

— TheHardCopy (@TheHardCopyCo) April 18, 2024

پوسٹ میں یہ بھی کہا گیا ہے کہ’’ اب دوردرشن درست اور دیانت دار خبریں لا رہا ہے۔‘‘ ڈی ڈی نیوز کے ڈائریکٹر جنرل نے پوسٹ میں دعویٰ کیا کہ وہ سچائی اور حوصلے کی صحافت ایک نئے انداز اور احساس کے ساتھ کر رہےہیں۔
لوگو اور متن کے رنگوں میں ردوبدل پر مختلف حلقوں کی جانب سے بڑے پیمانے پر تنقید کی گئی ہے۔ عین انتخابات کے وقت اپوزیشن نے اس عمل پر سوالیہ نشان عائد کیا ہے اور اسی کے ساتھ الزام بھی عائد کیا ہے کہ ’’دوردرشن کی خبروں کےکوریج اور پروگرامنگ میں حکمراں پارٹی کے تئیںنرم رویہ اختیار کیا جاتا ہے۔‘‘
واضح رہے کہ اس سے قبل، دوردرشن نریندر مودی اور مائیکروسافٹ کے بانی بل گیٹس کے انٹرویو کو نشر کرنے پر تنازعات میں گھرگیا تھا۔پرسار بھارتی کے خلاف احتجاج کرنے والوں کا دعویٰ تھا کہ یہ انتخابی ضابطہ اخلاق کی خلاف ورزی ہے جبکہ غیر سرکاری طور پر، الیکشن کمیشن نے بھی اشارہ دیا تھا کہ  پرسار بھارتی کو انٹرویو نشر کرنے کی اجازت نہیں تھی۔