بنگلورو میں ایک شخص کم قیمتوں پر ایکسپائر اور جعلی دوائیں اسپتالوں کو فروخت کر رہا تھا ۔ اس نے ۹۰ سے زائداسپتالوں کو کینسر جیسے امراض کی جعلی دوائیں فروخت کی ہیں ، فی الحال اسے گرفتار کر لیاگیا ہے ، مزید تفتیش جا ری ہے۔

۱۴؍ ستمبر کو بنگلورو میں کرپا ہیلتھ کیئرکے مالک ویریش کمار جین کو ایک ایسے مبینہ جعلی ادویات کے ریکیٹ میں ملوث ہونے کے الزام میں گرفتار کیا گیا، جس کے تحت ۹۰؍ سے زائد اسپتالوں اور کلینکس کو کینسر اور دیگر اہم مشتبہ جعلی دوائیں سپلائی کی جا رہی تھیں۔یہ پورا معاملہ اس وقت سامنے آیا جب حکام نے ۱۸؍ اگست کو بڈادی میں ایک ٹھکانے پر چھاپہ مار کر تقریباً ۴ء۹۱؍ کروڑ روپے مالیت کی مشتبہ جعلی ادویات کے ساتھ ساتھ جعلی لیبل، بِل اور دیگر آلات ضبط کئےتھے۔تحقیقات کاروں کا الزام ہے کہ کم قیمت یاایکسپائر ہو چکی ادویات کو دوبارہ پیک کر کے نامور فارماسیوٹیکل برانڈز کے لیبلز لگا کر فروخت کیا جا رہا تھا اور رپورٹس کے مطابق ان پر ۵۰؍ فیصد تک کی چھوٹ بھی دی جا رہی تھی۔تفتیش کے دوران میڈیکل ریپریزنٹیٹوز کے ساتھ مشتبہ تعلقات ہونے کا بھی انکشاف ہوا ہےجبکہ اس معاملے کا ایک اہم ملزم پرشانت فی الحال فرار ہے جس کی تلاش جاری ہے۔
دریں اثناء حکام ایک وسیع تر بین الریاستی نیٹ ورک کی جانچ کرتے ہوئے ادویات کے نمونوں اور سپلائی ریکارڈز کی پڑتال کر رہے ہیں۔ اس معاملے میں تفتیش کا سلسلہ جاری ہے اور انتظامیہ ان تمام اسپتالوں کی شناخت کرنے کی کوشش کر رہی ہے جہاں یہ مشتبہ جعلی دوائیں بھیجی گئی ہیں۔