الہ آباد ہائی کورٹ نے بدھ کو آیوش ملک کو رہا کرنے کا حکم دیا ہے، آیوش ملک کو اپنا مذہب تبدیل کرنے کے سلسلے میں غیر قانونی طور پر حراست میں رکھا گیا تھا ، تاہم عدالت نے پولیس کو بھی پھٹکار لگاتےہوئے کہا ہے آیوش نے اپنی مرضی سے اسلام قبول کیاہے یہ ان کی ذاتی آزادی ہےاس میں دخل اندازی کی کوئی گنجائش نہیں ہے۔

الہ آباد ہائی کورٹ نے ۳۱؍ سالہ آیوش ملک کی درخواست پر سماعت کرتے ہوئے شاملی پولیس کو ہدایت دی ہے کہ وہ ان کے معاملے میں کوئی مداخلت نہ کرے۔ یہ حکم عدالت میں آیوش ملک کے اس بیان کے بعد سامنے آیا ہے جس میں انہوں نے بتایا کہ انہوں نے اپنی آزادانہ مرضی سے اسلام قبول کیا ہے اور وہ اپنی بیوی چاندنی قریشی کے ساتھ رہنا چاہتے ہیں۔ واضح رہے کہ ایک مسلم خاتون سے شادی اور مذہب کی تبدیلی کے بعد آیوش ملک کو غیر قانونی طور پر حراست میں رکھنے کے الزامات کے تحت بدھ کے روز انہیں عدالت کے سامنے پیش کیا گیا۔ اس موقع پر ہائی کورٹ نے انتظامیہ کو ان کی حراست کے حالات پر سخت پھٹکار لگائی اور ہدایت دی کہ آیوش ملک کی ذاتی آزادی کا ہر قیمت پر تحفظ کیا جائے۔

Shamli, Uttar Pradesh

Ayush Malik is finally free from illegal custody.

The change in his appearance and visibly reduced weight speak volumes about what he says he went through during those difficult days. https://t.co/oRoIsWEA5r pic.twitter.com/jGRmHsnyrX

— Mr.Haque (@faizulhaque95) September 16, 2026

سماعت کے دوران آیوش ملک نے عدالت کو واضح طور پر بتایا کہ انہوں نے بغیر کسی دباؤ یا زبردستی کے اپنی مرضی سے اسلام قبول کیا ہے اور وہ چاندنی کے ساتھ ہی رہنا چاہتے ہیں۔ یہ معاملہ اس وقت عدالت پہنچا جب آیوش کے دوست سلطان نے ہائی کورٹ میں ہیبیس کارپس رِ ٹ کے تحت درخواست دائر کی۔ درخواست میں الزام لگایا گیا تھا کہ والد کی مرضی کے خلاف مذہب کی تبدیلی اور شادی کرنے پر، ریاستی حکام کی مبینہ مدد سے آیوش کو زبردستی ان کے والد کی تحویل میں رکھا گیا تھا۔ اس پر ۹؍ ستمبر کو جسٹس سندیپ جین نے اتر پردیش انتظامیہ اور آیوش کے والد دیوراج سنگھ ملک کو حکم دیا تھا کہ وہ ۱۶؍ ستمبر کو آیوش کو ہر حال میں عدالت کے سامنے پیش کریں۔بعد ازاں عدالت نے غیر قانونی حراست اور انتظامیہ کی شمولیت کے الزامات کو انتہائی سنگین نوعیت کا قرار دیا ۔

یہ بھی پڑھئے: مرشد آباد کے ۶۱؍ سالہ بزرگ کو گھر سے اٹھا کر بنگلہ دیش بھیج دیا گیا، اہل خانہ کا ڈھونڈنے کا مطالبہ

درخواست کے مطابق، آیوش ملک نے رضامندی سے اسلام قبول کر کے چاندنی سے شادی کی تھی، لیکن اس کے بعد ان کے والد نے ۶؍ جون ۲۰۲۶ء کو شاملی پولیس اسٹیشن میں چاندنی اور ان کے رشتہ داروں کے خلاف اتر پردیش کے غیر قانونی تبدیلیٔ مذہب قانون ۲۰۲۱ء اور بی این ایس کی مختلف دفعات کے تحت ایف آئی آر درج کروا دی۔ درخواست گزاروں نے اس ایف آئی آر کو جھوٹا، تعصب پر مبنی اور آیوش کی ذاتی آزادی کو چھیننے کی کوشش قرار دیا تھا۔
تاہم عدالت میں پیشی کے بعد جب آیوش نے اپنے فیصلے کی تصدیق کی، تو ہائی کورٹ نے پولیس کو ہدایت دی کہ وہ اس جوڑے کے فیصلے اور آیوش کی آزادی میں دخل اندازی نہ کرے۔ اس معاملے نے ایک بار پھر کسی بھی بالغ شخص کو اپنی مرضی سے مذہب اور شریکِ حیات کا انتخاب کرنے کے بنیادی حق سے متعلق بحث کو تازہ کر دیا ہے۔مزید برآں عدالت نے نوٹ کیا کہ ابتدائی شواہد سے ظاہر ہوتا ہے کہ آیوش نے اپنی مرضی سے مذہب تبدیل اور شادی کی تھی، حالانکہ عدالت نے واضح کیا کہ وہ الزامات پر فی الحال کوئی حتمی فیصلہ نہیں دے رہی ہے۔ ساتھ ہی اس معاملے پر الہ آباد ہائی کورٹ میں قانونی کارروائی جاری رہے گی۔