بلقیس بانو کیس کے تمام ۱۱؍مجرموں نے سپریم کورٹ کی طرف سے دی گئی مہلت کے مدنظر گجرات کے پنچ محل ضلع کی گودھرا جیل میں اتوار کی دیر رات خودسپردگی کردی۔

بلقیس بانو کیس کے تمام ۱۱؍مجرموں نے سپریم کورٹ کی طرف سے دی گئی مہلت کے مدنظر گجرات کے پنچ محل ضلع کی گودھرا جیل میں اتوار کی دیر رات خودسپردگی کردی۔ واضح رہے کہ ۱۱؍ میں سے ۱۰؍ مجرموں نے عدالت میں پٹیشن داخل کرکے خرابیٔ صحت، آپریشن، بیٹے کی شادی اور پکی ہوئی فصلوں کی کٹائی کا حوالہ دیتے ہوئے مطالبہ کیا تھا کہ انہیں خودسپردگی کے وقت میں راحت دی جائے اور ان کی تاریخوں میں توسیع کردی جائے۔ اس عرضی کو خارج کرتے ہوئے سپریم کورٹ کی جسٹس  بی وی ناگرتنا اور جسٹس اُجول بھوئیاں کی بنچ نے کہا کہ قصورواروں نے جو وجوہات بتائی ہیں، ان میں کوئی دَم نہیں ہے اور نہ کوئی میرٹ ہے۔ اس فیصلے کے بعد سبھی رِہا  کئےگئے قصورواروں کو ۲۱؍ جنوری تک خودسپردگی کرنی ہوگی۔ ان درخواستوں میں بیان کی گئی وجوہات پر جسٹس ناگرتنا خاصی برہم بھی ہوئیں اور کہا کہ یہ ایسی وجوہات ہیں جو ناقابل قبول ہیں اور ان میں سماعت کیلئے کوئی میرٹ نہیں ہے۔