راجستھان میں بی جے پی کے صدر سی پی جوشی نے امید ظاہر کی کہ بی جے پی راجستھان میں مکمل اکثریت کے ساتھ حکومت قائم کرے گی اورکہا کہ وہ وزیر اعلیٰ بننے کی دوڑ میں نہیں ہیں لیکن اس عہدے پر فائز ہونے والے کو ہار پہنانے والے وہ پہلے شخص ہوں گے۔

راجستھان میں بی جے پی صدر سی پی جوشی نے کہا کہ وہ وزیر اعلیٰ بننے کی دوڑ میں نہیں ہیں لیکن اگر ان کی پارٹی حکومت بناتی ہے تو وہ اس عہدے پرفائز ہونےوالے کو ہار پہنانے والے پہلے شخص ہوں گے۔ انہوں نے رپوٹرس سے خطاب کرتے ہوئے خود اعتمادی ظاہر کی کہ ان کی پارٹی راجستھان میں اسمبلی انتخابات جیت جائے گی۔ جوشی نے اس حوالے سے کہا کہ ۳؍ دسمبرکو راجستھان میں بی جے پی مکمل اکثریت کے ساتھ الیکشن جیتے گی۔ مجھے امید ہے کہ بی جے پی ۱۳۵؍ سے زائد سیٹیں جیتے گی جبکہ کانگریس ۵۰؍ سیٹوں سے بھی پیچھے رہے گی۔ خیال رہے کہ پانچ ریاستوں میں اسمبلی انتخابات ختم ہونے کے بعد تین اگزٹ پول ظاہر کرتے ہیں کہ بی جے پی کی جیت واضح ہے جبکہ ۲؍ اگزٹ پول راجستھان میں کانگریس کی حکومت بننے کے امکانات ظاہر کرتے ہیں۔
یاد رہے کہ راجستھان میں ۲۵؍ نومبر کو اسمبلی انتخابات ہوئے تھے جبکہ ووٹوں کی گنتی ۳؍ دسمبر کو کی جائے گی۔ تاہم ، کانگریس کے اقتدار والی راجستھان حکومت نے بی جے پی سے یہ چیلنج جیتنے کیلئے اسمبلی انتخابات سے قبل مشہور اسکیموں کا سلسلہ شروع کیا تھا۔ راجستھان کے علاوہ ملک کی دیگر ۴؍ریاستوں میں بھی اسی دوران الیکشن ہوئے تھے اور وہاں بھی ووٹوں کی گنتی ۳؍ دسمبر کو ہی کی جائے گی۔