میونسپل افسران نے ۳؍ ہزار ۲۶۹؍ دکانوں کی جانچ کی جس کے دوران اکثر دکانوں پر مراٹھی سائن بورڈ ملا۔ پنویل میں ۳۵؍ دکانداروں کوشہری انتظامیہ کا نوٹس۔

سپریم کورٹ کی ہدایت کے مطابق  برہن ممبئی میونسپل کارپوریشن(بی ایم سی) کی حدود میں دکانوں اور اداروں پر جلی حروف میں مراٹھی  میں لکھے ہوئے نام کی تختیاں ( سائن بورڈ)لگانا لازمی قرار دیا گیا ہے۔ مراٹھی سائن بورڈ لگانے کیلئے تاجروں کو ۲۷؍ نومبر تک مہلت دی گئی تھی جس کے بعد منگل (۲۸؍ نومبر ) سے سبھی۲۴؍ میونسپل وارڈوں میں دکانوں کا سروے شروع کیا گیااور پہلے ہی دن مجموعی طور پر ۳؍ ہزار ۲۶۹؍  دکانوں کی جانچ کی گئی جن میں ۹۵؍ فیصد یعنی ۳؍ ہزار ۹۳؍ دکانوں پر نام کی تختیاں کورٹ کی ہدایت کے مطابق  مراٹھی   میں لکھی پائی گئیں۔البتہ سپریم کورٹ کی ہدایات اور قانون کی خلاف پر ۱۷۶؍دکانوں اور اداروں کو نوٹس  دیئے گئے ہیں۔ اسی طرح پنویل میں دکانداروںپر کارروائی کی گئی ہے۔یاد رہے کہ ممبئی میونسپل کمشنر  اقبال سنگھ چہل نے تمام متعلقہ افراد کو حکم دیا ہے کہ وہ سپریم کورٹ کی ہدایت پر سختی سے عمل کریں۔  ایڈیشنل میونسپل کمشنر (شہر) اشوینی جوشی اور ڈپٹی کمشنر (اسپیشل) سنجوگ کبرے کی رہنمائی میں مذکورہ کارروائی کیلئے ۲۴؍ واڈروں میں دکانوں اور اسٹیبلشمنٹ ڈیپارٹمنٹ کے سینئر افسران کی ایک ٹیم تشکیل دی گئی ہے جو علاقوں میں گشت کر کے مراٹھی والے سائن بورڈ کی جانچ کر رہی ہے۔
مہاراشٹر شاپس اینڈ اسٹیبلشمنٹ ایکٹ ۲۰۱۸ء اور مہاراشٹر شاپس اینڈ اسٹیبلشمنٹ (ترمیمی) ایکٹ ۲۰۲۲ء  کی دفعہ۳۵؍ اور دفعہ ۳۶؍ سی کے مطابق دکانوں اور اداروں کے نام کی تختیاں مراٹھی دیوناگری رسم الخط میں جلی حروف میں ہونی چاہئیں۔ سپریم کورٹ میں دائر درخواست کے مطابق دکانوں اور اداروں کے ناموں کے بورڈ مراٹھی دیوناگری رسم الخط میں جلی حروف میں لگانے کیلئے دو ماہ کی ڈیڈ لائن دی گئی تھی۔ یہ مدت جمعہ ۲۵؍ نومبر۲۰۲۳ءکو ختم ہوگئی۔ تاہم اتوار کو ہفتہ وار اور پیر کو عام تعطیلات ہونےکی وجہ سے سائن بورڈ کی  جانچ کا عمل منگل سے شروع کیا گیا۔ جانچ کایہ کام ہر میونسپل وارڈ کے شاپ اینڈ اسٹیبلشمنٹ ڈپارٹمنٹ کے افسران اور اہلکاروں کے ذریعے کیا گیا۔
منگل کو  ۳؍ ہزار ۲۶۹؍ دکانوں  اور اداروںکی جانچ کی گئی تھی اور ان میں سے جن ۱۷۶؍  دکانداروں اور اداروں میں  ہدایت کے مطابق مراٹھی ناموں کی تختیاں نہیں لگائی تھیں، انہیں پہلے نوٹس دیا گیا ہے  اور جرمانہ ادا کرنے والی کارروائی کااہل قرار دیا گیا ہےنیز عدالت کے حکم کے مطابق  بی ایم سی کی جانب سے فی دکاندار / ادارے پرکم از کم ۲؍ ہزار روپے اور زیادہ  سے زیادہ ایک لاکھ روپے تک جرمانہ عائد کیاجائے گاساتھ ہی بی ایم سی کی جانب سے یہ بھی واضح کیا گیا ہے کہ اگر یہ پایا جاتا ہے کہ اصول کی مسلسل خلاف ورزی کی گئی ہےتوروزانہ ۲؍ ہزار روپے کے حساب سے جرمانہ عائد کیا جائے گا۔
پنویل میں بھی دکانداروں کو نوٹس 
ریاستی حکومت نے مراٹھی میں بورڈ لگانے کو لازمی قرار دیا ہے ۔بورڈ لگانے کی آخری تاریخ گزرنے کے باوجود بہت سے دکانداروں نے ہدایت پر عمل نہیں کیا ہے۔ منگل کو پنویل میونسپل کارپوریشن کے افسران نے بھی کئی دکانوںکی جانچ کی اور ۳۵۱؍ دکانداروں اور اداروں کو نوٹس جاری کیا ہے۔اس سلسلےمیں پنویل کے میونسپل کمشنر گنیش دیشمکھ نے بتایا کہ ہمارے  اے، بی، سی اور  ڈی وارڈ میں تمام   دکانوں، ہوٹلوں، سرکاری اور نیم سرکاری اداروں کا سروے کیا گیا جس میں یہ معلوم ہوا کہ ۳۵۱؍  دکانداروں / اداروں  نے  مراٹھی میں جلی حروف میں تختیاں یا تو نہیں لگائی ہیں یا پھر بہت ہی چھوٹے فونٹ میں نام  مراٹھی میں لکھا ہے۔ ان ۳۵۱؍ دکانداروں کو نوٹس دے کر جلد از جلد مراٹھی میں نام لکھنے کی تاکید کی گئی ہے  ورنہ ان کے خلاف کارروائی کرتے ہوئے بھاری جرمانہ عائد کیا جائے گا۔ شہری انتظامیہ کی جانب سے علاقوں میں گشت کروا کر لاؤڈ  اسپیکر کے ذریعے مراٹھی میں بورڈلگانے کی اپیل بھی کی جا رہی ہے۔
ممبئی میںوارڈ کی سطح پر کارروائی کی تفصیل  :
          وارڈ                      دکانوں کی تعداد خاطی
 ۱۔ اے ، بی اور سی                  ۳۰۰  ۳
۲۔ ڈی وارڈ                               ۹۸  ۸
۳۔ای وارڈ                              ۱۰۱  ۴
۴۔ ایف ساؤتھ                          ۱۴۷  ۵
۵۔ایف نارتھ                              ۷۱  ۴
۶۔جی ساؤتھ                           ۱۹۵  ۹
۷۔ جی نارتھ                           ۱۷۸  ۴
۸۔ایچ ایسٹ                           ۱۲۷  ۱۰
۹۔ایچ  ویسٹ                         ۱۴۲  ۱۲
۱۰۔کے ایسٹ                       ۱۶۵  ۱۱
۱۱۔ کےویسٹ                       ۲۷۱  ۷
۱۲۔ ایل  وارڈ                        ۱۵۱  ۳
۱۳۔ایم ایسٹ                           ۸۹  ۸
۱۴۔ ایم ویسٹ                        ۱۵۵  ۶
۱۵۔ این وارڈ                         ۸۹  ۱۸
۱۶۔ پی ساؤتھ                       ۱۸۹  ۹
۱۷۔ پی نارتھ                        ۱۰۳  ۷
۱۸۔ آر ساؤتھ                       ۱۳۶  ۷
۱۹۔ آر نارتھ                        ۲۰۷  ۷
۲۰۔ آر سینٹرل                    ۱۵۵  ۱۰
۲۱۔ ایس وارڈ                      ۹۸  ۱۴
۲۲۔ ٹی وارڈ                     ۱۰۳  ۱۰
کل :                              ۳۲۶۹ ۱۷۶