بامبے ہائی کورٹ نے ۱۵؍ اور ۱۶؍ نومبر کو گرگاؤں چوپاٹی پر چھٹھ پوجا کے انعقاد اور عارضی اسٹیج بنانے کی اجازت دینے سے انکار کردیا۔ عدالت نے کہا کہ مذہبی آزادی کا حق امن عامہ، اخلاقیات اور صحت سے مشروط ہے، تاہم منتظمین کے لیے متبادل مقام فراہم کرنے کا حکم بھی نہیں دیا۔

بامبے ہائی کورٹ نے ممبئی کے مشہور ساحلی مقام گرگاؤں چوپاٹی پر چھٹھ پوجا کے انعقاد کی اجازت طلب کرنے والی عرضی پر فوری راحت دینے سے انکار کردیا ہے۔ عدالت نے واضح کیا کہ ہندوستانی آئین کی دفعہ ۲۵؍ کے تحت مذہبی آزادی کا حق حاصل ضرور ہے، لیکن اس پر امن عامہ، اخلاقیات اور صحت سے متعلق آئینی پابندیاں بھی لاگو ہوتی ہیں۔ جسٹس ادویت سیتھنا اور جسٹس رنجت سنہا بھونسلے پر مشتمل تعطیلاتی بنچ نے ۹؍ نومبر کو یہ فیصلہ سنایا۔ یہ عرضی متھلا چھٹھ پوجا سنگھ نے داخل کی تھی، جس میں ۱۵؍ اور ۱۶؍ نومبر کو گرگاؤں چوپاٹی پر مذہبی تقریب منعقد کرنے اور اس کے لیے عارضی اسٹیج تعمیر کرنے کی اجازت مانگی گئی تھی۔ منتظمین کا منصوبہ تھا کہ ۱۵؍ نومبر کی سہ پہر ۳؍ بجے سے ۱۶؍  نومبر کی صبح ۸؍ بجے تک پوجا کے انتظامات کیے جائیں۔ اس مقصد کے لیے انہیں ساحل پر عارضی ڈھانچہ اور دیگر ضروری انتظامات کرنے تھے۔

#WATCH | Nagpur, Maharashtra: On Bombay HC declining immediate relief to Mithila Chhath Puja Sangh regarding Chhath celebrations at Girgaon Chowpatty, Shiv Sena leader Sanjay Nirupam says, "...I am unable to understand the reason behind this. Wherever there are sea beaches in Mumbai, Govt, Collector office and BMC give permission and provide facilities for this. This happens at Juhu Beach, Aksa Beach, Gorai Beach, Dadar Chowpatty and Colaba. So, I cannot understand the reason for no permission for Girgaon Chowpatty. If Chhath Puja celebrations were being done at Girgaon Chowpatty earlier too then permission should indeed be granted. But if permission is being sought for the first time, then this might be a decision by the Administration..."

— ANI (@ANI) November 10, 2026

تنظیم نے عدالت کو بتایا کہ ڈی بی مارگ پولیس اسٹیشن نے ۱۷؍  ستمبر کو ان کی درخواست مسترد کردی تھی۔ پولیس نے اپنے فیصلے کے حق میں ہائی کورٹ کے سابقہ احکامات اور ساحل پر تقریبات کے انتظام کے لیے قائم کردہ کمیٹی کی پابندیوں کا حوالہ دیا تھا۔ اس کے بعد تنظیم نے ۷؍ اکتوبر کو مہاراشٹر کے وزیر اعلیٰ کو بھی نمائندگی پیش کرتے ہوئے چھٹھ پوجا کی اجازت طلب کی، لیکن عدالت کو بتایا گیا کہ اس درخواست پر کوئی فیصلہ نہیں ہوا ہے۔ عدالت کے سامنے ریاستی حکومت نے گرگاؤں چوپاٹی سے متعلق سابقہ عدالتی احکامات کا حوالہ دیا۔ ان کے مطابق ساحل پر تقریبات کے انعقاد کے لیے ایک ہائی پاور کمیٹی اور نگرانی کمیٹی قائم کی گئی ہے۔ وہاں گنیش اتسو، نوراتری اتسو، رام لیلا، کرشن لیلا اور کرسمس جیسی تقریبات کی اجازت دی گئی ہے، جب کہ دیگر پروگراموں کے لیے متعلقہ محکموں سے پیشگی منظوری حاصل کرنا ضروری ہے۔ ریاستی حکومت نے خاص طور پر ۲۱؍ جون ۲۰۱۸ء کے عدالتی حکم کا حوالہ دیا، جس میں نگرانی کمیٹی کو ایسی درخواستوں میں لازمی فریق بنانے کی ہدایت دی گئی تھی جن کا تعلق گرگاؤں چوپاٹی پر تقریبات یا عارضی ڈھانچے تعمیر کرنے کی اجازت سے ہو۔ اس حکم کے تحت ساحل پر تقریبات کے لیے مخصوص جگہ اور انتظامی شرائط بھی مقرر کی گئی تھیں۔ سماعت کے دوران بنچ نے عرضی گزاروں کے وکیل سے سوال کیا کہ کیا انہوں نے نگرانی کمیٹی سے ضروری اجازت حاصل کی ہے اور کیا اس کمیٹی کو موجودہ مقدمے میں فریق بنایا گیا ہے؟ عدالت کے مطابق وکیل اس سوال کا اطمینان بخش جواب نہیں دے سکے۔ بنچ نے اسی قانونی اور طریقۂ کار سے متعلق کمیوں کو مدنظر رکھتے ہوئے فوری اجازت دینے سے گریز کیا۔ مذہبی آزادی کے آئینی دائرے پر تبصرہ کرتے ہوئے عدالت نے کہا، ’’بلاشبہ ضمیر کی آزادی اور مذہب کو اختیار کرنے، اس پر عمل کرنے اور اس کی تبلیغ کا حق حاصل ہے، لیکن آئین کی دفعہ ۲۵؍ کے تحت یہ حق امن عامہ، اخلاقیات اور صحت سے مشروط ہے۔ دوسرے الفاظ میں، آئین نے اس سلسلے میں کچھ حدود اور توازن مقرر کیے ہیں، جن کی پابندی ضروری ہے۔‘‘
عدالت نے یہ بھی واضح کیا کہ ہندوستان مختلف مذاہب اور عقائد کا ملک ہے، لیکن مذہبی حقوق کا استعمال آئینی ضابطوں کے مطابق ہونا چاہیے۔ اس معاملے میں عدالت نے چھٹھ پوجا کے انعقاد پر کوئی عمومی پابندی عائد کرنے کا اعلان نہیں کیا، بلکہ گرگاؤں چوپاٹی پر تقریب کے لیے مطلوبہ اجازت اور قانونی تقاضوں کی تکمیل نہ ہونے کی بنیاد پر فوری راحت دینے سے انکار کیا۔ سماعت کے دوران تنظیم کی جانب سے یہ درخواست بھی کی گئی کہ اگر گرگاؤں چوپاٹی پر تقریب کی اجازت نہیں دی جاسکتی تو انتظامیہ کو کسی متبادل مقام کی فراہمی کی ہدایت دی جائے۔ تاہم عدالت نے اس مطالبے پر کوئی حکم جاری نہیں کیا۔ بنچ نے کہا کہ وہ اس معاملے میں کوئی رائے ظاہر نہیں کررہی اور عرضی گزار قانون کے تحت دستیاب دیگر راستے اختیار کرنے کے لیے آزاد ہیں۔ عدالت نے معاملے کو تعطیلات کے بعد دوبارہ سماعت کے لیے فہرست میں شامل کرنے کی ہدایت دی۔ چھٹھ پوجا شمالی ہندوستان، بالخصوص بہار اور مشرقی اتر پردیش میں بڑے پیمانے پر منایا جانے والا مذہبی تہوار ہے۔ اس موقع پر عقیدت مند سورج دیوتا اور چھٹھی مئیا کی عبادت کرتے ہیں اور ندیوں، تالابوں یا دیگر آبی مقامات پر کھڑے ہوکر ارگھ دیتے ہیں۔ ممبئی میں بھی بہار اور دیگر شمالی ہندوستانی ریاستوں سے تعلق رکھنے والی بڑی آبادی اس تہوار کو مناتی ہے۔ گرگاؤں چوپاٹی پر تقریب کی اجازت نہ ملنے کے بعد منتظمین کے سامنے اب قانونی متبادل اختیار کرنے اور انتظامیہ سے کسی دوسری جگہ کے حصول کی کوشش کا راستہ باقی ہے۔