شہر کے ٹنکیشورمیں واقع گولکولکر جونیئر کالج میں روبوٹ ٹیچر کو متعارف کرایا گیا ہے، یہ روبوٹ اے آئی تکنیک سے کام کرتا ہے۔

 اسکولوں میں اب تختہ سیاہ، کھریا اور کتابوں کیساتھ ساتھ مصنوعی ذہانت (اے آئی) کے حامل روبوٹ نے بھی جگہ بنا لی ہے۔ ناگپور کے ٹنکیشور نگر میں واقع گولولکر گروجی سرکاری داداجی جونیئر کالج میں ریاست کی پہلی مصنوعی ذہانت پر مبنی روبوٹ ٹیچر ’ویدانتی‘ متعارف کرائی گئی ہے۔ اس روبوٹ ٹیچر کے ذریعے طلبہ کو جدید ٹیکنالوجی کی مدد سے مزید دلچسپ اور مؤثر انداز میں تعلیم حاصل کرنے کا موقع ملے گا۔

طلبہ میں سائنسی نقطۂ نظر، تجسس اور اختراعی صلاحیتوں کو فروغ دینے کے مقصد سے اسکول میں جدید روبوٹکس اور مصنوعی ذہانت کی تجربہ گاہ قائم کی گئی ہے۔ اس تجربہ گاہ کا افتتاح ثانوی تعلیم کی افسر انیل دہی پھلے کے ہاتھوں عمل میں آیا۔ اس موقع پر بھارتیہ ودیا پرچارک سنستھا کے رمیش بوبھی، سنیل خان کھوجے، شبھانگی پھوٹانے، للت تپاسے، موہن ساٹھے، گنوندت ابھینکر اور پرنسپل ڈاکٹر وندنا بڑوائیک موجود تھے۔ افتتاح کے بعد مہمانوں نے تجربہ گاہ کا معائنہ کیا۔ طلبہ کی جانب سے تیار کردہ مختلف سائنسی تجربات کی معلومات حاصل کرتے ہوئے ان کی حوصلہ افزائی کی۔ 

یہ بھی پڑھئے: پونے سے ناگپور تک ’آئین لانگ مارچ‘ نکالنے کا اعلان

پرنسپل ڈاکٹر وندنا بڑوائیک نے بتایا کہ طلبہ کو محض کتابی علم فراہم کرنے کے بجائے روبوٹکس، مصنوعی ذہانت اور عملی تجربات کے ذریعے ہنرمندی پر مبنی تعلیم دینا اس تجربہ گاہ کا بنیادی مقصد ہے۔ انہوں نے کہا کہ جدید ٹیکنالوجی سے طلبہ کی واقفیت اسکول کی سطح پر ہی ہونی چاہیے، اسلئے یہ اقدام انتہائی اہمیت کا حامل ثابت ہوگا۔ اس پروگرام کی سب سے بڑی کشش روبوٹ ٹیچر ’ویدانتی‘ تھی، جس نے حاضرین کی جانب سے پوچھے گئے مختلف سوالات کے درست جوابات دے کر سب کو متاثر کیا۔ طالبات نے بھی روبوٹ سے گفتگومیں خصوصی دلچسپی۔ مصنوعی ذہانت (اے آئی) سے لیس یہ روبوٹ ٹیچر طلبہ کو جدید ٹیکنالوجی سے روشناس کرانے اور اس کے عملی استعمال کا ابتدائی تجربہ فراہم کرے گی۔اس موقع پر سیکنڈری ایجوکیشن آفیسر انیل دہی پھلے نے کہا کہ یہ اقدام نہ صرف ناگپور بلکہ پورے ودربھ کیلئے باعثِ فخر ہے۔