آتشزدگی کے دوران سلنڈروں کے دھماکوں  کے بیچ لوگوں کی مدد کرنےوالے طاہر حسین نے دل جیت لئے۔

اتوار کی شب میں ڈونگری کے ڈاکٹر مہیشوری روڈ پر واقع حاجی قاسم چال میں  پٹاخوں کی وجہ سے بھیانک آتشزدگی کے دوران  نور باغ کے ۳۵؍ سالہ طاہر حسین شیخ عرف آصف نے اپنی جان پر کھیل کر متاثرین کی جان ومال  کو بچانے میں اہم رول ادا کیا ۔ سوشل میڈیا پرانہیں ’’ڈونگری کا عبدل‘‘ کہہ کر ان کی بہادری  کی پزیرائی ہورہی ہے ۔

طاہر حسین نے فائر بریگیڈ کے آنے سے پہلے تقریباً آدھے گھنٹے آگ بجھانے کی بھرپورکوشش کی۔ سلنڈر دھماکوں کے بیچ وہ  کارخانوں کی چھتوں پر تنہا چڑھ کر آگ پر قابو پانے کی مشقت کر رہے تھے۔ فائر  بریگیڈ   کے آنے کے بعد وہ  رات بھراُن کے ساتھ  بھی آگ بجھانے میں مصروف رہے ۔ان کی ہمت اور حوصلہ کی جہاں سماجی اور سیاسی جماعتوں  نے ستائش کی ، وہیں مقامی شیوسینا (اُدھو) نے انہیں ’اگنی شمن پرسکار‘ سے نوازا ہے۔

یوپی، ضلع امروہا سے تعلق رکھنے والے طاہر حسین حادثہ والے دن معمول کے مطابق نور باغ پر اپنے سیلون پر کام کر رہے تھے۔ آگ کا شور سن کر وہ دکان سے نکلے۔ اس وقت حاجی قاسم چال کے ایک کارخانے کی چھت پر معمولی آگ لگی تھی۔