مرکزی وزیرِ خزانہ نرملا سیتا رمن نے کہا کہ مرکز کی جانب سے تمل ناڈو کے لیے کوئی مالی واجبات باقی نہیں ہیں۔

مرکزی وزیرِ خزانہ نرملا سیتا رمن نے جمعرات کو کہا کہ مرکز کی جانب سے تمل ناڈو کے لیے کوئی مالی واجبات باقی نہیں ہیں۔ انہوں نے پڑوسی ضلع کانچی پورم میں ایک کتاب کی رونمائی کی تقریب میں شرکت اور مندر کے شہر میں گج پوجا ادا کرنے کے بعد صحافیوں سے گفتگو کرتے ہوئے کہا کہ ریاست میں سابقہ ڈی ایم کے حکومت کے دور میں مرکز نے ریاست کے تمام واجب الادا فنڈز جاری کر دیے تھے۔

یہ بھی پڑھئے:نیمار جونیئر ۹۸۱؍ دن بعد ٹیم میں واپسی پر رو پڑے

انہوں نے یقین دہانی کرائی کہ ریاست کے لیے جو بھی ضروری فنڈز واجب ہوں گے، وہ ضرور جاری کیے جائیں گے، تاہم اس وقت مرکز کی جانب سے تمل ناڈو پر کوئی مالی بقایا جات نہیں ہیں۔
وزیرِ خزانہ نے کہا کہ ریاستی حکومتوں کے لیے قرض لینا کوئی غلط بات نہیں، لیکن اسے ریاست کی مجموعی گھریلو پیداوار (جی ایس ڈی پی) کے تین فیصد تک محدود رکھا گیا ہے۔ انہوں نے کہا کہ حاصل شدہ قرضوں کو بنیادی ڈھانچے کی مضبوطی کے لیے استعمال کیا جانا چاہیے تاکہ معیشت کو فروغ مل سکے۔ انہوں نے مزید کہا کہ تعلیم، صحت اور صنعتی شعبوں میں سرمایہ کاری اقتصادی ترقی کو تیز کرنے میں مددگار ثابت ہوگی۔ صرف فلاحی منصوبوں پر قرض کی رقم خرچ کرنا مناسب نہیں ہوگا۔

یہ بھی پڑھئے:فلم ’’اوینجرز: اینڈ گیم‘‘ اضافی مناظر کے ساتھ دوبارہ سنیما گھروں میں ریلیز ہوگی

نرملا سیتا رمن نے وزیرِ اعلیٰ وجے کی قیادت والی برسرِ اقتدار ٹی وی کے حکومت کی اس پالیسی کا خیرمقدم کیا کہ وہ ریاست کی ترقی کے لیے مرکز کے ساتھ تصادم کا راستہ اختیار نہیں کر رہی۔
نرملا سیتا رمن گزشتہ شب تمل ناڈو اور پڈوچیری کے تین روزہ دورے پر پہنچی تھیں۔ انہوں نے کانچی پورم ضلع کے ایک کالج میں’’Daughters of Kanchi - The SSKV Story‘‘ کے عنوان سے ایک کتاب کی رونمائی کی۔ یہ کتاب ایس ایس کے وی گروپ آف انسٹی ٹیوشنز  کے ۱۲۰؍سال مکمل ہونے کی یاد میں شائع کی گئی ہے اور خواتین کی تعلیم کے فروغ میں ادارے کے کردار کو اجاگر کرتی ہے۔