اوپن اے آئی (OpenAI) اب محض ریسرچ ادارہ نہیں رہا بلکہ کمرشیلائزیشن کی جانب بڑے قدم بڑھا رہا ہے۔ کمپنی چیٹ جی پی ٹی میں اشتہارات اور نئی سروسیز کے ذریعے اسے اربوں ڈالر کی آمدنی کا ذریعہ بنانے کی تیاری کر رہی ہے۔

ہر کمپنی کیلئے ضروری ہے کہ اس کا ریٹرن آن انویسٹمنٹ (ROI) مضبوط ہو تاکہ کاروبار منافع بخش رہے۔ سافٹ ویئر پر مبنی خدمات کے لیے اشتہارات آمدنی حاصل کرنے کا ایک آسان طریقہ ہیں، اور اوپن اے آئی بھی اسی راستے پر چل رہی ہے۔ پُرکشش سبسکرپشن پیکجز رکھنے کے باوجود، چیٹ جی پی ٹی بنانے والی یہ کمپنی اب ایک بڑا قدم کمرشیلائزیشن کی طرف بڑھا رہی ہے اور ایسے اعلیٰ عہدیدار کی تلاش میں ہے جو چیٹ جی پی ٹی کی مونیٹائزیشن کو آگے بڑھائے، تاکہ اس پلیٹ فارم کو اربوں ڈالر کی آمدنی پیدا کرنے والی مشین میں بدلا جا سکے۔ یہ اقدام اس بات کا واضح اشارہ ہے کہ کمپنی خود کو ایک ریسرچ پر مبنی ادارے سے ٹیکنالوجی کے میدان میں ایک بڑی کمرشل طاقت میں تبدیل کرنے کا ارادہ رکھتی ہے۔ 

یہ بھی پڑھئے: جی ایس ٹی میں کمی کا اثر، کاروں کی فروخت میں اضافہ

اوپن اے آئی کا کی طرف قدم
یہ بھرتی، جس کی خبر سیکنگ الفا (Seeking Alpha) نے دی ہے، ایسے شخص کیلئے ہے جو اوپن اے آئی کی تمام مونیٹائزیشن حکمتِ عملیوں کی قیادت کرے گا۔ اس عہدے کی ذمہ داریوں میں مقبول اے آئی چیٹ بوٹ میں اشتہارات شامل کرنے کی حکمتِ عملی تیار کرنا اور موجودہ سبسکرپشن سروسز کا انتظام شامل ہے۔ یہ نیا ایگزیکٹو براہِ راست فِدجی سیمو (Fidji Simo) کو رپورٹ کرے گا، جو حال ہی میں اوپن اے آئی کی سی ای او آف ایپلیکیشنز مقرر ہوئی ہیں۔ سیمو، جو پچھلے ماہ انسٹاکارٹ (Instacart) کی سی ای او رہنے کے بعد اوپن اے آئی میں شامل ہوئیں، ٹیم کی تعمیر میں براہِ راست دلچسپی لے رہی ہیں۔ ذرائع کے مطابق وہ ممکنہ امیدواروں سے مل چکی ہیں جن میں ان کے فیس بک کے سابقہ ساتھی بھی شامل ہیں۔ مونیٹائزیشن کیلئے الگ ڈویژن قائم کر کے اوپن اے آئی واضح طور پر اپنے جدید مصنوعی ذہانت کے بوٹس اور سروسیز سے بڑی آمدنی کمانے کیلئے پُرعزم ہے، خاص طور پر اس عوامی شہرت اور بڑی سرمایہ کاری کے بعد جو چیٹ جی پی ٹی نے حاصل کی۔ اشتہارات کے ذریعے، کمپنی اپنے ان کروڑوں صارفین کو ہدف بنانا چاہتی ہے جو مفت چیٹ بوٹ استعمال کرتے ہیں۔ 

یہ بھی پڑھئے: جہاز سازی اور سمندری نقل و حمل کے شعبے کیلئے کابینہ نے بڑے پیکیج کو منظوری دی

اوپن اے آئی جابز پلیٹ فارم بھی متعارف ہونے والا ہے
مونیٹائزیشن سے آگے بڑھ کر اوپن اے آئی اپنے ایپلی کیشن ایکو سسٹم کو تیزی سے وسعت دے رہی ہے جس کا آغاز اوپن اے آئی جابز پلیٹ فارم سے ہو رہا ہے۔ یہ ایک اے آئی سے چلنے والی ہائرنگ سروس ہوگی جو کاروباروں کو ان ملازمین سے ملائے گی جن کی انہیں ضرورت ہے۔ ایک بلاگ پوسٹ میں سیمو نے کہا کہ یہ سروس، جو۲۰۲۶ء کے وسط تک لانچ ہونے کی توقع ہے، اے آئی کا استعمال کرے گی تاکہ کمپنیوں کی ضروریات اور ملازمین کی صلاحیتوں کے درمیان بہترین مطابقت تلاش کی جا سکے۔ اس طرح اوپن اے آئی اپنی جدید جنریٹیو اے آئی ماڈلز کے ذریعے مائیکروسافٹ کی ملکیت لنکڈ اِن (LinkedIn) کا مقابلہ کرنے جا رہی ہے، جو دنیا کا سب سے مقبول پروفیشنل اور جاب سرچ پلیٹ فارم ہے۔ مزید برآں، کمپنی کا منصوبہ ہے کہ وہ ۲۰۲۵ء کے آخر تک اوپن اے آئی اکیڈمی کے ذریعے سرٹیفکیشن پروگرام متعارف کرائے تاکہ کارکنوں کو نئی اے آئی مہارتوں میں تربیت دی جا سکے۔ اس اقدام کا مقصد روزگار کے بازار میں ممکنہ خلل کو دور کرنا ہے، جو اے آئی کی وجہ سے متوقع ہے، اور ورک فورس کو اس بڑھتی ہوئی ٹیکنالوجی کے کردار کیلئے تیار کرنا ہے۔