بہار اسمبلی انتخابات ۲۰۲۵ءمیں کانگریس کی عبرتناک شکست کے بعد پارٹی اعلیٰ کمان نے جمعرات کو دن بھرچلی جائزہ میٹنگ میں بہار کانگریس کےلیڈروں سے تفصیلی فیڈبیک لیا۔میٹنگ میںکانگریس کے قومی صدر ملکارجن کھرگے، سابق صدر راہل گاندھی اور دیگر سینئر لیڈروں نے شرکت کی۔میٹنگ میں دس دس کےگروپ میں بہارکانگریس کے لیڈروں اور امیدواروں کوبلایاگیا تاکہ ہراسمبلی حلقے کے مسائل اور خامیوں کو تفصیل سے سناجاسکے۔ میٹنگ میں بہار کے انتخابات میں حصہ لینے والے کانگریس کے سبھی ۶۱؍ امیدوار اور کئی دیگر سینئر لیڈران شامل تھے۔ ملکارجن کھرگے، راہل گاندھی اور کے سی وینوگوپال نے امیدواروں سے ملاقات کی۔ پارٹی کے بہار انچارج کرشنا الاوارو کو میٹنگ سے باہر رکھا گیا۔  بہار کے امیدواروں کے ساتھ لمبی ملاقات کے بعد مرکزی قیادت نے اراکین پارلیمنٹ طارق انور، ڈاکٹر اکھلیش پرساد سنگھ اور منوج کمار سے الگ الگ بات چیت کی۔ پورنیہ سے آزاد رکن پارلیمنٹ پپو یادو بھی میٹنگ میں شرکت کیلئے پہنچےتھےلیکن انہیں ملاقات سے باہر رکھا گیا ۔ ذرائع کےمطابق میٹنگ کے دوران کئی امیدواروں نے پارٹی کی شکست کا ذمہ دار اتحادکی سیاست کوٹھہرایااور کہا کہ پارٹی کو آر جے ڈی سے تعلق ختم کرکے اپنےدم پر الیکشن لڑنا چاہئے۔ اگر ایسی نوبت نہیں آتی ہے تو پارٹی کو انتخابات سے پہلے ہی سیٹوں اور امیدواروں کا انتخاب کرنا چاہئے تاکہ انتخابی تیاریوں کیلئے بھرپوروقت مل سکے۔ میٹنگ کے دوران پارٹی کے رکن پارلیمنٹ اکھلیش پرساد سنگھ نے بہار میں۴۳؍لیڈروں کو نوٹس جاری کرنے کا معاملہ اٹھایا۔اس پر وینوگوپال نے حیرت کا اظہار کرتے ہوئے کہا کہ ایسا اقدام غلط ہے۔ راہل گاندھی نے کہا کہ اگر ایسا ہوا ہے تو وینوگوپال اس معاملے کو اپنی سطح پر دیکھیں گے۔ 

 

 

اعلیٰ سطحی میٹنگ کے بعد پارٹی کے سینئر لیڈران طارق انور، ڈاکٹر اکھلیش پرساد سنگھ اوربہارانچارج کرشنا الاوارو نے معلومات فراہم کیں۔ طارق انور نے کہا کہ تفصیلی جائزہ لیا گیا ہے۔ ہر لیڈر سے رائے لی گئی۔ اب اے آئی سی سی پورے معاملے کی جانچ کرے گی اور پارٹی اس کے بعد مستقبل کے لئے روڈ میپ تیار کرے گی۔ اکھلیش سنگھ نے کہا کہ ہر لیڈر سے رائے لینے کے بعد اعلیٰ کمان نے بہار میں پارٹی کے ممبران پارلیمنٹ کی رائے بھی مانگی ہے۔ ہم سب نے اپنے خیالات کا اظہار کیا ہے۔ کانگریس مستقبل میں بہتر کام کرے گی۔ اس کے لئے ایک مناسب روڈ میپ بھی تیار کیا جائے گا۔کانگریس کے بہارانچارج کرشناالاوارو نے کہا کہ شکست کی بہت سی وجوہات تھیں۔ ووٹوں کی خریدوفروخت ہوئی۔ انتخابی عمل میں دھاندلی کی گئی۔ اتحاد کے اندر ہم آہنگی کانہ ہونابھی ایک وجہ تھی۔

 

 

کانگریس کے ریاستی صدر راجیش رام نےکہاکہ ہماری سینئر قیادت نے بہار کے انتخابی نتائج پر سب کی رائے سنی۔ سبھی امیدواروں نےبتایاکہ ایس آئی آر کے ذریعے ووٹ چوری کی گئی اور انتخابات کے دوران بھی لوگوں میں پیسے تقسیم کئے گئے۔ ووٹنگ کے دوران انتخابی مہم چلائی گئی، الیکشن کو متاثر کیاگیا۔ ہم شکست کی وجوہات کا جائزہ لے رہے ہیں۔ مہاگٹھ بندھن یا کانگریس کے ووٹ فیصدمیں کوئی کمی نہیں آئی ہے۔ ہم تنظیم سازی کے لئے کام کریںگے۔