چنڈی گڑھ (ایجنسی): کانگریس نے چنڈی گڑھ میونسپل کارپوریشن کی طرف سے سڑک پر کچرا پھینکنے والوں کے خلاف ڈھول نگاڑے بجاکر گھر گھر جا کر کارروائی کرنے کی پہل پر اعتراض کیا ہے۔ کارپوریشن کے اس اقدام کے تحت اگر کوئی شخص سڑک کے کنارے کچرا پھینکتے ہوئے پکڑا جاتا ہے تو کارپوریشن کے کارکن ڈھول بجاتے ہوئے اس کے گھر پہنچ کر کچرا واپس کرتے ہیں اور چالان بھی کاٹتے ہیں۔ پیر کو منی ماجرا میں تقریباً۱۳؍ہزارروپے کا چالان کیا گیا اور پوری کارروائی کی ویڈیو گرافی بھی کی گئی۔ کانگریس نے اس کارروائی پر سخت اعتراض کیا ہے۔ کانگریس کا کہنا ہے کہ عوامی طور پر کسی کی ویڈیو بنانا اور ڈھول نگاڑے بجاناغلط ہے، کیونکہ اس سے علاقے میں ان کی سماجی حیثیت اور شناخت متاثر ہوتی ہے۔ پارٹی نے واضح کیا کہ وہ چالان کی مخالفت نہیں کرتی، لیکن ویڈیو صرف متعلقہ شخص کو دکھائی جائے اور عوامی طور پر نشر نہ کی جائے۔

چنڈی گڑھ کے سینئر ڈپٹی میئر جسویر سنگھ بنٹی نے کہا کہ چنڈی گڑھ میونسپل کارپوریشن کی جانب سے سڑکوں پر کچرا پھینکنے والوں کے خلاف جو مہم چلائی جارہی ہے وہ غلط ہے۔ انہوں نے کہا کہ کانگریس اس مہم کی مخالفت کرتی ہے۔ دوسری طرف چنڈی گڑھ کانگریس کے صدر ایچ ایس لکی نے یہ بھی کہا کہ کانگریس اس مہم کی مخالفت کرتی ہے۔ یہ غلط ہے اور لوگوں کے جذبات کو ٹھیس پہنچتی ہے۔ اگر کوئی کچرا پھینکے تو پہلے اسے خبردار کیا جائے۔ ڈھول نگاڑے بجاکر اس کے گھر کے باہر جاکر اسے شرمندہ نہیں کرنا چاہیے۔