عدالت نے پوچھا کہ بی ایم سی کا عملہ انتخابی ڈیو ٹی اور مراٹھا سماج کےریزرویشن سے متعلق سروے میں مصروف ہےتو کیا ممبئی کی سڑکیں بند کردینی چاہئیں؟

 گڑھوں سے اموات  سے متعلق حلف نامہ داخل نہ کرنے پر بامبے کورٹ  نے شہری انتظامیہ پر برہمی ظاہر کی ہے۔ منگل کو بامبے ہائی کورٹ نے گڑھوں سے ہونے والی اموات پر دائر عرضی پر سماعت کے دوران سخت رخ اختیار کیا، کیونکہ اس سے متعلق شہری انتظامیہ سے حلف نامہ داخل کرنے کیلئے کہا گیا تھا۔  منگل کو حلف نامہ داخل نہیں کیا گیا تو ہائی کورٹ نے سخت لہجے میں سوال کیا ،’’بی ایم سی کا عملہ  الیکشن ڈیوٹی اور مراٹھا سماج کی پسماندگی  سے متعلق سروے میں مصروف ہےتو کیا ممبئی کی سڑکیں بند کردینی چاہئیں۔ ‘‘
جسٹس دیویندر اپادھیائے اور جسٹس عارف ڈاکٹر پر مشتمل دور کنی بنچ نے گڑھے سے ہونے والی اموات سے متعلق حلف نامہ داخل نہ کرنے پر برہمی ظاہر کی۔    
عدالت نے اس معاملے پر ایڈوکیٹ رو جو ٹھکر کی عرضی پر سماعت کی جس میں گڑھے سے ہونے والی اموات پر شہری انتظامیہ کیخلاف کارروائی کا مطالبہ کیا گیا  ہے،ٹھکر کی دلیل یہ ہے کہ ۲۰۱۸ء کے ایک فیصلے میں ہائی کورٹ نے ممبئی اور اطراف کی سڑکوں کے تمام گڑھوں کو بھرنے کرنے کا حکم دیا  تھا۔ اس معاملے پر اس سے  پہلے گزشتہ برس دسمبر میں سماعت ہوئی تھی۔ اس وقت عدالت نے ریاستی حکومت اور شہری  انتظامیہ کو اس عرضی کے جواب میں حلف نامہ داخل کرنے کا حکم دیا تھا۔ منگل کو سماعت کے دوران بی ایم سی کا وکیل عدالت میںپیش ہوا اور اس نے حلف نامہ داخل کرنے کیلئے مزیدمہلت طلب کی۔ وکیل نے بنچ کو بتایا کہ شہری انتظامیہ کے عملہ کی اکثریت الیکشن ڈیوٹی میں مصروف ہے یا گھر گھر جاکر مراٹھا سماج کی پسماندگی کا سروے کررہی ہے،   اسی لئے حلف نامہ داخل نہیں کیا جاسکا ہے۔ اس کےجواب میں چیف جسٹس اپادھیائے نے کہا،’’ یہ کیا بہا نہ ہے ؟ توکیا ممبئی کی سڑکیں بند کردینی چاہئیں ، صرف اسلئے کہ کچھ لوگ الیکشن ڈیوٹی کررہے ہیں تو کچھ مراٹھا ریزرویشن کیلئے سروے کررہےہیں۔ ‘‘
عدالت نے ۱۵؍ فروری کو ہر حال میں حلف نامہ داخل کا حکم دیا تھا۔ آئندہ ۱۵؍ فروری کو اس معاملے کی سماعت ہوگی۔ بنچ نے یہ بھی کہا کہ شہر میں جاری تعمیراتی کام کب تک مکمل ہوں گے؟ بی ایم سی اپنے حلف نامے میں اس کی بھی وضاحت کرے۔