حال ہی میں سعودی کلب النصر اور الاہلی کے درمیان ہونے والے ایک دلچسپ فٹبال میچ کے دوران، رونالڈو کو پینالٹی شوٹ آؤٹ سے پہلے مسلمانوں کے انداز میں دعا کرتے ہوئے دیکھا گیاجس کا ویڈیو سوشل میڈیا پر تیزی سے وائرل ہو گیا ہے۔

عالمی شہرت یافتہ پرتگالی فٹبالر کرسٹیانو رونالڈو ایک بار پھر اپنی عاجزی، ثقافتی شعور اور بین المذاہب احترام کی بدولت خبروں میں آگئے ہیں۔ حال ہی میں سعودی کلب النصر اور الاہلی کے درمیان ہونے والے ایک دلچسپ فٹبال میچ کے دوران، رونالڈو کو پینالٹی شوٹ آؤٹ سے پہلے مسلمانوں کے انداز میں دعا کرتے ہوئے دیکھا گیاجس کا ویڈیو سوشل میڈیا پر تیزی سے وائرل ہو گیا ہے۔ ویڈیو میں رونالڈو میچ کے نازک لمحے میں گھٹنوں کے بل بیٹھ کر، دونوں ہاتھ آسمان کی جانب بلند کئے، کامیابی کیلئے دعا کرتے نظر آتے ہیں, بالکل اسی انداز میں جیسے مسلمان عبادات یا اہم مواقع پر دعا مانگتے ہیں۔ اس منظر نے دیکھنے والوں کو حیران بھی کیا اور متاثر بھی۔ 

👀 Cristiano Ronaldo, penaltı atışları sırasında dua ediyor.

pic.twitter.com/tjxVgPJsis

— Atletik 6 (@atletik6tr) August 23, 2025

مداحوں نے اس عمل کو نہایت سراہا اور سوشل میڈیا پلیٹ فارمز پر ہزاروں صارفین نے رونالڈو کی عاجزی، بین الثقافتی حساسیت اور مختلف مذاہب کیلئے ان کے احترام کی کھلے دل سے تعریف کی۔ بہت سے صارفین نے تبصرہ کرتے ہوئے کہا کہ رونالڈو صرف ایک عظیم فٹبالر ہی نہیں بلکہ ایک بڑے دل کے انسان بھی ہیں جو ہر ثقافت کا دل سے احترام کرتے ہیں۔ بتا دیں کہ رونالڈو اس وقت سعودی کلب النصر کی نمائندگی کر رہے ہیں اور مشرقِ وسطیٰ میں نہ صرف اپنی شاندار کارکردگی بلکہ سادگی، انکساری اور اسلامی اقدار سے قربت کی وجہ سے بے پناہ مقبولیت حاصل کر چکے ہیں۔ 
یاد رہے کہ یہ پہلا موقع نہیں کہ انہیں مسلمانوں کی طرز پر دعا کرتے دیکھا گیا ہو اس سے قبل یوئیفا نیشنز کپ کے فائنل کے دوران بھی وہ قومی ٹیم کیلئےاسی انداز میں دعا کرتے نظر آئے تھے جس پر دنیا بھر کے مسلم فینز نے ان کیلئے محبت اور احترام کا اظہار کیا تھا۔