آئی سی سی کے کسی رکن ملک کا پہلا دورہ،گرفتار کرنے کے بجائے منگولیا حکومت نے گارڈ آف آنر پیش کیا، یوکرین برہم۔

 روسی صدر ولادیمیر پوتن جن کے خلاف عالمی فوجداری عدالت (آئی سی سی) نے گرفتاری وارنٹ جاری کررکھا ہے، پیر کو منگولیا  کے دورے پر پہنچ گئے۔ آئی سی سی کی جانب سے روسی صدر کے خلاف گرفتاری وارنٹ  جاری  ہونے کے بعد عدالت کے رکن ممالک میں سے کسی ملک کا  پوتن کا یہ پہلا دورہ ہے۔ منگولیا نے آئی سی سی کے احکامات کو نافذ کرتے ہوئے پوتن کو گرفتار کرنے کے بجائے انہیں گارڈ آف آنر پیش کیا۔ 

یہ بھی پڑھئے:مہاراشٹر میں لاء اینڈ آرڈر کی صورتحال پر تشویش

یوکرین کی وزارت خارجہ نے اس پر سخت برہمی کااظہار کیا ہے۔یوکرین کے ترجمان جورجی تیخی کے مطابق منگولیا کا پوتن کو نہ روکنا بین الاقوامی فوجداری عدالت کی قانونی حیثیت کیلئے  دھچکا ہے۔  انہوں نے کہا کہ کیف منگولیا کو اس کی  سزا  دلانے کیلئے دباؤ ڈالے گا۔اس سے قبل بین الاقوامی فوجداری عدالت نے منگولیا پر زور دیا تھا کہ وہ پوتن کو حراست میں لے۔ بین الاقوامی فوجداری عدالت کے ترجمان فادی عبداللہ کا کہنا ہے کہ منگولیا پر لازم ہے کہ وہ عدالت کے ساتھ تعاون کرے۔منگولیا میں ایمنسٹی انٹرنیشنل  کے ایگزیکٹو ڈائریکٹر  نے بھی پوتن کو ’’مفرور‘‘ قرار دیتے ہوئے ان کی گرفتاری پر زور دیا۔