اقلیتی آبادی والے علاقے میں واقع نیشنل ہائی اسکول کی طرف جانیوالے راستےپر نالی کا پانی بہنے اوراطراف کے گڑھوں کے سبب راہگیروں کا چلنا اورسواریوں کا گزرنا محال تھا۔

 اقلیتی علاقے کا سب سے مصروف ترین نندی روڈ، اجمیرا نگر پٹی اور مسلم نگر علاقے سے متصل نیشنل اردو ہائی سکول کی طرف جانے والے راستے کے بیچ میں نالی کے پائپ سے گندے پانی کے رساؤ سے اسکولی طلباء کے ساتھ ساتھ دینی مدارس کے طلباء، اساتذہ اور علاقے کے لوگوں کو راستے سے گزرنے میں دشواریوں کا سامنا تھا۔ نالی کی مرمت کے لیے پائپ لاکر رکھے گئے تھے لیکن پندرہ دن سے زیادہ کا وقت گزرجانے کے بعد بھی شہری انتظامیہ نالی کی مرمت کے کام میں ہنوز تساہل برت رہا تھا۔ مقامی افراد سے شکایت موصول ہونے پر روزنامہ انقلاب نے مذکورہ اقلیتی علاقے کے مسئلے پر ۲۵؍جون کی اشاعت میں اخبار ھٰذا میں  رپورٹ شائع کی۔ جس کے بعد انتظامیہ غفلت کی نیند سے جاگا اور دو دن بعدہی خستہ حال نالی کی مرمت کا کام شروع کردیا گیا۔ 

۲۵؍جون کو شائع ہونیوالی خبر کاعکس۔ 
 اس مسئلے کےمتعلق انقلاب سے بات چیت کرنے والے سماجی خدمت گار شکیل انصاری، ندیم شیخ کے علاوہ علاقے کے دیگر لوگوں نے کہا کہ ’’ خستہ حال نالی اور مخدوش سڑک کی خبر مع تصویر انقلاب نے شائع کی جس کا اثر یہ ہوا کہ شہری انتظامیہ کی توجہ اس جانب مبذول ہوئی۔ اس خبر کا اثر تھا کہ دو دن بعد ہی نالی کی مرمت کا تعمیراتی کام شروع کردیا گیا اور آس پاس کے گڑھے بھی بھرے جارہے ہیں۔ ‘‘ بتایا گیا کہ دو تین روز میں نالی کی مرمت کا کام مکمل ہوجائے گا۔ ہم سبھی مقامی افراد انقلاب کا شکریہ ادا کرتے ہیں۔ ‘‘