سابق صدر نے ووٹروں  سے کہا کہ آئیے امریکہ کو عبادت کی طرف مائل کریں، میں چاہتا ہوں کہ ’گڈفرائی ڈے‘ اور ’ایسٹر‘پر آپ انجیل ضروری خریدیں۔

امریکہ کے سابق صدر اور صدارتی انتخابات کے لئے ریپبلکن پارٹی کے امیدوار ڈونالڈ ٹرمپ نے انٹر نیٹ سے انجیل فروخت کرنا شروع کر دی ہے۔ `ٹرُتھ سوشل سے جاری کردہ ویڈیو میں ٹرمپ نے اپنے ووٹروں سے انجیل خریدنے کی اپیل کی اور کہا ہے کہ’’گڈفرائی ڈے‘‘اور’’ایسٹر ‘‘تہواروں کی وجہ سے میں آپ سب کو اس مبارک ہفتے کی مبارکباد پیش کرتا اور اپیل کرتا ہوں کہ آئیے امریکہ کو دوبارہ عبادت کی طرف مائل کریں۔ ان تہواروں کے موقع پر میں چاہتا ہوں کہ آپ ایک انجیل ضروری خریدیں۔ ‘‘

یہ بھی پڑھئے: غزہ: اسرائیلی حملوں میں ۶۲؍فلسطینی جاں بحق، بھکمری سے بچےکی موت

ویڈیو میں ٹرمپ نے کہا ہے کہ ’’تمام امریکیوں کے گھروں میں ایک انجیل کی ضرورت ہے اور میرے پاس انجیل کی بہت سی کاپیاں ہیں۔ یہ میری پسندیدہ ترین کتاب ہے۔ انجیل خریدنے کیلئے آپ کی حوصلہ افزائی کرنا میرے لئے باعث فخر ہے۔ ‘‘ واضح رہے کہ ٹرمپ کی ویب سائٹ پر’’گاڈ بلیس دی یو ایس اے‘‘نامی انجیل ۶۰؍امریکی ڈالر میں فروخت کی جا رہی ہے۔ اس نسخے میں   امریکہ کے قیام کی تاریخ کے دستاویز بھی شامل کئے گئے ہیں۔ ٹرمپ اس سے قبل بھی عطیات جمع کرنے کیلئے اسپورٹس شوز اور دیگر مختلف اشیاء فروخت کرچکے ہیں۔