سرزمین مہاراشٹر جلگاؤں  کے فرزند، شاعر، ادیب و صحافی ڈاکٹر محسن جلگانوی کو ریاست تلنگانہ اُردو اکیڈمی کی جانب سےشعر و ادب کے زمرے میں اعلیٰ ترین اعزاز’مولانا ابوالکلام آزاد ایوارڈ‘ سے سرفراز کیا گیا۔ شہر حیدرآباد کے وسیع ترین آدیٹوریم میں منعقدہ ہزاروں شائقین ادب کی موجودگی میں ریاست تلنگانہ کے وزیر محمد اظہر الدین نے تالیوں کی گونج میں یہ ایوارڈ تفویض کرتے ہوئے انہیں مبارک باد پیش کی۔ ڈاکٹر محسن جلگانوی گزشتہ ۶؍ دہائیوں سے شہر حیدرآباد میں مقیم ہیں اور ادب، شاعری و صحافت کے میدان میں منفرد شناخت رکھتے ہیں۔ انہیں اس باوقار ایوارڈ ملنے پر تلنگانہ کے ساتھ ہی مہاراشٹر کے ادبی اور صحافتی حلقوں خوشی کا اظہار کیا جارہا ہے اورانہیں مبارکبادیاں پیش کی جارہی ہیں۔ ایوارڈ کے طور پر محسن جلگانوی کو اردو اکیڈمی کی جانب سے ۲؍ لاکھ ۲۵؍ ہزار روپوں کی خطیر رقم کے چیک کے ساتھ شال، میمنٹو اور سرٹیفکیٹ دیئے گئے۔

ایوارڈ کی مذکورہ تقریب میں مختلف شعبہ حیات میں نمایاں خدمات انجام دینےوالی دیگر شخصیات کو بھی  ایورڈ تفویض کئے گئے۔ ـ خیال رہے کہ محسن جلگانوی کی ادبی خدمات کا دائرہ بہت وسیع ہے۔    روشن دان، سکندرآباد کی ادبی دستاویز،  تھوڑا سا آسماں زمیں پر، شاخ صندل،تجزیاتی مطالعے اورمصاحبے،  اردو ہائیکو میں پیکر تراشی اور سبز سمندر کے نام قابل ذکر ہیں۔