سعودی عرب، متحدہ عرب امارات، قطر، کویت، بحرین اور دیگر خلیجی ممالک میں آج ۳۰؍ روزے پورے ہوئے اور کل یعنی ۲۰؍ مارچ کو عیدالفطر منائی جائے گی، جبکہ ہندوستان، پاکستان، بنگلہ دیش اور برصغیر کے دیگر ممالک میں ۲۱؍ مارچ کو عید ہوگی۔

دنیا بھر میں مسلمانوں کے سب سے بڑے تہوار عیدالفطر کی تاریخ کا باضابطہ اعلان مختلف ممالک میں شروع ہو گیا ہے، جہاں خلیجی ممالک میں شوال کا چاند نظر آنے کے بعد کل یعنی ۲۰؍ مارچ کو عید منانے کا فیصلہ کیا گیا ہے، وہیں برصغیر اور دیگر ایشیائی ممالک میں ۲۱؍ مارچ یعنی سنیچر کو عید منائی جائے گی۔
سعودی عرب میں چاند دیکھنے کی مرکزی کمیٹی نے اعلان کیا ہے کہ شوال ۱۴۴۷؍ کا آغاز جمعہ سے ہوگا۔ اسی اعلان کے ساتھ ہی خلیج کے دیگر ممالک نے بھی سعودی عرب کی پیروی کرتے ہوئے عید کی تاریخ کا اعلان کر دیا ہے۔ ان ممالک میں متحدہ عرب امارات، قطر، کویت اور بحرین شامل ہیں، جہاں مسلمانوں نے ۳۰؍ روزے مکمل کرنے کے بعد عید کی تیاریوں کا آغاز کر دیا ہے۔

یہ بھی پڑھئے: ثبوت کے باوجود پولیس ہجوم کے خلاف کارروائی کرنے میں ناکام رہی: ’محمد‘ دیپک

متحدہ عرب امارات میں سرکاری طور پر عیدالفطر کی تعطیلات کا اعلان بھی کر دیا گیا ہے، جبکہ قطر اور کویت میں بھی عوامی سطح پر خوشی کی لہر دوڑ گئی ہے۔ بحرین میں بھی چاند نظر آنے کی تصدیق کے بعد مساجد اور گھروں میں عید کی تیاریوں کا سلسلہ تیز ہو گیا ہے۔ ان تمام ممالک میں ۲۰؍ مارچ بروز جمعہ عیدالفطر منائی جائے گی۔
خلیجی خطے کے علاوہ ترکی، فلسطین اور شام سمیت مشرق وسطیٰ کے کئی دیگر ممالک بھی سعودی عرب کے اعلان کے مطابق ۲۰؍ مارچ کو عید منائیں گے۔ اردن اور لبنان میں بھی امکان ہے کہ وہ اسی تاریخ پر عمل کریں گے کیونکہ یہ ممالک اکثر سعودی عرب کے ساتھ عید مناتے ہیں۔
جنوب مشرقی ایشیا کے ممالک جیسے انڈونیشیا اور ملائیشیا میں بھی عید کی تاریخ کا اعلان مقامی رویت ہلال اور فلکیاتی حساب کے مطابق کیا جائے گا۔ ان ممالک میں بھی عام طور پر خلیجی ممالک سے ایک دن بعد عید منائی جاتی ہے، اس لیے یہاں ۲۱؍ مارچ کو عید ہونے کا امکان ہے۔

یہ بھی پڑھئے: بنارس میں کشتی پر افطار پارٹی کی پاداش میں ۱۴؍نوجوانوں کی گرفتاری پر تنقیدیں

یورپ اور شمالی امریکہ میں مسلمان کمیونٹیز عام طور پر سعودی عرب یا مقامی اسلامی مراکز کے فیصلوں کے مطابق عید مناتے ہیں۔ برطانیہ، فرانس، جرمنی، کنیڈا اور امریکہ میں بعض کمیونٹیز ۲۰؍ مارچ کو عید منائیں گی، جبکہ کچھ دیگر مقامی رویت کے مطابق ۲۱؍ مارچ کو عید منانے کا اعلان کر سکتی ہیں۔ اس طرح مغربی ممالک میں عید کی تاریخ مختلف کمیونٹیز کے درمیان ایک دن کے فرق سے منائی جا سکتی ہے۔
افریقی ممالک میں بھی عید کی تاریخ کا انحصار مقامی رویت ہلال پر ہوتا ہے۔ مصر، سوڈان، مراکش، نائیجیریا اور جنوبی افریقہ میں بعض ممالک سعودی عرب کے ساتھ عید مناتے ہیں جبکہ کچھ ایک دن بعد عید مناتے ہیں۔ اس سال مصر اور سوڈان سمیت کئی عرب افریقی ممالک میں ۲۰؍ مارچ کو عید منائے جانے کا امکان ہے، جبکہ مراکش میں اکثر ایک دن تاخیر سے عید ہوتی ہے، اس لیے وہاں ۲۱؍ مارچ کو عید متوقع ہے۔