تلنگانہ کے وزیر تارک راما رائو کے مطابق نوٹ بندی نے ہی معیشت کو تباہ کیا ہے اور بزنس کو برباد کیا ہے
EPAPER
Updated: November 26, 2020, 9:06 AM IST | Agency | Hyderabad
تلنگانہ کے وزیر تارک راما رائو کے مطابق نوٹ بندی نے ہی معیشت کو تباہ کیا ہے اور بزنس کو برباد کیا ہے
تلنگانہ کے ریاستی وزیر برائے انفارمیشن ٹکنالوجی اور حکمراں جماعت ٹی آرایس کے کارگزار صدر تارک راما رائو نے مرکز کی بی جے پی حکومت پر شدید نکتہ چینی کے سلسلہ کو جاری رکھتے ہوئے کہا کہ ملک کی معیشت کور ونا سے پہلے ہی برے حال ہی میں تھی کیوں کہ مودی سرکار نے نوٹ بندی کرکے اس کی کمر توڑ دی تھی اور آج تک اس کی حالت بہتر نہیں ہوئی ہے۔ ۔ انہوں نے تاجروں کے ساتھ ’ہوشیار حیدرآباد‘ پروگرام سے خطاب کرتے ہوئے کہاکہ معاشی سست روی کا آغاز لاک ڈائون کے اعلان سے بہت پہلے ہی ہوگیا تھا۔لاک ڈائون سے قبل بھی مسلسل آٹھ سہ ماہی سست روی درج کی گئی جس کے نتیجہ میں معاشی انحطاط درج کیاگیا۔
تارک راما رائو کے مطابق کورونا کے بحران سے قبل نوٹ بندی نے معیشت کو تباہ کیا تھا۔ اس کا اثر چھوٹے،درمیانی اور متوسط درجہ کے تاجروں پر پڑا اور اس کے نتیجے میں یہ معاشی سست روی درج کی گئی۔ کاروبار نوٹ بندی کی وجہ سے شدید طورپر متاثر ہوا اور لاک ڈائون کی وجہ سے اس میں مزید اضافہ ہوگیا۔انہوں نے وہاں موجود شرکاء سے سوال بھی کیا کہ کتنے افراد کو این ڈی اے کی جانب سے اعلان کردہ۲۰؍لاکھ کروڑ روپے کے مالی پیکیج سے فائدہ پہنچا۔اس کے جواب میں ایک بھی شخص نے ہاں نہیں کہا ۔ اس پر تارک راما رائو نے کہا کہ ملک کی معیشت کو چلاناہنسی کھیل نہیں ہے لیکن مودی سرکار اتنی غیر سنجیدگی کے ساتھ معیشت چلانے میں مصروف ہے کہ ہمیں ملک کی معاشی حالت پر افسوس ہو رہا ہے۔ نوٹ بندی جیسا قدم اسی غیر سنجیدگی کا ایک واضح نمونہ تھا کہ کسی ملک کی معیشت کو تباہ ایسے بھی کیا جاسکتا ہے۔