وزیر خارجہ ایس جے شنکر بدھ کو بھوٹان پہنچ گئے۔ ان کا یہ سرکاری دورہ پڑوسی ملک کے ساتھ ہندوستان کے دیرینہ دوستانہ اور باہمی تعاون کے تعلقات کو مزید مضبوط بنانے کے مقصد سے ہو رہا ہے۔

جے شنکر۱۶؍سے ۱۸؍ستمبر تک بھوٹان کے دورے پر ہیں۔ ان کی آمد پر بھوٹان کے وزیر خارجہ لائینپو ڈی این دھنگیل نے ان کا استقبال کیا۔جے شنکر نے ایکس پر پوسٹ میں کہا، ’’آج پارو پہنچ کر بہت خوشی ہوئی۔

 

 

بھوٹان کے وزیر خارجہ لائینپو ڈی این دھنگیل کا پرتپاک استقبال کرنے پر شکریہ۔ ہمارے منفرد دوستانہ تعلقات کو آگے بڑھانے کیلئے ہونے والی ملاقاتوں کا منتظر ہوں۔‘‘وزارت خارجہ کے مطابق جے شنکر  اپنے دورے  میں دھنگیل کے ساتھ دوطرفہ مذاکرات کریں گے۔ وہ بھوٹان کے بادشاہ جگمے کھیسر نامگیال وانگچک سے شاہی ملاقات بھی کریں گے اور وزیر اعظم شیرنگ توبگے سے بھی ملاقات کریں گے۔وزارت خارجہ نے کہا کہ یہ دورہ ہندوستان اور بھوٹان کے درمیان باقاعدگی سے ہونے والے اعلیٰ سطحی تبادلوں کی روایت کے عین مطابق ہے اور اس کا مقصد دونوں ممالک کے درمیان قریبی دوستانہ اور باہمی تعاون کے تعلقات کو مزید مستحکم کرنا ہے۔یادرہےکہ ہندوستان اور بھوٹان نے سفارتی، ترقیاتی اور عوام پر مرکوز اقدامات کے ساتھ ساتھ مختلف شعبوں میں تعاون کو مسلسل وسعت دی ہے۔