پانی کی فراہمی، نکاسی آب، بجلی، صحت اور زرعی سرگرمیوں سے متعلق بنیادی ڈھانچے کے منصوبوں میں مدد کی جائے گی۔
EPAPER
Updated: November 19, 2026, 2:01 PM IST | Agency | Paris
پانی کی فراہمی، نکاسی آب، بجلی، صحت اور زرعی سرگرمیوں سے متعلق بنیادی ڈھانچے کے منصوبوں میں مدد کی جائے گی۔
فرانس نے فلسطینی اتھاریٹی کے ساتھ ایک معاہدے کے تحت مقبوضہ مغربی کنارے کے پسماندہ فلسطینی دیہات میں بنیادی سہولتوں کی فراہمی کے لئے۵۵؍ لاکھ ڈالر کی مالی امداد دینے کا وعدہ کیا ہے۔ اس رقم سے پانی کی فراہمی، نکاسی آب، بجلی، صحت اور زرعی سرگرمیوں سے متعلق بنیادی ڈھانچے کے منصوبوں میں مدد فراہم کی جائے گی۔
یہ بھی پڑھئے: غزہ میں بارش کے سبب خیموں میں رہنے والے پناہ گزینوں کو دشواری
معاہدے پر یروشلم میں فرانس کے قونصل جنرل الیکسس لی کور گرانڈمیشن اور فلسطینی اتھاریٹی کے وزیر خزانہ اسٹیفن سلامہ نے دستخط کئے۔ فلسطینی خبر رساں ادارے کے مطابق امکان ہے کہ اگلے سال کے اوائل میں یہ فنڈز استعمال کئے جائیں گے جس سے تقریباً۲۲؍ ہزار فلسطینیوں کو بنیادی سہولتیں میسر آسکیں گی۔ امدادی منصوبوں میں طوباس اور سلفیت کے علاقے شامل ہوں گے۔
یہ دیہات مغربی کنارے کے ایریا سی میں واقع ہیں جو مقبوضہ مغربی کنارے کے تقریباً۶۰؍ فیصد رقبے پر مشتمل ہے۔ یہ علاقے۱۹۶۷ءسے اسرائیلی قبضے میں ہیں۔ فلسطینیوں کو یہاں بنیادی سہولتوں کی فراہمی میں مشکلات کا سامنا ہے جبکہ علاقے میں یہودی آباد کاروں کی جانب سے فلسطینیوں پر حملوں کے واقعات بھی پیش آتے رہتے ہیں۔فرانس کے قونصل جنرل الیکسس لی کور گرانڈمیشن نے کہا کہ فرانس ان علاقوں میں فلسطینیوں کے حالات بہتر بنانے کے اقدامات کی حمایت کرتا ہے۔ فرانس نے ستمبر۲۰۲۵ء میں فلسطینی ریاست کو تسلیم کیا تھا اور متعدد پرتشدد یہودی آباد کاروں پر پابندیاں بھی عائد کی ہیں۔