اسرائیلی مظالم کے باوجود اُس کی حمایت پر رکن ِ کانگریس نےصدر کو آڑے ہاتھوں لیا۔

غزہ پر اسرائیل کی وحشیانہ بمباری ، ۲؍ ہزار سے زائد بچوں کی شہادت،  زائد از ۵؍ ہزار ہلاکتوں اوران میں بھی ۷۰؍ فیصد بچوں اور خواتین کی اموات کے بعد بھی  امریکی صدر جو بائیڈن کی جانب سے اسرائیل کی ہی حمایت کرنے پر امریکی کانگریس کی مسلم  رُکن  الہان عمر نے اُن کی انسانی ہمدردی پر سوال اٹھایا۔
 واشنگٹن میں ایک پریس کانفرنس میں الہان عمر نے امریکی صدر  جوبائیڈن کی حکمت عملی پر  شدید غصے کا اظہار کرتے ہوئے سوال کیا کہ حماس اوراسرائیل میں جاری جنگ پر آپ کی انسانیت کہاں ہے؟ آپ کیسے ایک ہی جانب کا ظلم دیکھ کر اسے غلط کہہ سکتے ہیں؟  آپ کیسے لاشوں کے ڈھیر پر اپنی دوستی کو فروغ دے سکتے ہیں۔ الہان عمر نے  بتایاکہ ’’اسرائیل نے حالیہ۱۰؍  دنوں میں غزہ پر اتنی بمباری کی ہے جتنی  امریکہ نے پورے ایک سال میں افغانستان میں کی تھی۔‘‘ انہوں نے پوچھا کہ ’’اب آپ کی لوگوں کیلئے ہمدردی کہاں  چلی گئی؟ اب آپ کی انسانیت کہاں ہے ؟ ‘‘مسلم رکن ِ کانگریس کا مزید کہنا تھا کہ ہمارے پاس ایک ایسا صدر ہے جو یرغمالوں کو رہا کرنے کی بات کر رہا ہے، جو امریکی شہریوں کو اسرائیل سے نکالنے کی بات کر رہا ہے لیکن خود کو یہ کہنے پر آمادہ نہیں کرسکا کہ میں ان سیکڑوں، ہزاروں امریکیوں کو بچانے کیلئے کام کرنا چاہتا ہوں جو غزہ میں پھنسے ہوئے ہیں۔