جی ۷؍ سربراہی اجلاس سے قبل وزیر اعظم نریندر مودی کی فرانس آمد ایک منفرد ثقافتی اشارے کے ساتھ نمایاں ہوئی، جب فرانسیسی صدر ایمانوئل میکرون نے ان کے استقبال کے لیے بالی ووڈ سے متاثر ایک ویڈیو سوشل میڈیا پر شیئر کیا۔ ویڈیو میں رنویر سنگھ کی فلم ’’دھرندھر‘‘ کے مقبول گانے ’’آری آری‘‘ کا استعمال کیا گیا، جس نے سوشل میڈیا پر تیزی سے مقبولیت حاصل کی۔

جی ۷؍ سربراہی اجلاس سے قبل وزیر اعظم نریندر مودی کے فرانس کے دورے نے ایک دلچسپ ثقافتی رنگ اختیار کر لیا جب فرانسیسی صدر ایمانوئل میکرون نے اپنے ہندوستانی ہم منصب کے استقبال کے لیے بالی ووڈ سے متاثر ایک خصوصی ویڈیو جاری کیا، جس نے سوشل میڈیا پر خاصی توجہ حاصل کر لی۔ صدر میکرون نے اپنے سرکاری سوشل میڈیا پلیٹ فارمز ایکس اور انسٹاگرام پر ایک ویڈیو شیئر کیا، جس میں وزیر اعظم مودی کے دورۂ فرانس کی جھلکیاں دکھائی گئیں جبکہ پس منظر میں رنویر سنگھ کی فلم ’’دھرندھر‘‘ کے مقبول گیت ’’آری آری‘‘ کی دھن سنائی دے رہی تھی۔ ویڈیو نے سفارتی تقریب کو ایک منفرد ثقافتی انداز بخشا اور دونوں ممالک کے درمیان بڑھتی ہوئی قربت کو اجاگر کیا۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Emmanuel Macron (@emmanuelmacron)

ویڈیو سامنے آنے کے بعد سوشل میڈیا پر صارفین نے اس پر بھرپور ردعمل ظاہر کیا۔ متعدد صارفین نے میکرون کے گانے کے انتخاب کو ہندوستانی ثقافت سے ان کی واقفیت اور دلچسپی کا اظہار قرار دیا۔ ایک صارف نے تبصرہ کیا کہ ’’صدر میکرون ہندوستان کو واقعی اچھی طرح جانتے ہیں، ’’دھرندھر‘‘ کا گانا اس کا ثبوت ہے۔‘‘ جبکہ ایک اور صارف نے لکھا، ’’یہ ویڈیو انٹرنیٹ پر تہلکہ مچا دے گا۔‘‘

یاد رہے کہ وزیر اعظم نریندر مودی سنیچر کوفرانس کے شہر نیس پہنچے، جہاں سے ان کے دو ملکی دورے کے فرانسیسی مرحلے کا آغاز ہوا۔ دورے کے دوران مودی اور میکرون کے درمیان دو طرفہ مذاکرات متوقع ہیں، جن میں دفاع، تجارت، توانائی، ٹیکنالوجی، خلائی تعاون اور عالمی امور سمیت مختلف موضوعات پر تبادلہ خیال کیا جائے گا۔ دونوں لیڈر ہندوستان اور فرانس کے درمیان جاری خصوصی عالمی اسٹریٹجک شراکت داری کا جائزہ بھی لیں گے اور علاقائی و بین الاقوامی مسائل پر مشترکہ موقف کو مزید مضبوط بنانے کی کوشش کریں گے۔

Thank you India! 🇮🇳🇫🇷 pic.twitter.com/vDJ9IH2hZy

— Emmanuel Macron (@EmmanuelMacron) February 19, 2026

یہ پہلا موقع نہیں جب فرانسیسی صدر نے اپنے سرکاری سوشل میڈیا پیغامات میں بالی ووڈ موسیقی کا استعمال کیا ہو۔ رواں سال فروری میں اپنے سرکاری دورۂ ہندوستان کے اختتام پر بھی میکرون نے ایک الوداعی ویڈیو شیئر کی تھی، جس میں فلم ’’دھرندھر‘‘ کا مقبول گانا ’’نا دے دل پردیسی نو‘‘ شامل تھا۔ ۲۰؍ فروری ۲۰۲۶ء کو اپنے دورۂ ہندوستان کے اختتام پر میکرون نے سوشل میڈیا پر ’’شکریہ ہندوستان‘‘ کے عنوان سے ایک ویڈیو جاری کیا تھا، جس میں دونوں ممالک کے درمیان دوستی، ثقافتی روابط اور عوامی سطح پر بڑھتی قربت کو نمایاں کیا گیا تھا۔

حالیہ برسوں میں ہندوستان اور فرانس کے تعلقات نہ صرف دفاعی اور اقتصادی شعبوں میں مضبوط ہوئے ہیں بلکہ ثقافتی اور عوامی سفارت کاری کے میدان میں بھی نئی جہتیں اختیار کر رہے ہیں۔ میکرون کی جانب سے بالی ووڈ موسیقی کا مسلسل استعمال اسی رجحان کی عکاسی کرتا ہے۔ جی ۷؍ اجلاس کے موقع پر مودی اور میکرون کی ملاقات کو عالمی سفارتی حلقوں میں بھی اہمیت دی جا رہی ہے، کیونکہ دونوں ممالک عالمی سلامتی، یوکرین بحران، بحر ہند کے خطے اور نئی اقتصادی شراکت داریوں کے حوالے سے قریبی تعاون جاری رکھے ہوئے ہیں۔