ملک کے معروف ارب پتی صنعتکار اور اڈانی گروپ کے چیئرمین گوتم اڈانی اب ایشیا کے سب سے امیر شخص بن گئے ہیں۔ انہوں نے مکیش امبانی کو پیچھے چھوڑ دیا ہے۔ بلومبرگ بلینیئرز انڈیکس کے تازہ ترین اعداد و شمار میں یہ بات سامنے آئی ہے۔

ملک کے معروف ارب پتی صنعتکار اور اڈانی گروپ کے چیئرمین گوتم اڈانی اب ایشیا کے سب سے امیر شخص بن گئے ہیں۔ انہوں نے مکیش امبانی کو پیچھے چھوڑ دیا ہے۔ بلومبرگ بلینیئرز انڈیکس کے تازہ ترین اعداد و شمار میں یہ بات سامنے آئی ہے۔ گوتم اڈانی کی کل دولت بڑھ کر ۲ء۹۲؍ ارب ڈالرس ہو گئی ہے، جس کے ساتھ وہ عالمی سطح پر۱۹؍ویں نمبر پر پہنچ گئے ہیں  جبکہ مکیش امبانی کی دولت ۸ء۹۰؍ ارب ڈالر رہ گئی ہے اور وہ ۲۰؍ویں نمبر پر کھسک گئے ہیں۔
اوپر کی سطح پر ہونے والی اس تبدیلی سے جیو پولیٹیکل تناؤ اور بازار میں جاری اتار چڑھاؤ کے درمیان ۲۰۲۶ء میں عالمی امیروں کی درجہ بندی میں عدم استحکام ظاہر ہوتا ہے۔گھریلو شیئر بازار میں جمعرات کے سیشن کے دوران اڈانی گروپ کے شیئرز میں زبردست تیزی دیکھی گئی، جس نے بینچ مارک انڈیکس کو بھی پیچھے چھوڑ دیا۔ اسی وجہ سے ایک ہی دن میں گوتم اڈانی کی دولت میں تقریباً ۵۶ء۳؍ ارب ڈالر کا اضافہ ہوا۔
عالمی سطح پر ٹیسلا کے سی ای او ایلون مسک اب بھی ۶۵۶؍ ارب ڈالر کی دولت کے ساتھ پہلے نمبر پر قائم ہیں۔ ان کے بعد گوگل کے شریک بانی لیری پیج ۲۸۶؍ ارب ڈالر کے ساتھ دوسرے نمبر پر ہیں۔ٹاپ۱۰؍ میں شامل دیگر ناموں میں امیزون کے جیف بیزوس، میٹا کے مارک زکربرگ، اوریکل کے لیری ایلیسن، ڈیل ٹیکنالوجیز کے مائیکل ڈیل، این ویڈیا کے جینسن ہوانگ اور ایل وی ایم ایچ کے سی ای او برنارڈ آرنولٹ شامل ہیں۔

یہ بھی پڑھئے:’’سپر ماریو گلیکسی مووی‘‘ کا ۱۲؍ دن میں ۶۲۹؍ ملین ڈالر کا بزنس

قابل غور بات یہ ہے کہ ۲۰۲۶ء میں اب تک دنیا کے ٹاپ ۲۰؍ امیروں میں سے ۷؍کی دولت میں کمی آئی ہے۔ ان میں برنارڈ آرنالٹ کو سب سے زیادہ نقصان ہوا ہے، جن کی دولت ۴۴؍ ارب ڈالر تک کم ہو گئی ہے۔اس کے علاوہ اسٹیو بالمر، بل گیٹس، وارن بفیٹ اور امانسیو اورٹیگا جیسے ارب پتیوں کی دولت میں بھی کمی درج کی گئی ہے۔علاقائی تجزیے سے ظاہر ہوتا ہے کہ ٹیکنالوجی سیکٹر کے ارب پتیوں کا غلبہ اب بھی برقرار ہے، جبکہ انڈسٹریل، انرجی اور ریٹیل سیکٹر میں دولت میں زیادہ اتار چڑھاؤ دیکھا گیا ہے۔

یہ بھی پڑھئے:ٹرمپ نے ایران جنگ کو ’’چھوٹا سا رخ بدلنا‘‘ قرار دیا، جلد خاتمے کا دعویٰ

دیگر ہندوستانی ارب پتیوں میں لکشمی متل ۹ء۳۶؍ ارب ڈالر کی دولت کے ساتھ ۶۲؍ویں نمبر پر ہیں۔ شیوا ناڈر  ۵ء۳۳؍ارب ڈالر کے ساتھ ۷۰؍ویں نمبر پر رہے، جبکہ شاپور مستری اور ان کا خاندان ۲ء۳۳؍ ارب ڈالر کے ساتھ ۷۱؍ویں نمبر پر ہیں۔ساوتری جندل ۷ء۳۲؍ ارب ڈالر کی دولت کے ساتھ ۷۳؍ویں نمبر پر ہیں۔ اس کے علاوہ سنیل متل، عظیم پریم جی، کمار منگلم برلا اور رادھا کشور دامانی جیسے نام بھی اس فہرست میں شامل ہیں۔  اس دوران اڈانی گروپ کی کمپنیوں جیسے اڈانی ٹوٹل گیس، اڈانی پورٹس اور اڈانی پاور کے شیئرز میں جمعہ کو انٹرا ڈے ٹریڈنگ کے دوران ۳؍ فیصد تک کی تیزی دیکھی گئی۔