مہاراشٹر ہاؤسنگ ایریا ڈیولپمنٹ اتھاریٹی(مہاڈا) نے اپنے پہلے ٹاؤن شپ ہاؤسنگ پروجیکٹ کیلئے ماسٹر پلان تیار کیا ہے۔نوبھارت ٹائمس کی ایک خبر کے مطابق ۱۴۳؍ ایکڑ پر پھیلے موتی لال نگر  کے ری ڈیولپمنٹ کا منصوبہ مہاڈا کی طرف سے اگلے دو سے چار دنوں میں عام کیا جائے گا۔ مہاڈاجس نے پہلے چھوٹے پروجیکٹوں پر توجہ مرکوز کی تھی، اب ممبئی میں بڑے اور جدید پروجیکٹ شروع کر ے جارہا ہے۔ مہاڈاکا پہلا ٹاؤن شپ پروجیکٹ موتی لال نگر، گوریگاؤں میں شروع ہونے والا ہے۔ اس پروجیکٹ کے تحت فی الحال۲۳۰؍ مربع فٹ میں رہنے والے خاندانوں کو دوبارہ تعمیراتی منصوبے کے تحت۱۶۰۰؍ مربع فٹ مکان فراہم کیا جائے گا۔ مہاڈا کے نائب صدر سنجیو جیسوال کے مطابق مہاڈا اب سستی رہائش فراہم کرنے تک محدود نہیں ہے ۔ یہ تیزی سے جدید، مکمل طور پر لیس رہائش فراہم کرنے والے کے طور پر تیار ہو رہا ہے۔

 

 

موتی لال نگر ری ڈیولپمنٹ پروجیکٹ اس کی ایک بڑی اور نمایاں مثال ہے کہ پچھلے کچھ برسوں میں مہاڈا کی پالیسیوں میں ایک بڑی اور بنیادی تبدیلی آئی ہے۔ مہاڈا اب چھوٹی سوسائٹیوں میں تعمیراتی اور ری ڈیولپمنٹ  پر توجہ دینے کے ساتھ ہی  بڑے پروجیکٹوں پر بھی آگے بڑھ رہا ہے۔ 

موتی لال نگر کے علاوہ ایس وی پی نگر، جی ٹی بی نگر، ابھیودے نگر،کماٹی پورہ، آدرش نگر اور آرام نگر جیسی بڑی کالونیوں میں بھی بڑے ری ڈیولپمنٹ کا منصوبہ ہے ا وران میں سے کئی پر کام شروع بھی کردیا گیا ہے۔

 

 

یہ منصوبہ نہ صرف مکینوں کے لیے رہائش فراہم کرے گا بلکہ کھیل کے بہتر میدان، سماجی و ثقافتی مراکز اور جدید کاروباری مراکز سمیت دیگر سہولیات بھی فراہم کرے گا۔ مہاڈا کے نائب صدر کے مطابق یہ پروجیکٹ سی اینڈ ڈی اے ماڈل کے تحت تعمیر کئے جائیں گے۔ مہاڈا پروجیکٹ کی مکمل ملکیت اور کنٹرول اپنے پاس رکھے گا۔ ایجنسی کے طور پرمہاڈا بھی پروجیکٹ کے معیار اور بروقت تکمیل کو یقینی بنانے کے لیے ذمہ دار ہوگا۔