قانون کے مطابق میونسپل اہلکار روزانہ سورج نکلنے پر مسجد کا صدر دروازہ کھولیں گے اور عشا سے قبل بند کردیں گے، نماز بدستور جاری رہے گی۔

جلگائوں ضلع کے ایرنڈول میں واقع جامع مسجد کی چابیاں عدالت نے مقامی انتظامیہ کے سپرد کرنے کا حکم سنایا ہے جسکے خلاف مسجد کے ذمہ داران نے سپریم کورٹ سے رجوع کرنے کا فیصلہ کیا ہے لیکن مسجد کے ٹرسٹیان کا کہنا ہے کہ عدالت کے حکم سے مسجد میں جاری نماز اور دیگر عبادتوں پر کوئی اثر نہیں پڑے گا وہ حسب حال جاری رہیں گی۔ البتہ ٹرسٹ کے سپریم کورٹ سے رجوع کا مقصد اتنا ہے کہ اگر چابیاں مسجد انتظامیہ کے پاس رہیں تو بہتر ہے جیسا کہ اب تک کا معمول تھا۔ 
یاد رہے کہ ۴؍ اپریل ۲۰۲۴ء کو بامبے ہائی کورٹ کی اورنگ آباد بینچ نے ایرنڈول جامع مسجد کے تنازع میں حتمی فیصلہ سناتے ہوئے مسجد کے صدر دروازے کی چابیاں میونسپل کارپوریشن کے حوالے کرنے کا حکم دیا تھا۔ عدالت کے فیصلے کی کاپی اب تک جاری نہیں کی گئی ہے البتہ انقلاب نے چیف ٹرسٹی الطاف خان اور ایڈوکیٹ ایس ایس قاضی سے گفتگو کی تو معلوم ہواکہ ہائی کورٹ کی اورنگ آباد بنچ نے مسجد کے صدر دروازے کی چابی ۱۳؍ اپریل تک مقامی بلدیہ کے حوالے کرنے کیلئے کہاہے لیکن مسجد کی چابی انتظامیہ کے حوالے کرنے سے مسجد میں کی جانے والی عبادت میں کوئی فرق نہیں آئے گا اور نہ ہی اس پر کسی بھی قسم کی پابندی عائد کی گئی ہے۔ یہاں معمول کے مطابق ۵؍ وقت کی نماز با جماعت ادا کی جائے گی، البتہ نماز فجر اور عشاء کی ادائیگی کیلئے مصلیان اور امام و موذن کا مسجد میں داخلہ عقبی دروازے سے ہوگاجو کہ ابھی تک کا معمول ہے۔ الطاف خان نے واضح کیا کہ چابی انتظامیہ کے حوالے کرنے پرکوئی شر پسند ی نہ ہو یا مسجد میں عبادت میں کوئی فرق نہ پڑےاسلئےسپریم کورٹ سے رجوع کیا جارہا ہے۔ 
 قانون کے مطابق میونسپل کارپوریشن کے اہلکار روزانہ سورج نکلنے کے بعد مسجد کا صدر دروازہ کھول دیں گے۔ اور عشا ء کی نماز سے قبل اسے بند کر دیا جائے گا۔ یاد رہے کہ ۱۹۹۵ء میں یہاں فساد ہوا تھا جس میں شر پسندوں نے مسجد کے دروازے میں آگ لگا دی تھی جسکے بعد عارضی ڈیویژنل مجسٹریٹ نے چابیاں کارپوریشن انتظامیہ کے حوالے کرنے کا حکم دیا تھا۔ اسی حکمنانے کے مطابق عدالت نے چابیاں انتظامیہ کو سونپنے کا حکم دیا ہے۔