راج بھون میں گورنر سی پی رادھا کرشنن نے انہیں عہدہ اور رازداری کا حلف دلایا، ہیمنت سورین نے کہا کہ اب تک جو کام کیا ہے عوامی مفاد میں کیا ہے۔

جھارکھنڈ مکتی مورچہ کے کارگزار صدر ہیمنت سورین نے ایک بار پھر وزیر اعلیٰ کے عہدے کا حلف لیا ہے۔ ہیمنت سورین نے۱۵۴؍ دنوں کے بعد ایک بار پھر یہ ذمہ داری سنبھالی ہے۔ جنوری میںانہیں زمین گھوٹالے کے کیس میں گرفتار کیا گیاتھا۔ گزشتہ دنوں وہ ضمانت رہا ہوئے اورانہوں نے جمعرات کی شام دوبارہ ریاست کےو زیر اعلیٰ حلف  لیا۔ راج بھون میں منعقدہ ایک سادہ تقریب میں گورنر سی پی رادھا کرشنن نے انہیں عہدہ اور رازداری کا حلف دلایا۔ ہیمنت سورین تیسری بار جھارکھنڈ کے وزیر اعلیٰ بنے ہیں۔ بدھ کو چمپئی سورین نے وزیراعلیٰ کے عہدے سے استعفیٰ دے دیا تھا۔
ذرائع کے مطابق کابینہ کے باقی وزراء ۷؍ جولائی یا کسی اور دن حلف اٹھائیں گے۔ کچھ ذرائع کے مطابق دیگر وزیروں کی حلف برداری کی تقریب اتوار کو ہوگی۔ اس سے قبل یہ بھی کہا جارہا تھا کہ ہیمنت سورین بھی اتوار کو ہی  حلف لیں گے۔ ہیمنت سورین کی حلف برداری کی  تقریب میں مستعفی ہونے والے وزیر اعلیٰ چمپئی سورین، جھارکھنڈ کانگریس کے انچارج غلام احمد میر اورجھارکھنڈ میں انڈیا بلاک کے سرکردہ لیڈران موجود تھے۔سورین کو امسال۳۱؍ جنوری کو ای ڈی نے گرفتار کیا تھا اور اس سے عین قبل انہوں نے وزیراعلیٰ کے عہدے سے استعفیٰ دے دیا تھا۔ ان کی جگہ ان کی کابینہ کے وزیر چمپئی سورین نے۲؍ فروری کو وزیر اعلیٰ کا عہدہ سنبھالا تھا۔ 
حلف لینے کے بعدوزیر اعلیٰ ہیمنت سورین نے کہا کہ ’’۲۰۱۹ء سے لےکر اب تک مہا گٹھ بندھن حکومت نے ہر وہ کام کیا ہے جو عوام کے مفاد میں ہو۔ سیاسی نشیب وفراز کے دوران چمپئی سورین نے یہ ذمہ داری سنبھالی کیونکہ میں جیل میں تھا، اب عدالت کے حکم پر میں باہر آسکا ہوں۔‘‘
 ہیمنت سورین کی اہلیہ کلپنا سورین نے جنہیں اس سے قبل ریاست کی ممکنہ وزیر اعلیٰ کے طوردیکھا جارہا تھا، اپنے شوہر  کے تعلق سے کہا ہےکہ ’’وہ عوام کیلئے کام کرنا جاری رکھیں گےجیسا وہ ہمیشہ  سے کرتے آئےہیں۔‘‘ کلپنا سورین نے اس موقع پرپارٹی کو بھی آگاہ کیا کہ اسمبلی انتخابات سے پہلےاسے کئی طرح کے چیلنجوں کا سامنا کرنا پڑے گاجنہیں چند مہینے ہی رہ گئے ہیں۔بتا دیں کہ ہیمنت سورین نے راج بھون میں شام میں ۵؍ بجے حلف لیا۔ حلف برداری سے قبل ہیمنت سورین نے اپنے والد اور سابق وزیر اعلیٰ شیبو سورین سے ملاقات کی اوراس ملاقات کی سوشل میڈیا پربھی شیئر کی۔ 
۲۸؍جون کو ہائی کورٹ سے ضمانت ملنے کے بعد ہیمنت سورین جیل سے باہر آئے اور ساتویں دن ہی انہوں نے ایک بار پھر وزیر اعلیٰ کا عہدہ سنبھال لیا۔ بطور وزیر اعلیٰ ان کی یہ تیسری میعاد ہوگی۔ اس سے پہلے۲۹؍ دسمبر ۲۰۱۹ء کو انہوں نے اسمبلی انتخابات میں جے ایم ایم-کانگریس-آر جے ڈی اتحاد کی جیت کے بعد دوسری بار وزیر اعلیٰ کے عہدے کا حلف لیا تھا۔ وہ پہلی بار  ۱۳؍ جولائی ۲۰۱۳ء کو وزیر اعلیٰ بنے تھے۔ حلف لینے سے تقریباً ۲؍ گھنٹے قبل سورین نے۳۱؍ جنوری کی ایک تصویر سوشل میڈیا ایکس پر شیئر کی جس میں وہ گورنر کو اپنا استعفیٰ پیش کر رہے تھے۔ اس تصویر کے ساتھ سورین نے لکھا کہ ہر ناانصافی کو معلوم ہے کہ ایک دن اسے انصاف حاصل ہوگا۔ جئے جھارکھنڈ۔
 قابل ذکر ہے کہ جھارکھنڈ کے سابق وزیر اعلی چمپئی سورین نے بدھ۳؍ جولائی کوراج بھون پہنچ کر گورنر سی پی رادھا کرشنن کو اپنا استعفیٰ پیش کیا تھا۔ اس کے ساتھ ہی حکمراں اتحاد کے نئے لیڈر ہیمنت سورین نے ۴۵؍ اراکین اسمبلی کی جانب سے گورنر کو حمایت کا ایک خط دیا تھا، جس میں نئی ​​حکومت کا دعویٰ پیش کیا گیا تھا۔ اس کے بعد جمعرات کی دوپہر تقریباً ڈیڑھ بجےگورنر سی پی رادھا کرشنن نے ہیمنت سورین کو وزیر اعلیٰ مقرر کیا اور انہیں حکومت بنانے کی دعوت دی۔