علماء اور عقیدت مندوں نے شدید مذمت کی۔ حکومت ضلع میں مدارس اور آستانوں کیخلاف سرگرم ، انہدامی کارروائیاں۔

ضلع شراوستی کے ہیڈکوارٹر بھنگا کے تحت بھنگا -سرسیا روڈ پر بھنگا جنگل سے متصل محکمہ جنگلات کے دفتر سامنے سیکڑوں سال سے واقع آستانہ حضرت بابا عبدالحئی شاہؒ کوضلع انتظامیہ نے پی اے سی اور ایس ایس بی اہلکاروں کی موجودگی میں بلڈوزر چلواکر شہید کرا دیا جس کی جانکاری ہونےپر علماء  اوارعقیدتمندوں میںکافی ناراضگی پائی جارہی ہے۔
 واضح ہوکہ ضلع شراوستی میںسپریم کورٹ کی ہدایات کو بالائے طاق رکھتے ہوئے مختلف مدارس کو غیر مجازی اور آستانوںو عیدگاہوں کو تجاوزات کے دائرے میں بتاکر بلڈوزر کی کارروائی کا سلسلہ رکنے کا نام نہیں لے رہا ہے۔ ضلع انتظامیہ پولیس فورس ،پی اے سی اور ایس ایس بی کی موجودگی میں مدرسوں  اور آستانوں کو بلڈوزر کے ذریعہ مسمار کرا رہا ہے ۔
  اس سلسلے میں شراوستی کے ہیڈکوارٹر بھنگا میں بھنگا-سرسیا روڈ پر دہانہ میں واقع محکمہ جنگلات کے دفتر کے سامنے ایک اراضی (گاٹا نمبر۱۲۱، رقبہ ۰ء۱۴۲۰؍ہیکٹیئر) لکڑی کے ذخیرہ کیلئے مختص ہے۔ مذکورہ جگہ پر کچھ افراد نے ناجائز قبضہ کر کے عارضی اور مستقل تعمیراتی سرگرمیاں شروع کر دی تھیں جسے میونسپل بورڈ بھنگا نے روک دیا اور ناجائز قبضے ہٹانے کیلئے یکے بعد دیگرے متعدد نوٹس متعلقہ افراد کو بھجوائے لیکن ان کی جانب سے تجاوزات نہیں ہٹائی گئیں۔ ضلع انتظامیہ نے اس پر سنجیدگی  کا مظاہرہ کیا اور میونسپل بورڈ اور محکمہ ریونیو کے اہلکاروں کی مشترکہ ٹیم نے انسداد تجاوزات مہم کا آغاز کیا۔ اس مہم کے دوران ۲۹؍جولائی کو صبح نمودار ہونے سے قبل ۳؍بجے میونسپل بورڈ، پولیس فورس اور محکمہ ریو ینیو کی موجودگی میں مذکورہ گاٹا نمبر کی تمام غیر قانونی تعمیرات کو ۱۰؍بلڈوزر چلا کر مسمار کر دیا گیا۔اس دوران سیکڑوں سال پرانا حضرت بابا عبدالحئی شاہ ؒ کا مزارپر بھی بلڈوزر چلواکر مسمار کرا دیا گیا۔ مزار کے انہدام سے عقیدتمندوں کے جذبات کو کافی ٹھیس پہنچی ہے ۔مذکورہ کارروائی کے دوران عوام کے علاوہ میڈیا کو بھی جانے سے روکنے کی کوشش کی گئی۔
 ضلع مجسٹریٹ اجے کمار دویدی کا کہنا تھا کہ اس کارروائی سے نہ صرف سرکاری اراضی کو تجاوزات سے آزاد کرایا گیا ہے بلکہ مستقبل میں کسی بھی قسم کی غیر مجاز تعمیرات پر انتظامیہ کی زیرو ٹالرنس پالیسی کو بھی تقویت ملے گی۔ ساتھ ہی بھنگا کے شہریوں کو یہ پیغام بھی گیا ہے کہ سرکاری اراضی پر کسی بھی قسم کی غیر قانونی سرگرمی کو برداشت نہیں کیا جائے گا۔
 وہیں تنظیم علماء اہلسنت ضلع بہرائچ وشراوستی کے جنرل سیکریٹری مولانا محمد معین الدین قادری نےمزارکے انہدام کی سخت مذمت کی ہے۔