من کی بات میں وزیر اعظم نریندرمودی نے کہا: خلائی اسٹارٹ اپس کی تعداد بڑھ کر۲۰۰؍ سے زیادہ ہو گئی ہے

وزیر اعظم نریندر مودی نے اتوار کو کہا کہ ملک میں خلائی اسٹارٹ اپس بھی تیزی سے بڑھ رہے ہیں۔ انہوں نے اپنے ماہانہ ریڈیو پروگرام من کی بات میں کہا کہ ۵؍ سال پہلے خلا کے میدان  میں ۵۰؍ سے بھی کم اسٹارٹ اپس تھے۔ آج  ان کی تعداد بڑھ کر۲۰۰؍ سے زیادہ ہو گئی ہے۔ گزشتہ چند ہفتوں میں کھیل ہو، سائنس ہو یا ثقافت، بہت کچھ ایسا ہوا ہے جس پر ہر ہندوستانی کو فخر ہے۔
  مودی نے کہا کہ حال ہی میں شوبھانشو شکلا کی خلا سے واپسی کے تعلق سے ملک میں کافی بحث ہوئی تھی۔ جیسے ہی شوبھانشو زمین پر بحفاظت اترے، لوگ اچھل پڑے، ہر دل میں خوشی کی لہر دوڑ گئی۔ پورا ملک فخر کے جذبے سے  بھرا ٹھا تھا۔ مجھے یاد ہے، جب اگست۲۰۲۳ء میں چندریان۳؍کی کامیاب لینڈنگ ہوئی تھی  تو ملک میں ایک نیا ماحول پیدا ہوا تھا۔ بچوں میں سائنس اور خلا کے بارے میں ایک نیا تجسس بھی پیدا ہوا ہے۔ اب چھوٹے چھوٹے بچے کہتے ہیں: ہم بھی خلا میں جائیں گے، ہم بھی چاند پر اتریں گے اور خلائی سائنسدان بنیں گے۔
 انہوں نے مزید کہا کہ آپ نے انسپائر مانک مہم کا نام ضرور سنا ہوگا۔ یہ بچوں کی جدت طرازی کو فروغ دینے کی مہم ہے۔ ہر اسکول سے ۵؍ بچوں کا انتخاب کیا جاتا ہے۔ ہر بچہ ایک نیا خیال لے کر آتا ہے۔ اب تک لاکھوں بچوں کو اس سے جوڑا جا چکا ہے اور چندریان۳؍ کے بعد ان کی تعداد دُگنی ہو گئی ہے۔ ملک میں خلائی اسٹارٹ اپس بھی تیزی سے ترقی کر رہے ہیں۔ ۵؍ سال پہلے۵۰؍ سے بھی کم اسٹارٹ اپس تھے۔ آج صرف خلائی شعبے میں۲۰۰؍ سے زیادہ ہوگئے ہیں۔ ساتھیو  اگلے مہینے۲۳؍ اگست قومی خلائی دن ہے۔ آپ اس کا جشن کیسے منائیں گے، کیا کوئی نیا خیال ہے؟ مجھے نمو ایپ پر پیغام ضرور بھیجئے گا۔
   مودی نے مزید کہا کہ۲۱؍ویں صدی کے ہندوستان میں سائنس ایک نئی توانائی کے ساتھ آگے بڑھ رہا ہے۔ کچھ دن پہلے، ہمارے طلبہ نے بین الاقوامی کیمسٹری اولمپیاڈ میں تمغے جیتے۔ دیویش پنکج، سندیپ کوچی، دیب دت پریدرشی اور اجول کیسری، ان چاروں نے ہندوستان کا نام روشن کیا۔ ہندوستان نے ریاضی کی دنیا میں بھی اپنی شناخت کو مضبوط کیا ہے۔ آسٹریلیا میں منعقدہ بین الاقوامی ریاضیاتی اولمپیاڈ میں، ہمارے طلبہ نے۳؍ سونے، ۲؍ چاندی اور ایک  کانسہ کا تمغہ جیتا ہے۔

خلائی اسٹارٹ اپس سے متعلق 
حکومت کی حمایت اور پالیسیاں:
انڈین اسپیس ریسرچ آرگنائزیشن (آئی ایس آر او) نجی کمپنیوں کے ساتھ تعاون کر رہی ہے اور انہیں اپنے بنیادی ڈھانچے اور ٹیکنالوجی کو استعمال کرنے کی اجازت دے رہی ہے۔ انڈین نیشنل اسپیس پروموشن اینڈ آتھرائزیشن سینٹر (اِن اسپیس) کا قیام نجی شعبے کی شراکت کو فروغ دینے اور خلائی شعبے میں اختراع کی حوصلہ افزائی کے لیے کیا گیا ہے۔ حکومت خلائی اسٹارٹ اپس کو مالی مدد اور دیگر مراعات بھی فراہم کر رہی ہے۔
 خلائی سیاحت اور دیگر ابھرتے ہوئے رجحانات:
خلائی سیاحت،  کان کنی اور مصنوعی ذہانت (اے آئی )  اور مشین لرننگ (ایم ایل)  جیسے ابھرتے ہوئے رجحانات خلائی شعبے میں انقلاب برپا کرنے کے لیے تیار ہیں۔
 ہندوستانی خلائی آغاز ایک دلچسپ اور تیزی سے ترقی کرنے والا شعبہ ہے۔ حکومتی تعاون اور نجی شعبے کی شراکت کے ساتھ، ہندوستان خلائی تحقیق اور ٹیکنالوجی میں عالمی لیڈر بننے کی راہ پر گامزن ہے۔