ہند۔ برازیل نے ڈاک کے شعبے میں تعاون کے لیے ایک مفاہمتی یادداشت (ایم او یو) پر دستخط کیے ہیں، جو ڈاک خدمات، ڈیجیٹل تبدیلی اور ہمہ گیر خدمات کی فراہمی کے میدان میں دوطرفہ اشتراک کو مضبوط بنانے کی جانب ایک اہم قدم ہے۔

ہند۔ برازیل نے ڈاک کے شعبے میں تعاون کے لیے ایک مفاہمتی یادداشت (ایم او یو) پر دستخط کیے ہیں، جو ڈاک خدمات، ڈیجیٹل تبدیلی اور ہمہ گیر خدمات کی فراہمی کے میدان میں دوطرفہ اشتراک کو مضبوط بنانے کی جانب ایک اہم قدم ہے۔ یہ مفاہمتی یادداشت حکومتِ ہند کے وزیرِ مواصلات  جیوتیرادتیہ ایم سندھیا اور برازیل کے وزیرِ مواصلات  فریڈریکو دے سیکویرا فِلہو نے جمہوری وفاقی جمہوریہ برازیل کے صدر لوئس اناسیو لولا دا سلوا کے دورۂ ہند کے موقع پر دستخط کی۔ 
یہ معاہدہ محکمۂ ڈاک، ہند اور وزارتِ مواصلات، برازیل کے درمیان تعاون کے لیے ایک جامع خاکہ فراہم کرتا ہے، جس کا مقصد ڈاک کے شعبے میں تزویراتی شراکت داری کو فروغ دینا اور علم و تجربے کے تبادلے کو وسعت دینا ہے۔ 
یہ مفاہمتی یادداشت درج ذیل شعبوں میں تعاون کی فراہمی کو یقینی بناتی ہے: ڈاک کے شعبے کی پالیسیوں اور عملی اُمور میں بہترین طریقۂ کار اور مہارت کا تبادلہ، عالمگیر خدمات اور پتے کے نظام کو مضبوط بنانا، ڈجیٹل تبدیلی، برقی تجارت کی ترسیلی خدمات اور ڈاک کے مالیاتی اُمور میں تعاون ،استعداد سازی، تربیت اور فنی تبادلے ، باہمی دلچسپی کے مشترکہ اقدامات اور تزویراتی منصوبے ،کثیرالجہتی فورمز میں بہتر ہم آہنگی، جن میں عالمی ڈاک اتحاد (یو پی یو) بھی شامل ہے۔

یہ بھی پڑھئے:سُدیپ کو میرے بغیر کرائم ڈراما بنانے کی اجازت نہیں: جے دیپ اہلاوت

یہ شراکت داری دونوں ممالک کے حکام اور ماہرین کے باہمی دوروں، مشترکہ ورکشاپس اور تربیتی پروگراموں کے انعقاد اور منظم معلوماتی تبادلے کے ذریعے عملی جامہ پہنائی جائے گی۔ 

یہ بھی پڑھئے:زمبابوے کا عزم بمقابلہ ویسٹ انڈیز کی جارحیت: سپر ۸؍ کا بڑا مقابلہ

یہ مفاہمتی یادداشت ہند اور برازیل کے اس مشترکہ عزم کی عکاسی کرتی ہے کہ وہ اپنے ڈاکی نظام کو جدید خطوط پر استوار کریں اور انہیں معاشی نمو، مالی شمولیت اور آخری مرحلے تک خدمات کی مؤثر فراہمی کا مؤثر ذریعہ بنائیں۔ ہند بڑے پیمانے پر ڈاکی اصلاحات کے اپنے تجربات، بشمول ڈیجیٹل خدمات، برقی تجارت کی ترسیلی سہولیات اور شہری مرکز عوامی خدمات کی فراہمی، برازیل کے ساتھ شریک کرے گا۔ یہ معاہدہ تیزی سے بدلتے ہوئے بازاری ماحول میں ڈاکی اداروں کی مالی پائیداری اور عملی کارکردگی کو مضبوط بنانے کی کوششوں میں بھی معاون ثابت ہوگا۔