پاکستان نے افغانستان کے صوبہ ننگر ہار اور پکتیکا میں مبینہ دہشتگردوں کے اڈوں کو نشانہ بناکر فضائی کارروائی کی، جس کی افغانستان نے شدید مذمت کی ہے، افغان حکام کا کہنا ہے کہ ان حملوں میں خواتین اور بچوں سمیت متعدد شہری ہلاک ہوئے ہیں، جس سے دونوں ممالک کے درمیان کشیدگی میں اضافہ ہو گیا ہے۔

پاکستان نے افغانستان کے صوبوں ننگرہار اور پکتیکا میں مبینہ طور پر فضائی کارروائی کی ہے، جس میں اسلام آباد کا کہنا ہے کہ حالیہ خودکش حملوں کے بعد تحریک طالبان پاکستان (ٹی ٹی پی) اور داعش سے وابستہ عسکریت پسندوں کے ٹھکانوں کو نشانہ بنایا گیا۔ تاہم افغان حکام کا کہنا ہے کہ ان حملوں میں خواتین اور بچوں سمیت متعدد شہری ہلاک ہوئے ہیں، جس سے دونوں ممالک کے درمیان کشیدگی میں اضافہ ہو گیا ہے۔پاکستانی وزارت اطلاعات و نشریات کے مطابق، یہ کارروائیاں حالیہ خودکش دھماکوں کے بعد کی گئی ہیں، جن میں اسلام آباد میں ایک امام بارگاہ پر حملہ، باجوڑ اور بنوں میں ہونے والے دھماکے شامل ہیں ۔

یہ بھی پڑھئے: برطانیہ کاایران پرحملے کیلئے امریکہ کو اپنی زمین دینے سے انکار

بعد ازاں پاکستان کا کہنا ہے کہ ان حملوں میں ملوث دہشت گردوں کا تعلق افغانستان سے ہے ۔ ایک بیان میں کہا گیا کہ پاکستان نے سرحدی علاقے میں ٹی ٹی پی اور داعش خراسان کے سات عسکریت پسند کیمپوں اور ٹھکانوں کو نشانہ بنایا ۔دوسری جانب افغان عبوری حکومت کے ترجمان ذبیح اللہ مجاہد نے ان حملوں کی شدید مذمت کرتے ہوئے کہا کہ پاکستانی فوج نے ننگرہار اور پکتیکا کے صوبوں میں شہریوں پر بمباری کی، جس میں خواتین اور بچوں سمیت درجنوں افراد شہید اور زخمی ہوئے ۔ انہوں نے الزام لگایا کہ پاکستانی فوجی جرنیل اپنے ملک میں حفاظتی ناکامیوں  کو ایسے جرائم سے چھپا رہے ہیں ۔

یہ بھی پڑھئے: ایران کشیدگی کے درمیان امریکہ نے قطر اور بحرین سے سیکڑوں فوجی بلالئے: رپورٹ

دریں اثناءافغان وزارت دفاع نے ان حملوں کو افغانستان کی خودمختاری کی صریح خلاف ورزی قرار دیتے ہوئے کہا کہ شہری علاقوں اور مذہبی مقامات کو نشانہ بنانا پاکستانی فوج کی انٹیلیجنس ناکامی کو ظاہر کرتا ہے ۔ وزارت نے خبردار کیا کہ اس جارحیت کا مناسب وقت پر مناسب جواب دیا جائے گا ۔ خبر کے مطابق ننگرہار کے ضلع بہسود میں ایک گھر پر حملے میں۲۳؍ افراد کے ملبے تلے دب جانے کی اطلاعات ہیں، جن میں سے پانچ کو زندہ نکال لیا گیا جبکہ دیگر کی ہلاکت کا خدشہ ہے ۔ افغان ذرائع کے مطابق کم از کم۱۷؍ شہری ہلاک ہوئے ہیں جن میں۱۱؍ بچے شامل ہیں ۔پاکستان نے افغان عبوری حکومت سے مطالبہ کیا ہے کہ وہ اپنی سرزمین کو دہشت گردی کیلئے استعمال نہ ہونے کا وعدہ پورا کرے ۔