دبئی جانے والے ہندوستانی سیاح اب یونائیفائیڈ پیمنٹس انٹرفیس(یو پی آئی ) کے ذریعے ’ ایٹ دی ٹاپ، برج خلیفہ‘ کے ٹکٹ آن لائن بک کر سکیں گے، جس سے متحدہ عرب امارات پہنچنے سے پہلے ہی سفر کی منصوبہ بندی مزید آسان ہو جائے گی۔

دبئی جانے والے ہندوستانی سیاح اب  یونائیفائیڈ پیمنٹس انٹرفیس(یو پی آئی )  کے ذریعے  ’ ایٹ دی ٹاپ، برج خلیفہ‘ کے ٹکٹ آن لائن بک کر سکیں گے، جس سے متحدہ عرب امارات پہنچنے سے پہلے ہی سفر کی منصوبہ بندی مزید آسان ہو جائے گی۔

یہ بھی پڑھئے:کل ملک کی تین ریاستوں میں تین اسمبلی حلقوں کیلئے ضمنی انتخابات، تیاریاں مکمل

یہ سہولت نیوپے، این پی سی آئی انٹر نیشنل پیمنٹس  لمیٹڈ (این آئی پی ایل) اور اعمار انٹرٹینمنٹ  کے درمیان شراکت داری کے تحت متعارف کرائی گئی ہے۔ مشترکہ بیان کے مطابق   ایٹ دی ٹاپ، برج خلیفہ  متحدہ عرب امارات کا پہلا سیاحتی مقام بن گیا ہے جہاں ای کامرس ٹرانزیکشنز کے لیے  یو پی آئی  ادائیگی قبول کی جا رہی ہے۔ اب ہندوستانی سیاح اس مقام کی سرکاری ویب سائٹ کے ذریعے اپنی پسندیدہ یو پی آئی  ادائیگی سروس استعمال کرتے ہوئے ٹکٹ خرید سکتے ہیں۔
 آن لائن ادائیگی کی نئی سہولت
یہ اقدام نیوپے   اوراین آئی پی ایل  کے درمیان تعاون کا دائرہ مزید وسیع کرتا ہے۔ دونوں اداروں نے ۲۰۲۲ء میں متحدہ عرب امارات میں کیو آر کوڈ پر مبنی یوپی آئی   مرچنٹ ادائیگی  متعارف کرایا تھا ، جس کے تحت  ہندوستانی سیاح مختلف دکانوں اور کاروباری مراکز پر  یو پی آئی کے ذریعے ادائیگی کر سکتے تھے۔ اب وہ سفر سے قبل آن لائن ٹکٹ بھی خرید سکیں گے۔
نیوپے  کے چیف ایگزیکٹیو آفیسر  وبھور مندھاڈا  نے کہا کہ یہ کمپنی کے لیے ایک اہم سنگ میل ہے۔ انہوں نے کہا’’ ہندوستان کے سب سے قابلِ اعتماد ڈجیٹل ادائیگی پلیٹ فارم کو دنیا کی مشہور ترین سیاحتی منزلوں میں سے ایک کے ساتھ جوڑ کر ہم لاکھوں ہندوستانی سیاحوں کے لیے متحدہ عرب امارات کے سیاحتی شعبے تک رسائی کو مزید آسان بنا رہے ہیں۔‘‘ انہوں نے مزید بتایا کہ نیوپے   خلیجی تعاون کونسل (جی سی سی ) کا پہلا ادارہ ہے جس نے ای کامرس ٹرانزیکشنز کے لیے یوپی آئی  ادائیگی کی سہولت متعارف کرائی ہے۔
ہندوستانی سیاحوں کے لیے آسانی
 ایٹ دی ٹاپ، برج خلیفہ  دبئی کے مقبول ترین سیاحتی مقامات میں شمار ہوتا ہے، جہاں ہر سال لاکھوں افراد آتے ہیں، جن میں بڑی تعداد ہندوستانی سیاحوں کی ہوتی ہے۔ نئی سہولت کے ذریعے مسافر روانگی سے پہلے ہی  یو پی آئی کے ذریعے ٹکٹ اور دیگر تجربات کی بکنگ کر سکیں گے، جس سے ان کے سفر کا آغاز مزید سہل ہو جائے گا۔این پی سی آئی انٹرنیشنل  کے منیجنگ ڈائریکٹر اور سی ای او رتیش شکلا نے کہا کہ ہندوستانی مسافر بیرونِ ملک سفر کے دوران ایسی ادائیگی کے طریقے چاہتے ہیں جو آسان، مانوس اور بغیر کسی رکاوٹ کے ہوں۔
انہوں نے کہاکہ برج خلیفہ کے ایٹ دی ٹاپ  پر آن لائن بکنگ کے لیے  یو پی آئی کی سہولت فراہم کر کے ہم ہندوستانی مسافروں کو یہ موقع دے رہے ہیں کہ وہ متحدہ عرب امارات پہنچنے سے پہلے ہی اپنی پسندیدہ ادائیگی سروس استعمال کرتے ہوئے ٹکٹ بک کر سکیں۔‘‘ اعمار انٹرٹینمنٹ  کے ترجمان نے کہا کہ ہندوستان ان کے لیے سب سے اہم بین الاقوامی سیاحتی منڈیوں میں سے ایک ہے۔

یہ بھی پڑھئے:’’اچھے کام کی امید کے ساتھ جدوجہد جاری رکھیں تو کامیابی ضرور ملتی ہے‘‘

انہوں نے کہا’’آن لائن بکنگ میں یو پی آئی   ادائیگی شامل کرنے سے ہندوستانی مہمانوں کے لیے سفر کی منصوبہ بندی سے لے کر مقام پر پہنچنے تک کا پورا تجربہ مزید آسان، تیز اور سہل ہو جائے گا۔‘‘ کمپنیوں کے مطابق، آن لائن بکنگ پلیٹ فارم میں  یو پی آئی  کا انضمام بین الاقوامی سفر میں ڈجیٹل ادائیگیوں کے بڑھتے ہوئے کردار کی عکاسی کرتا ہے اور اس سے بھارت اور متحدہ عرب امارات کے درمیان سیاحت اور معاشی تعلقات مزید مضبوط ہوں گے۔