شہری ہوا بازی کی وزارت کے اعداد و شمار کے مطابق مارچ کے مقابلے میں اپریل میں ہندوستان کے ہوائی ٹریفک میں کمی ریکارڈ کی گئی ہے۔ یہ کمی ملکی اور بین الاقوامی دونوں قسم کے مسافروں میں دیکھی گئی ہے۔

شہری ہوا بازی کی وزارت کے اعداد و شمار کے مطابق مارچ کے مقابلے میں اپریل میں ہندوستان کے ہوائی ٹریفک میں کمی ریکارڈ کی گئی ہے۔ یہ کمی ملکی اور بین الاقوامی دونوں قسم کے مسافروں میں دیکھی گئی ہے۔یہ کمی بنیادی طور پر مشرقِ وسطیٰ میں جاری تنازعات کی وجہ سے ہوئی ہے، جس کے باعث بین الاقوامی پروازوں کی تعداد میں تیزی سے کمی دیکھنے میں آئی۔
ملک کی ہوائی ٹریفک میں اپریل کے دوران مسافروں کی تعداد ۸ء۱۴۰؍ لاکھ رہی، جو سال بہ سال اور ماہ بہ ماہ تقریباً ۴؍ فیصد کمی کو ظاہر کرتی ہے۔ اسی طرح بین الاقوامی ہوائی ٹریفک میں زیادہ کمی دیکھی گئی، جہاں اپریل میں مسافروں کی تعداد کم ہو کر۳ء۲۸؍ لاکھ رہ گئی، جو مارچ کے مقابلے میں تقریباً ۲۰؍ فیصد کم ہے۔
اس دوران متحدہ عرب امارات کی جنرل سول ایوی ایشن اتھاریٹی نے ہفتے کے روز اعلان کیا کہ یو اے ای کی فضائی حدود میں معمول کی پروازوں کا آپریشن مکمل طور پر بحال کر دیا گیا ہے اور عارضی احتیاطی پابندیاں ہٹا دی گئی ہیں۔ وزارتِ خارجہ کے بیان کے مطابق اس کے نتیجے میں ہندوستانی اور یو اے ای کی ایئرلائنز نے ہندوستان کے مختلف شہروں کے لیے پروازوں کی تعداد بڑھانا شروع کر دی ہے۔
مغربی ایشیا میں مجموعی طور پر فضائی صورتحال بتدریج بہتر ہو رہی ہے اور اس خطے سے ہندوستان کے مختلف مقامات کے لیے اضافی پروازیں چلائی جا رہی ہیں۔ سعودی عرب اور عمان کے مختلف ہوائی اڈوں سے ہندوستان کے لیے پروازیں جاری ہیں۔ قطر کی فضائی حدود جزوی طور پر کھلی ہوئی ہے، جہاں سے ایئر انڈیا، ایئر انڈیا ایکسپریس، انڈیگو اور قطر ایئرویز ہندوستان  کے لیے پروازیں چلا رہی ہیں۔

یہ بھی پڑھئے:سلمان خان کی شریک اداکار پوجا ڈڈوال، ممبئی کی ایک چال سے ٹفن سروس چلارہی ہیں

کویت کی فضائی حدود مکمل طور پر کھلی ہے اور جزیرہ ایئرویز اور کویت ایئرویز ہندوستان  کے لیے پروازیں چلا رہی ہیں۔ اسی طرح بحرین کی فضائی حدود بھی کھلی ہے، جہاں سے ایئر انڈیا ایکسپریس، انڈیگو اور گلف ایئر ہندوستان کے لیے پروازیں چلا رہی ہیں۔عراق کی فضائی حدود محدود پروازوں کے لیے کھلی ہے، جنہیں علاقائی مقامات تک جانے اور وہاں سے ہندوستان پہنچنے کے لیے استعمال کیا جا سکتا ہے۔

یہ بھی پڑھئے:میں ۶؍ میں سے ایک متاثرہ ہوں:، وِنیش پھوگاٹ نے برج بھوشن سنگھ پر پھر الزامات لگائے

ایران کی فضائی حدود بھی جزوی طور پر کھلی ہے، جہاں فی الحال کارگو اور چارٹر پروازوں کی اجازت ہے۔ وزارت نے ہندوستانی شہریوں کو ایران کا سفر نہ کرنے کی ہدایت دی ہے اور وہاں موجود افراد سے اپیل کی ہے کہ وہ سفارت خانے کی مدد سے زمینی سرحدی راستوں کے ذریعے ملک چھوڑ دیں۔ اب تک تہران میں ہندوستانی سفارت خانہ۲۵۰۴؍ہندوستانی شہریوں کو محفوظ طور پر نکالنے میں مدد کر چکا ہے۔ بیان میں کہا گیا ہے کہ اسرائیل کی فضائی حدود بھی کھلی ہے اور محدود پروازیں دوبارہ شروع ہو گئی ہیں، جنہیں علاقائی مقامات کے ذریعے ہندوستان واپس آنے کے لیے استعمال کیا جا سکتا ہے۔