عام آدمی پارٹی کی کمیٹی برائے سیاسی امور کافیصلہ، کیجریوال سے متعلق قیاس آرایئوں کا خاتمہ ،راجندر گپتا آج پنجاب اسمبلی میں اپنا پرچہ نامزدگی داخل کریں گے۔

تمام قیاس آرائیوں کو ختم کرتے ہوئے عام آدمی پارٹی (اے اے پی) نے ٹرائی ڈنٹ گروپ کے چیئرمین راجندر گپتا کو راجیہ سبھا ضمنی انتخاب کے لیے اپنا امیدوار منتخب کیا ہے۔  عام آدمی پارٹی کی کمیٹی برائے سیاسی امور نے یہ فیصلہ کیا ہے۔ پارٹی کی جانب سے جاری کردہ ایک بیان میں کہا گیا ’’کمیٹی برائے سیاسی امور راجیہ سبھا کے الیکشن کیلئے راجندر گپتا کو بطور امیدوار نامزد کرتی ہے جن پرپنجاب ریاستی اسمبلی کے منتخب اراکین کا اتفاق ہے۔‘‘
  یہ سیٹ سنجیو اروڑہ کے اسمبلی ضمنی الیکشن لڑنے اور وزیر بننے کے بعد خالی ہوئی تھی۔ذرائع کے مطابق راجندر گپتا  پیر کو پنجاب اسمبلی میں اپنا پرچہ نامزدگی داخل کریں گے، اس موقع پر وزیر اعلیٰ بھگونت مان بھی موجود ہوں گے۔ اس سے پہلے اوسوال گروپ کے کمل اوسوال کا نام بھی اس سیٹ کے لیے سامنے آیا تھا لیکن آخری غور و خوض کے بعد راجندر گپتا کے نام کو حتمی شکل دی گئی۔
 یہ  عام آدمی پارٹی (اے اے پی /آپ) کا ایک اور قدم مانا جارہا ہے جس میں صنعت کار چہرہ پنجاب سے راجیہ سبھا میں بھیجا جارہا ہے جیسا اس سے قبل سنجیو اروڑہ کےساتھ ہوا تھاجو صنعت سے سیاست کے میدان میں آئے تھے ۔ اس فیصلے سے اے اے پی کی حکمت عملی میں صنعتی اور سیاسی توازن برقرار رکھنے کی کوشش دیکھی جارہی ہے۔واضح رہے کہ سنجیو اروڑہ فی الوقت پنجاب کی بھگونت مان کابینہ میں وزیر ہیں۔
 بتادیں کہ حال ہی میں پنجاب میں راجیہ سبھا کی ایک سیٹ کے لیے ضمنی انتخاب کا اعلان کیا گیا ہے۔ یہ سیٹ جولائی میں ایم پی سنجیو اروڑہ کے استعفیٰ کے بعد خالی ہوئی تھی، اور اب اس کے لیے ووٹنگ ہوگی۔ اس سیٹ کے لیے ووٹنگ اور گنتی۲۴؍ اکتوبر کو ہوگی۔ شروع میں دہلی کے سابق وزیر اعلیٰ اروند کیجریوال کے نام پر زوردار بحث ہو رہی تھی لیکن راجندر گپتا کا نام فائنل ہونے کے بعد تمام قیاس آرائیوں پر فل اسٹاپ لگ گیا ہے ۔ بتادیں کہ راجندر گپتا پنجاب کے امیر ترین صنعت کاروں میں سے ایک ہیں۔ ٹرائیڈنٹ گروپ کی تیار کردہ مصنوعات اب ملکی اور بین الاقوامی سطح پر برآمد کی جاتی ہیں۔ وہ ٹرائیڈنٹ لمیٹڈ کے بانی اور چیئرمین ہیں جو ایک بلین ڈالرکی کمپنی ٹرائیڈنٹ گروپ کا اہم ادارہ ہے۔ اطلاعات کے مطابق راجندر گپتا پنجاب کے امیر ترین شخص بھی رہے ہیں۔ گپتا کی پیدائش ۲؍ جنوری ۱۹۵۹ء کو ہوئی تھی ۔ ٹرائیڈنٹ گروپ کا صدر دفتر لدھیانہ، پنجاب میں ہے۔ اس گروپ کی بڑی صنعتوں میں گھریلو ٹیکسٹائل، پیپر مینوفیکچرنگ ، کیمیکل اور پاور شامل ہیں۔