ایران نے جاری جنگ کے خاتمے کیلئے اپنی واضح شرائط پیش کر دی ہیں، جن میں امریکی فوجی اڈوں کی بندش اور آبنائے ہرمز پر مکمل کنٹرول شامل ہے۔ یہ شرائط ایسے وقت میں سامنے آئی ہیں جب امریکہ اور اسرائیل کے ساتھ جنگ اپنے حساس مرحلے میں داخل ہو چکی ہے اور سفارتی سطح پر حل کی کوششیں جاری ہیں۔

ایران نے امریکہ اور اسرائیل کے ساتھ جاری جنگ کے خاتمے کیلئے اپنی واضح شرائط پیش کرتے ہوئے کہا ہے کہ کسی بھی ممکنہ معاہدے کیلئے بنیادی مطالبات کو تسلیم کرنا ضروری ہوگا۔ رپورٹس کے مطابق ایران نے سب سے اہم شرط یہ رکھی ہے کہ خطے میں موجود امریکی فوجی اڈوں کو بند کیا جائے۔ ایرانی حکام نے کہا کہ ’’جب تک خطے میں غیر ملکی فوجی موجودگی ختم نہیں ہوتی، پائیدار امن ممکن نہیں ہے۔‘‘ دوسری بڑی شرط آبنائے ہرمز پر مکمل کنٹرول کی ہے۔ ایران نے واضح کیا کہ ’’ہرمز ہماری سلامتی اور معیشت کیلئے مرکزی حیثیت رکھتا ہے، اس پر ہمارا کنٹرول تسلیم کیا جانا چاہئے۔‘‘

یہ بھی پڑھئے: تیسری عالمی جنگ، ایپسٹین، ایران میں روتھس چائلڈ بینکنگ: ٹرمپ کے سابق انسٹائیڈر نےدھماکہ خیز دعوے کئے

مزید برآں ایران نے مستقبل میں کسی بھی قسم کے حملے کے خلاف ضمانت کا مطالبہ بھی کیا ہے۔ ایک بیان میں کہا گیا کہ ’’ہم ایسے کسی معاہدے کو قبول نہیں کریں گے جس میں مستقبل کے حملوں کی روک تھام کی ضمانت شامل نہ ہو۔‘‘ایرانی حکام نے یہ بھی کہا کہ اگر ان شرائط کو نظر انداز کیا گیا تو جنگ جاری رہے گی۔ یہ شرائط ایسے وقت میں سامنے آئی ہیں جب امریکی صدر ٹرمپ نے محدود وقفے کا اعلان کیا ہے اور سفارتی کوششیں تیز ہو رہی ہیں، تاہم ایران نے واضح کر دیا ہے کہ اس کے بنیادی مطالبات کے بغیر جنگ کا خاتمہ ممکن نہیں۔