Updated: November 16, 2026, 5:02 PM IST
| Tel Aviv
اسرائیل میں نئی حکومت کی تشکیل کے لیے جاری سیاسی مذاکرات میں اہم پیش رفت سامنے آئی ہے۔ میڈیا رپورٹ کے مطابق وزیر اعظم بنجامن نیتن یاہو کے قریبی ساتھیوں نے اپوزیشن لیڈر گادی آئزن کوٹ کی ٹیم کو اشارہ دیا ہے کہ لیکوڈ جماعت وسیع تر قومی اتحاد کی حکومت بنانے کے لیے ایتامار بن گویر کی جماعت ’عوتسما یہودیت‘ کو اتحاد سے باہر رکھنے پر تیار ہوسکتی ہے۔ بتایا گیا ہے کہ امریکہ بھی اس جماعت کو نئی حکومت میں شامل نہ کرنے کا مطالبہ کررہا ہے، تاہم لیکوڈ نے ایسی کوئی بات کہنے کی تردید کی ہے۔
اسرائیل میں نئی حکومت کی تشکیل کے لیے سیاسی جماعتوں کے درمیان جاری رسہ کشی میں ایک نیا موڑ آگیا ہے۔ نگراں وزیر اعظم بنجامن نیتن یاہو کے قریبی ساتھیوں نے مبینہ طور پر اپوزیشن لیڈر اور یاشار پارٹی کے سربراہ گادی آئزن کوٹ کے حلقے کو بتایا ہے کہ وہ ایسی قومی اتحاد کی حکومت کے قیام پر رضامند ہوسکتے ہیں جس میں قومی سلامتی کے وزیر ایتامار بن گویر کی جماعت شامل نہ ہو۔ اسرائیلی اخبار ’اسرائیل ہیوم‘ نے اتوار کو اس پیش رفت کی خبر دی۔ رپورٹ کے مطابق نیتن یاہو کے ساتھیوں نے آئزن کوٹ کے اتحاد کے بعض لیڈروں کو بتایا کہ اگر وسیع تر مخلوط حکومت کے قیام کے لیے مذاکرات شروع ہوتے ہیں تو لیکوڈ جماعت بن گویر کی جماعت عوتسما یہودیت کو حکومت میں شامل کرنے پر اصرار نہیں کرے گی۔ رپورٹ میں یہ بھی کہا گیا ہے کہ آئزن کوٹ کے اتحاد کے لیڈروں کو یہ پیغام دیا گیا کہ واشنگٹن بھی عوتسما یہودیت کو نئی حکومت میں شامل نہ کرنے کا مطالبہ کررہا ہے۔ تاہم، اس دعوے کی آزادانہ طور پر تصدیق نہیں ہوئی ہے۔ لیکوڈ جماعت نے واضح طور پر ایسی کسی پیشکش یا پیغام رسانی کی تردید کردی ہے۔ اس طرح ایک طرف نیتن یاہو کے قریبی حلقوں سے منسوب پیشکش کی خبریں ہیں تو دوسری طرف ان کی اپنی جماعت کا کہنا ہے کہ اس نے ایسا کوئی پیغام نہیں دیا۔
یہ بھی پڑھئے: شیخ سلطان نے اسلام کے تعلق سے میری سوچ بدل دی: امریکی میڈیا شخصیت اسٹیو ہاروے
اس خبر پر بن گویر کی جماعت کے اندر بھی ناراضگی سامنے آئی ہے۔ عوتسما یہودیت کی رکن پارلیمان تالی گوٹلیو نے اسرائیل ہیوم سے گفتگو میں کہا کہ اس رپورٹ سے ان کی جماعت کے ان خدشات کی تصدیق ہوتی ہے جن کا اظہار انتخابی مہم کے دوران کیا گیا تھا۔ انہوں نے کہا، ’’اس میں نئی بات کیا ہے؟ ہم نے انتخابی مہم کے دوران ہی کہا تھا کہ وزیر اعظم عوتسما یہودیت کے بغیر آئزن کوٹ کے ساتھ قومی اتحاد کی حکومت بنانا چاہتے ہیں۔‘‘ ان کا بیان اس بات کی نشاندہی کرتا ہے کہ نیتن یاہو کے ممکنہ سیاسی منصوبے پر ان کے دائیں بازو کے اتحادیوں میں بھی بداعتمادی پائی جاتی ہے۔ اگر یہ پیشکش درست ثابت ہوتی ہے تو یہ نیتن یاہو کے انتخابی وعدوں سے ایک اہم انحراف ہوگا۔ انہوں نے انتخابی مہم کے دوران اپنے دائیں بازو کے اتحادیوں، بالخصوص ایتامار بن گویر اور وزیر خزانہ بتسلئیل سموترچ کے ساتھ اتحاد برقرار رکھنے کا وعدہ کیا تھا۔ بن گویر کی جماعت عوتسما یہودیت کو اسرائیل کی انتہائی دائیں بازو کی قوم پرست جماعتوں میں شمار کیا جاتا ہے۔ بن گویر خود قومی سلامتی کے وزیر رہ چکے ہیں اور پولیس سمیت داخلی سلامتی کے معاملات سے متعلق اہم وزارت کی ذمہ داری سنبھالتے رہے ہیں۔ ان کی جماعت کو حکومت سے باہر رکھنے کا امکان اسرائیلی دائیں بازو کے سیاسی اتحاد میں تبدیلی کا اشارہ سمجھا جارہا ہے۔ دوسری جانب نیتن یاہو اور آئزن کوٹ دونوں قومی اتحاد کی حکومت کے قیام کی بات کررہے ہیں، لیکن اس کے سربراہ اور اس میں شامل جماعتوں کے بارے میں دونوں کے موقف میں بنیادی اختلاف ہے۔ آئزن کوٹ کا کہنا ہے کہ لیکوڈ ان کی قیادت میں قائم ہونے والی حکومت میں شامل ہوسکتی ہے، بشرطیکہ وہ ان کے طے کردہ اصولوں کو قبول کرے اور انتہائی دائیں بازو کی سیاسی قوتوں سے اپنا تعلق ختم کرے۔ اس کے برعکس نیتن یاہو چاہتے ہیں کہ نئی حکومت میں ان کے موجودہ سیاسی اتحاد کے تمام اہم شراکت داروں کو جگہ ملے۔
یہ بھی پڑھئے: اسرائیل: نیتن یاہو نے قیادت کا مطالبہ واپس لیا، حریف کے ساتھ اتحادی حکومت پر زور
اس اختلاف کے باوجود دونوں جماعتوں کے نمائندوں کے درمیان ۱۵؍ نومبر کو ہرتزلیا کے ایک ہوٹل میں پہلی باضابطہ ملاقات ہوئی۔ اسرائیلی اخبار یدیعوت احرونوت کے مطابق یہ نشست تقریباً ایک گھنٹہ ۱۵؍ منٹ جاری رہی، لیکن حکومت سازی کے معاملے میں کوئی پیش رفت نہیں ہوسکی۔ مذاکرات میں سب سے بڑا اختلاف وزارت عظمیٰ کی سربراہی پر سامنے آیا۔ آئزن کوٹ چاہتے ہیں کہ نئی حکومت ان کی قیادت میں قائم ہو اور انہیں نیتن یاہو کے ساتھ وزارت عظمیٰ کی مدت تقسیم نہ کرنی پڑے، جبکہ لیکوڈ کا اصرار ہے کہ نیتن یاہو ہی وزیر اعظم رہیں یا کم از کم باری باری دونوں لیڈروں کو یہ منصب ملے۔ بن گویر کی جماعت کو شامل کرنے یا نہ کرنے کا معاملہ بھی اختلافات میں شامل ہے۔ اسرائیل کے صدر آئزک ہرزوگ نے ۸؍ نومبر کو گادی آئزن کوٹ کو نئی حکومت تشکیل دینے کی ذمہ داری سونپی تھی۔ ۲۷؍ اکتوبر کو ہونے والے انتخابات کے بعد ۱۲۰؍ رکنی کنیسٹ میں نیتن یاہو کے اتحاد کو ۵۳؍ نشستیں، آئزن کوٹ کے اتحاد کو ۴۸؍ نشستیں اور عرب جماعتوں کو مجموعی طور پر ۱۹؍ نشستیں حاصل ہوئی تھیں۔ حکومت بنانے کے لیے کم از کم ۶۱؍ ارکان کی حمایت ضروری ہے۔ اس لیے دونوں سیاسی دھڑوں کو حکومت سازی کے لیے دوسرے گروہوں کی حمایت درکار ہے۔ آئزن کوٹ اس دوران دوسرے سیاسی گروہوں سے بھی رابطے کررہے ہیں۔ اسرائیلی اخبار دی یروشلم پوسٹ کی رپورٹ کے مطابق انہوں نے الٹرا آرتھوڈوکس یہودی جماعت یونائیٹڈ تورہ جوڈائزم کو بھی اپنی مجوزہ حکومت میں شامل کرنے کی کوششیں تیز کردی ہیں۔ تاہم، اس جماعت کے ساتھ فوجی بھرتی کے قانون اور حکومت کی جانب سے کیے جانے والے وعدوں کی ضمانت جیسے معاملات پر اختلافات برقرار ہیں۔ ادھر نیتن یاہو بھی ان جماعتوں کو اپنے سیاسی اتحاد سے الگ ہونے سے روکنے کی کوشش کررہے ہیں۔