• Mon, 16 November, 2026
  • EPAPER

Inquilab Logo Happiest Places to Work

اسرائیل: عرب کارکنوں کی گرفتاریوں میں نیتن یاہو کے کردار کی تحقیقات کا مطالبہ

Updated: November 16, 2026, 4:08 PM IST | Jerusalem

اسرائیل کے سابق فوجی سربراہ اور اپوزیشن لیڈر گادی آئزن کوٹ نے الزام لگایا ہے کہ وزیر اعظم بنجامن نیتن یاہو کے دفتر نے انتخابی عمل پر اثرانداز ہونے کے لیے عرب سیاسی کارکنوں کی گرفتاریوں کا راستہ ہموار کیا۔ انہوں نے پولیس اور داخلی خفیہ ایجنسی شن بیت کے کردار کی فوری تحقیقات اور اعلیٰ سطحی عدالتی کمیشن قائم کرنے کا اعلان کیا ہے۔ معاملے میں تین کارکنوں کی بغیر وارنٹ گرفتاری اور پانچ عرب ارکان پارلیمان کی فون نگرانی کی مبینہ کوشش بھی سامنے آئی ہے۔

Benjamin Netanyahu. Photo: X
بنجامن نیتن یاہو۔ تصویر: ایکس

اسرائیل میں ۲۷؍ اکتوبر کو ہوئے پارلیمانی انتخابات کے دوران عرب سیاسی کارکنوں کی گرفتاریوں اور ان کے خلاف مبینہ طور پر بے بنیاد اطلاعات فراہم کیے جانے کے معاملے نے سیاسی تنازع کو جنم دے دیا ہے۔ اپوزیشن لیڈر اور سابق فوجی سربراہ گادی آئزن کوٹ (Gadi Eisenkot) نے نگراں وزیر اعظم بنجامن نیتن یاہو کے دفتر اور ملک کی داخلی خفیہ ایجنسی شن بیت (Shin Bet) کے کردار کی تحقیقات کا مطالبہ کیا ہے۔ انہوں نے کہا ہے کہ وہ حکومت سازی کے بعد اس معاملے کی جانچ کے لیے ایک تحقیقاتی کمیشن قائم کریں گے۔ ان کے مطابق نیتن یاہو اور ان کے قریبی ساتھیوں کا طرز عمل اسرائیلی جمہوریت کے لیے براہ راست اور فوری خطرہ بن چکا ہے۔ یہ الزامات اسرائیلی ٹیلی ویژن چینل ۱۲؍ کے تحقیقاتی پروگرام ’’عُودا‘‘ (Uvda) کی ایک رپورٹ کے بعد سامنے آئے ہیں، جس میں دعویٰ کیا گیا ہے کہ وزیر اعظم کے دفتر سے فراہم کردہ اطلاعات کی بنیاد پر عرب جماعت رعم (Ra’am) کے تین کارکنوں کو انتخابات کے روز گرفتار کیا گیا تھا۔ چینل ۱۲؍ کی رپورٹ کے مطابق، انتخابات سے ایک روز قبل نیتن یاہو کے چیف آف اسٹاف عیدو نورڈن نے پولیس کمشنر ڈینیئل لیوی کے دفتر سے رابطہ کرکے جنوبی اسرائیل میں رعم کے کارکنوں کی سرگرمیوں کے خلاف شکایت درج کرائی تھی۔ انہوں نے پولیس کو ایک ایسے شخص کے بارے میں بھی بتایا جس کے پاس مبینہ طور پر ان کارکنوں کے خلاف اہم معلومات موجود تھیں۔ اخبار ہاریٹز نے اس شخص کی شناخت نیتن یاہو کے دفتر کے ایک سابق ملازم کے طور پر کی ہے، جس کے دفتر کے سابق ڈائریکٹر جنرل یوسی شیلی سے قریبی تعلقات بتائے جاتے ہیں۔

یہ بھی پڑھئے: غزہ میں ملبے سے برآمد لاشوں کی اجتماعی تدفین

رپورٹ میں کہا گیا ہے کہ مذکورہ شخص نے پولیس کو ایسی اطلاعات فراہم کیں جن میں الزام لگایا گیا تھا کہ رعم کے کارکن ووٹروں کو رقم دے کر اپنی جماعت کے حق میں ووٹ ڈالنے کے لیے آمادہ کررہے ہیں۔ پولیس نے یہ اطلاعات اسی رات اپنے انٹیلی جنس نظام میں درج کرلیں اور اگلی صبح انتخابات کے روز جنوبی اسرائیل میں تین کارکنوں کے گھروں پر چھاپے مارے گئے۔ ان کارروائیوں میں تقریباً ۱۴؍ پولیس اہلکاروں نے حصہ لیا۔ تحقیقاتی پروگرام کے مطابق گھروں کی تلاشی اور گرفتاری کے لیے باقاعدہ وارنٹ موجود نہیں تھے۔ گرفتار ہونے والوں میں ڈاکٹر سیف ابو ریاش بھی شامل تھے، جو جنوبی اسرائیل کے شہر رہط سے تعلق رکھتے ہیں۔ پولیس کا الزام تھا کہ کارکنوں کے پاس بڑی مقدار میں نقد رقم اور رعم کے واؤچر موجود تھے، جنہیں ووٹروں کو متاثر کرنے اور جماعت کے حق میں ووٹ دلوانے کے لیے استعمال کیا جانا تھا۔ تاہم، چینل ۱۲؍ کی رپورٹ کے مطابق اس معاملے میں تحقیقات کے باوجود کوئی فردِ جرم عائد نہیں کی گئی۔ ابو ریاش کو ۶؍ روز حراست میں رکھنے کے بعد عدالت کے حکم پر غیر مشروط طور پر رہا کردیا گیا۔ ان کے گھر سے مبینہ طور پر کئی اہم اشیا ملنے کا پولیس نے دعویٰ کیا تھا، لیکن رپورٹ کے مطابق بغیر وارنٹ کی گئی تلاشی میں کوئی ایسی چیز برآمد نہیں ہوئی جس سے الزامات کو ثابت کیا جاسکے۔ تینوں کارکنوں کو بالآخر رہا کردیا گیا۔

یہ بھی پڑھئے: شیخ سلطان نے اسلام کے تعلق سے میری سوچ بدل دی: امریکی میڈیا شخصیت اسٹیو ہاروے

اس معاملے کا ایک اور اہم پہلو اسرائیل کی داخلی خفیہ ایجنسی شن بیت کے سربراہ ڈیوڈ زینی کی مبینہ کارروائی ہے۔ چینل ۱۲؍ کی رپورٹ میں دعویٰ کیا گیا ہے کہ انہوں نے انتخابات کے روز پانچ عرب ارکان پارلیمان کے فون کی نگرانی کرنے اور انہیں حراست میں لینے کی اجازت طلب کی تھی۔ اس کے لیے غیر ملکی مداخلت کے شبہے کو بنیاد بنایا گیا تھا۔ تاہم، اسرائیل کی اٹارنی جنرل گالی بہاراو میارا نے اس درخواست کو مسترد کردیا۔ رپورٹ کے مطابق قانونی حکام کو انتخابات پر غیر ملکی اثراندازی کا کوئی ٹھوس ثبوت نہیں ملا تھا جس کی بنیاد پر انتخابی عمل کی شفافیت پر سوال اٹھایا جاسکتا۔ تحقیقاتی پروگرام میں یہ بھی بتایا گیا کہ انتخابات کے دو روز بعد زینی نے آئزن کوٹ سے ملاقات کی تھی۔ اس موقع پر انہوں نے مبینہ طور پر ایک موٹی فائل پیش کرتے ہوئے دعویٰ کیا تھا کہ ان کے پاس ۲۰۱۸ء سے ایسی اطلاعات موجود ہیں جن سے ظاہر ہوتا ہے کہ اسرائیل میں عرب شہری انتخابات چوری کررہے ہیں۔ ان کا کہنا تھا کہ شن بیت کے سابق سربراہوں نے ان معلومات پر توجہ نہیں دی، لیکن انہوں نے اس معاملے کی تحقیقات شروع کرنے کا فیصلہ کیا ہے۔ رپورٹ کے مطابق ان دعوؤں پر خفیہ ایجنسی اور قانون نافذ کرنے والے اداروں کے بعض عہدیداروں نے تشویش ظاہر کی، کیونکہ انتخابی دھاندلی یا غیر ملکی مداخلت کے الزامات کی تائید میں ٹھوس شواہد سامنے نہیں آئے تھے۔

یہ بھی پڑھئے: اسرائیل: نیتن یاہو نے قیادت کا مطالبہ واپس لیا، حریف کے ساتھ اتحادی حکومت پر زور

قانون نافذ کرنے والے ادارے کے ایک سینئر عہدیدار نے، جس کا نام ظاہر نہیں کیا گیا، چینل ۱۲؍ کو بتایا کہ ان واقعات نے انہیں اس نتیجے پر پہنچایا ہے کہ اسرائیل میں آئندہ انتخابات منصفانہ ہونے کی ضمانت نہیں دی جاسکتی۔ ان کے مطابق اگر پولیس اور شن بیت جان بوجھ کر یا انجانے میں سیاسی مفادات کے لیے استعمال ہونے لگیں تو انتخابی عمل کی غیر جانب داری برقرار رکھنا مشکل ہوجائے گا۔ دوسری جانب نیتن یاہو کے دفتر نے ان الزامات کو مسترد کرتے ہوئے کہا ہے کہ چیف آف اسٹاف عیدو نورڈن کو ایک ممکنہ مجرمانہ سرگرمی سے متعلق اطلاع موصول ہوئی تھی اور انہوں نے ایک قانون پسند شہری کی حیثیت سے اسے پولیس تک پہنچایا۔ دفتر کے بیان میں کہا گیا کہ نورڈن نے اس کے علاوہ پولیس کے انٹیلی جنس عہدیداروں یا تحقیقات سے متعلق دیگر حکام سے کوئی رابطہ نہیں کیا۔ ان کے مزید کسی کردار سے متعلق الزامات کو جھوٹا قرار دیتے ہوئے ہتکِ عزت کے مقدمے کی کارروائی کا عندیہ بھی دیا گیا۔ نیتن یاہو نے آئزن کوٹ کے الزامات کے جواب میں ان پر اشتعال انگیزی کا الزام لگایا۔ وزیر اعظم کے دفتر سے سوشل میڈیا پلیٹ فارم ایکس پر جاری بیان میں کہا گیا کہ ’’جب وزیر اعظم قومی اتحاد کے لیے ہاتھ بڑھا رہے ہیں، اس وقت آئزن کوٹ اور ان کے ساتھی روزانہ زہریلی زبان میں اشتعال انگیز بیانات دے رہے ہیں۔‘‘ یہ تنازع ایسے وقت میں سامنے آیا ہے جب اسرائیل میں نئی حکومت کی تشکیل کے لیے سیاسی جماعتوں کے درمیان مذاکرات جاری ہیں۔ صدر اسحاق ہرزوگ نے ۸؍ نومبر کو آئزن کوٹ کو نئی حکومت بنانے کی ذمہ داری سونپی تھی۔ ۲۷؍ اکتوبر کے انتخابات کے بعد نیتن یاہو کے اتحاد کو ۵۳؍ اور آئزن کوٹ کے اتحاد کو ۴۸؍ نشستیں حاصل ہوئی تھیں، جبکہ عرب قیادت والی جماعتوں نے مجموعی طور پر ریکارڈ ۱۹؍ نشستیں جیتی تھیں۔ اسرائیلی پارلیمان کنیسٹ میں حکومت بنانے کے لیے ۱۲۰؍ میں سے کم از کم ۶۱؍ ارکان کی حمایت ضروری ہے۔ عرب جماعتوں کی حمایت آئزن کوٹ کو مطلوبہ اکثریت فراہم کرسکتی ہے، لیکن ان کی جماعت کے بعض اتحادیوں کو اس طرح کی حکومت پر اعتراض ہے۔ سابق وزیر دفاع اویگدور لائبرمین نے واضح کیا ہے کہ وہ عرب جماعتوں پر انحصار کرنے والی حکومت کی حمایت نہیں کریں گے۔ 

یہ بھی پڑھئے: غزہ: حماس کا فوری عالمی کارروائی پر زور، سیلاب سے دو لاکھ سے زائد فلسطینی متاثر

نیتن یاہو کی لیکوڈ جماعت اور آئزن کوٹ کے حامیوں کے درمیان بھی قومی اتحاد کی حکومت کے امکانات پر بات چیت ہوئی ہے۔ نیتن یاہو نے ہفتے کے روز اپوزیشن لیڈر سے اپیل کی تھی کہ وہ بغیر کسی پیشگی شرط کے مذاکرات کی میز پر آئیں اور ملک کی سلامتی اور مستقبل کے لیے اختلافات کو ایک طرف رکھیں۔ ان کا کہنا ہے کہ ایران کے ساتھ غیر حل شدہ تنازع سمیت اسرائیل کو بڑے سلامتی چیلنجز کا سامنا ہے۔ تاہم، آئزن کوٹ کا موقف ہے کہ نیتن یاہو کو اقتدار سے الگ ہونا چاہیے اور وہ ان کی قیادت میں قومی اتحاد کی حکومت قبول نہیں کریں گے۔ انہوں نے ایران کے خلاف فوجی کارروائی سے بھی خبردار کیا ہے اور کہا ہے کہ ایسا قدم صرف اسی صورت میں اٹھایا جانا چاہیے جب اسرائیل کو فوری خطرہ لاحق ہو۔ اب انتخابی گرفتاریوں سے متعلق الزامات نے حکومت سازی کے مذاکرات کو مزید پیچیدہ کردیا ہے۔ آئزن کوٹ نے واضح کیا ہے کہ وزیر اعظم کے دفتر اور سلامتی کے اداروں کے کردار کی جانچ ان کی سیاسی حکمت عملی کا اہم حصہ ہوگی۔ دوسری طرف نیتن یاہو کا دفتر الزامات کی تردید کررہا ہے۔ اس لیے اصل سوال یہ ہے کہ آیا انتخابی دن کی گرفتاریوں اور عرب ارکان پارلیمان کی نگرانی کی مبینہ کوشش کے پیچھے واقعی سیاسی مداخلت تھی یا یہ قانونی اداروں تک پہنچائی گئی اطلاعات پر کی جانے والی کارروائی تھی۔ اس کا فیصلہ متعلقہ تحقیقات اور سامنے آنے والے شواہد ہی کرسکیں گے۔

متعلقہ خبریں

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK