غزہ جنگ پر مبنی دستاویزی فلم ’نازا‘ کو وینس فلم فیسٹیول میں اعزاز ملنے کے بعد اسرائیل میں اس کے فلم سازوں کے خلاف کارروائی کی دھمکیاں سامنے آئی ہیں۔ اسرائیلی وزیر ثقافت میکی زوہار نے فلم سازوں یووال ابراہم اور ریچل سور پر ریاست سے غداری کا الزام عائد کرتے ہوئے ان کی شہریت منسوخ کرنے کی کارروائی کا اعلان کیا ہے۔

اسرائیل کے وزیر ثقافت میکی زوہار نے اتوار کو دھمکی دی کہ وہ فلم سازوں یووال ابراہم اور ریچل سور کی اسرائیلی شہریت منسوخ کرنے کی کارروائی کریں گے۔ دونوں فلم سازوں کی غزہ جنگ پر بنائی گئی دستاویزی فلم ’نازا‘ (NAZA) نے وینس فلم فیسٹیول میں اسپیشل جیوری پرائز جیتا ہے۔ امریکی سوشل میڈیا کمپنی ایکس پر ایک پوسٹ میں زوہار نے فلم کی کامیابی کو ’’حیران کن‘‘ قرار دیتے ہوئے دستاویزی فلم کو ’’قابلِ نفرت‘‘ قرار دیا۔ انہوں نے فلم سازوں پر الزام عائد کیا کہ وہ بیرونِ ملک داد حاصل کرنے کے لیے اپنے ملک کو نقصان پہنچا رہے ہیں اور ان کے اقدامات ’’ریاست سے غداری‘‘ کے زمرے میں آتے ہیں۔

یہ بھی پڑھئے: غزہ پر اداکارہ کے بیان کے بعد فرانس۵؍ کا پروگرام ری پلے سے ہٹا دیا گیا

انہوں نے کہا، ’’یہی وہ وجہ ہے جس کے پیشِ نظر میں نے سنیما کے شعبے میں اہم اصلاحات کی قیادت کی، تاکہ اسرائیلی شہریوں کو اپنی جیب سے اسرائیلی فوج (آئی ڈی ایف) کے فوجیوں اور ریاست اسرائیل کو نقصان پہنچانے کے لیے ادائیگی نہ کرنا پڑے۔ ‘‘زوہار نے مزید کہا، ’’وزیر ثقافت کی حیثیت سے میں ان قابلِ مذمت فلم سازوں کی جانب سے ریاست سے غداری کے الزام میں اسرائیلی شہریت فوری طور پر منسوخ کرنے کے لیے کارروائی کروں گا۔ ‘‘وینس فلم فیسٹیول کے سرکاری تعارف کے مطابق، ’نازا‘ میں ان نظاموں کا جائزہ لیا گیا ہے جنہیں فلم میں غزہ میں فلسطینی شہریوں کے ’’منصوبہ بند اجتماعی قتل‘‘ کے پیچھے کارفرما قرار دیا گیا ہے۔ فلم میں اسرائیلی فوج کے انٹیلی جنس افسران اور فوجیوں کی گواہیاں بھی شامل ہیں۔ یاد رہے کہ یہ دستاویزی فلم جمعرات کو وینس فلم فیسٹیول میں پیش کی گئی اور سنیچرکو اسے اسپیشل جیوری پرائز سے نوازا گیا۔ فلم کی وینس میں پہلی نمائش کے موقع پر تقریباً ۲۵؍ منٹ تک حاضرین نے کھڑے ہو کر تالیاں بجائیں۔