اداکارہ ادا شرما اپنی فلموں کے ساتھ ساتھ اپنے منفرد اندازِ زندگی اور بے باک خیالات کے لیے بھی جانی جاتی ہیں۔ عام طور پر فلمی ستاروں کی زندگی کو مہنگے گھروں، قیمتی فرنیچر اور پُرتعیش طرزِ رہائش سے جوڑ کر دیکھا جاتا ہے، لیکن ادا شرما کا رہن سہن اس تصور سے کافی مختلف ہے۔

اداکارہ ادا شرما اپنی فلموں کے ساتھ ساتھ اپنے منفرد اندازِ زندگی اور بے باک خیالات کے لیے بھی جانی جاتی ہیں۔ عام طور پر فلمی ستاروں کی زندگی کو مہنگے گھروں، قیمتی فرنیچر اور پُرتعیش طرزِ رہائش سے جوڑ کر دیکھا جاتا ہے، لیکن ادا شرما کا رہن سہن اس تصور سے کافی مختلف ہے۔ وہ ممبئی کے اس اپارٹمنٹ میں رہتی ہیں جہاں کبھی آنجہانی اداکار سشانت سنگھ راجپوت رہا کرتے تھے۔ ادا شرما کے گھر کی خاص بات یہ ہے کہ وہاں بستر، صوفہ اور کھانے کی میز جیسا بنیادی فرنیچر بھی موجود نہیں ہے۔

یہ بھی پڑھئے:ناروے کے گلوکار ولیم گیمبورگ لاہور میں پاکستانی گانے گا کر سوشل میڈیا پر وائرل

حال ہی میں  ایک انٹرویو میں ادا شرما نے اپنے منفرد طرزِ زندگی کے بارے میں بات کرتے ہوئے کہا کہ سشانت سنگھ راجپوت کے سابقہ گھر میں رہنے کے لیے کسی خاص ہمت کی ضرورت نہیں ہے۔ ان کے مطابق یہ فیصلہ کسی خوف یا غیر معمولی بہادری کا معاملہ نہیں، بلکہ ان کی ذاتی پسند اور ذہنی سکون سے جڑا ہوا ہے۔ اداکارہ سے جب پوچھا گیا کہ سشانت سنگھ راجپوت کے گھر میں رہنے کے لیے ہمت درکار ہوتی ہے تو انہوں نے جواب دیا کہ اس میں ہمت جیسی کوئی بات نہیں ہے۔ ادا شرما نے کہا، ’’میں اس گھر میں کرائے پر رہتی ہوں اور میری معلومات کے مطابق سشانت سنگھ راجپوت بھی وہاں کرائے پر ہی رہتے تھے۔ میں خود کو ایک اچھا انسان سمجھتی ہوں اور سشانت بھی بہت اچھے انسان تھے۔ ایسے میں ایک اچھے گھر میں رہنے کے لیے ہمت کی ضرورت ہونے کا سوال ہی پیدا نہیں ہوتا۔‘‘اداکارہ نے اپنے رہن سہن کی وضاحت کرتے ہوئے کہا کہ ہر انسان کی پسند اور آرام کا طریقہ الگ ہوتا ہے۔ کچھ لوگوں کو سونے کے لیے نرم گدا پسند ہوتا ہے، جب کہ بعض افراد سخت گدے پر سونا زیادہ بہتر سمجھتے ہیں، تاکہ صبح اٹھنے پر انہیں تازگی محسوس ہو۔ ان کے مطابق بہت سے لوگوں نے زمین پر سونے کا تجربہ بھی نہیں کیا ہوتا، لیکن انہیں زمین پر سونے سے ہی سکون ملتا ہے۔ ادا شرما نے بتایا کہ ان کی والدہ کو بھی اسی طرح رہنا پسند ہے۔
 اداکارہ پہلے بھی اپنے گھر کے منفرد انتظام کے بارے میں بتا چکی ہیں۔ ان کے گھر میں بستر، صوفہ اور کھانے کی میز جیسے عام فرنیچر موجود نہیں ہیں۔ ادا شرما نے اپنے اس فیصلے کو مزاحیہ انداز میں بیان کرتے ہوئے کہا تھا کہ جب زمین پر سو کر بھی اچھی نیند لی جاسکتی ہے تو پھر بستر کی ضرورت کیوں ہے؟ ان کا ماننا ہے کہ زمین پر سونے سے گھر کے فرش کی پوری جگہ استعمال کی جاسکتی ہے، جو ایک بڑے بستر کے مقابلے میں بھی زیادہ کشادگی فراہم کرتی ہے۔

یہ بھی پڑھئے:اولمپک تمغہ فاتح نیل کانت شرما بین الاقوامی ہاکی سے ریٹائرڈ ہوں گے

 اداکارہ نے اپنے گھر سے جڑی ایک اور دلچسپ بات بتائی۔ ان کے مطابق وہ اور ان کی والدہ گھر کے باغیچے میں سبزیاں اگاتی ہیں اور پھر انہی سبزیوں کو اپنی خوراک میں شامل کرتی ہیں۔ ادا شرما کے لیے گھر محض رہنے کی جگہ نہیں، بلکہ ایک ایسی جگہ ہے جہاں وہ اپنی پسند کے مطابق زندگی گزار سکتی ہیں اور ذہنی سکون حاصل کرتی ہیں۔ انہوں نے بتایا کہ شوٹنگ کے سلسلے میں تقریباً دو ماہ تک گھر سے دور رہنے کے بعد وہ واپس لوٹی ہیں۔ اس دوران انہیں اپنے گھر کی بہت یاد آئی۔ ادا شرما نے کہا کہ گھر واپس آنے کے بعد انہوں نے سکون کی نیند لی اور یہ تجربہ ان کے لیے جادوئی احساس جیسا تھا۔
اداکارہ کے مطابق گھر ایسا ہونا چاہیے جسے انسان دور رہنے کے دوران یاد کرے اور جہاں واپس آکر اسے سکون محسوس ہو۔ ادا شرما کی یہ بات ان کے سادہ طرزِ زندگی اور گھر سے جذباتی وابستگی کو ظاہر کرتی ہے۔ ان کے نزدیک حقیقی آسائش مہنگے فرنیچر یا پُرتعیش سجاوٹ میں نہیں، بلکہ اپنی پسند کے مطابق زندگی گزارنے، فطرت سے جڑے رہنے اور گھر میں ذہنی سکون حاصل کرنے میں ہے۔