یہود دشمنی کے خلاف مہم چلانے پرکارروائی ، اس بورڈمیں ان کی تقرری سابق صدرجوبائیڈن نے کی تھی۔

امریکی صدر ڈونالڈ ٹرمپ نے اپنی سابق سیاسی حریف کملا ہیرس کے شوہر ڈگ ایمہوف کو ہولوکاسٹ میموریل کونسل کے بورڈ سے نکال دیا ہے۔ گزشتہ سال ڈیموکریٹک صدارتی امیدوار اور سابق نائب صدر کملا ہیرس کے شوہر ایمہوف کی مذکور بورڈ میں تقرری جو بائیڈن انتظامیہ نے کی تھی، ان پر الزام ہے کہ انہوں نے ’یہود دشمنی‘ کے خلاف مہم چلائی۔ ایمہوف نے جو یہودی ہیں، منگل کو اپنی برطرفی کی تصدیق کرتے ہوئے پوسٹ کیا ’’میں واضح کر دوں کہ ہولوکاسٹ کی یاد اور تعلیم پر کبھی بھی سیاست نہیں ہونی چاہئے۔ ‘‘
 انہوں نے مزید کہا ’’بدترین مظالم کی ایک تاریخ کوتقسیم پیدا کرنے والے مسئلے میں تبدیل کرنا خطرناک ہے اور اس سے نازیوں کے ہاتھوں قتل ہونے والے ۶۰؍ لاکھ یہودیوں کی توہین ہوتی ہے جن کی یاد محفوظ رکھنے کیلئے یہ میوزیم بنایا گیا تھا۔ ‘‘واضح رہےکہ اقتدار سنبھالنے کے بعد سے ٹرمپ اپنے اقدامات، فیصلوں اور پالیسیوںسے تعلیمی اور ثقافتی اداروںپر دائیں بازو کے نظریات مسلط کرتے ہوئے نظر آرہے ہیںجس پران کے خلاف احتجاج بھی کیا جارہا ہے۔ 
 نیویارک ٹائمز کی اطلاع کے مطابق ہولوکاسٹ بورڈ سے برطرف کردہ کئی دیگر سابق عہدیداروں میں بائیڈن کے وہائٹ ہاؤس کے چیف آف اسٹاف رون کلین، داخلی پالیسی کی مشیر سوزن رائس اور سابق خاتونِ اول جل بائیڈن کے ایک معاون شامل ہیں۔ 
 نیویارک ٹائمز کے مطابق وہائٹ ہاؤس کے صدارتی عملے کے دفتر نے منگل کے اوائل میں کونسل کے اراکین کو ایک ای میل بھیجا جس میں لکھا تھا ’’(صدر ڈونالڈ ٹرمپ کی جانب سے) آپ کو یہ اطلاع دی جاتی ہے کہ امریکہ کی ہولوکاسٹ میموریل کونسل کے رکن کی حیثیت سے آپ کا عہدہ فوری طور پر ختم کر دیا گیا ہے۔ ‘‘
 یہ کونسل ۱۹۸۰ء میں کانگریس نے ہولوکاسٹ کی یاد میں ملک کی قیادت کیلئے قائم کی تھی اور۱۹۹۳ء میں ہولوکاسٹ میموریل میوزیم کا آغاز کیا تھا۔ ایمہوف نے کہا کہ برطرفی سے ہولوکاسٹ کی یاد، تعلیم اور اس کے ساتھ ساتھ نفرت اور یہود دشمنی کا مقابلہ کرنے کیلئے ان کا عزم کم نہیں ہوا۔ ایمہوف کا موقف ہےکہ ہولوکاسٹ کے نام پر سیاست نہیںکی جانی چاہئے۔