اقوامِ متحدہ میں سعودی عرب کے مستقل نمائندے ڈاکٹر عبدالعزیز الواصل نے فلسطینی عوام کے لئے اپنے ملک کے مضبوط اور غیر متزلزل مؤقف کا اعادہ کرتے ہوئے کہا کہ سعودی عرب دو ریاستی حل پر قائم ہے۔

اقوام متحدہ میں سعودی عرب کے مستقل نمائندےنےکہا کہ سعودی عرب نے فرانس کے ساتھ مل کر دو ریاستی حل کانفرنس کی قیادت کی۔ اسی تناظر میں انہوں نے ایک بار پھر اسرائیلی پارلیمنٹ( کنیسٹ) کی طرف سے مقبوضہ مغربی کنارے کو الحاق کرنے اور غیر قانونی آباد کاری پر اسرائیلی خودمختاری کو قانونی حیثیت دینے کے لئے دو مسودہ قوانین کی منظوری کی مذمت کی۔ انہوں نے کہا کہ مملکت سعودی عرب اسرائیلی قابض حکام کی طرف سے اختیار کی گئی تمام آباد کاری اور توسیع پسندانہ خلاف ورزیوں کو مکمل طور پر مسترد کرنے پر زور دیتی ہے اور متعلقہ بین الاقوامی قراردادوں کے مطابق مشرقی القدس کے ساتھ۱۹۶۷ء کی سرحدوں پر اپنی آزاد ریاست کے قیام کے فلسطینی عوام کے موروثی اور تاریخی حق کی حمایت کا اعادہ کرتی ہے۔ 

سعودی عرب عالمی برادری سے زور دیتا رہا ہے کہ وہ بین الاقوامی قانونی قرار دادوں پر عمل درآمد کے لئے اپنی پوری ذمہ داری قبول کرے۔ فلسطینی علاقوں اور فلسطینی عوام پر تمام اسرائیلی حملوں کو روکے اور دو ریاستی حل کے نفاذ کی بنیاد پرقیام امن کے عمل کو آگے بڑھائے۔