امریکی کانگریس کے رکن کیتھ سیلف نے واضح کیا کہ پاکستان اور ہندوستان کے درمیان جنگ کا سوچ بھی نہیں سکتے، دونوں پڑوسی ایٹمی طاقتیں ہیں۔

 امریکی کانگریس کے رکن کیتھ سیلف نے واضح کیا ہے کہ پاکستان اور ہندوستان کے درمیان جنگ کا سوچ بھی نہیں سکتے، دونوں پڑوسی ملک ایٹمی قوت ہیں، جنگ شروع ہوگئی تو وہ کسی کے قابو میں نہیں رہے گی۔ عالمی ذرائع کے مطابق امریکی کانگریس مین کیتھ سیلف نے یہاں مقامی کلب میں ایشیائی ممالک کےلیڈروں سے ملاقات کی۔ انہوں نے اپنی گفتگو میں امید ظاہر کی کہ پاکستان اور ہندوستان کشیدگی کو کم کریں گے۔ 
 کیتھ سیلف نے کہا کہ دونوں ملکوں کے درمیان مسائل کئی دہائیوں سے موجود ہیں لیکن جنگ شروع ہوگئی تو وہ کسی کے قابو میں نہیں رہے گی۔ اس ملاقات میں حال ہی میں پاکستان کا دورہ کرنے والے کانگریس مین جیک برگمین بھی موجود تھے، انہوں نے ہم خیال آزاد ممالک کے ساتھ مل کر ہند-پاک کشیدگی میں کمی کیلئے کردار ادا کرنے کی ضرروت پر زور دیا۔ 
 یاد رہے کہ پہلگام دہشت گردانہ حملےکے بعد سے ہندوستان کی الزام تراشی نے خطے کے امن کو خطرات سے دو چار کر دیا ہے، اقوام متحدہ کے سیکریٹری جنرل انتونیو غطریس، یورپی یونین کی خارجہ امور کی سربراہ کاجا کلاس سمیت کئی اہم ممالک کے وزرائے خارجہ نے ہند پاک کشیدگی میں کمی لانے پر زور دیا ہے، تاہم ہندوستان کی ہٹ دھرمی برقرار ہے۔ 
 اس سے قبل اقوام متحدہ کی سلامتی کونسل کی صدارت سنبھالنے والے یونان نے کہا تھا کہ ہندوستان اور پاکستان کے درمیان بڑھتی ہوئی کشیدگی پر اقوام متحدہ کی سلامتی کونسل کا اجلاس بلایا جاسکتا ہے۔ ایک رپورٹ میں بتایا گیا تھا کہ یونان کے سفیر انجیلوس سیکیریس نے جمعرات کو نیویارک میں اقوام متحدہ کے صحافیوں کو یونان کی ایک ماہ طویل صدارت کے دوران سلامتی کونسل کے کام کاج اور پروگراموں کے بارے میں تفصیلات دی تھیں۔ 
 انجیلوس سیکیریس نے کہا تھا’’ہم قریبی رابطے میں ہیں لیکن ہند پاک کشیدگی پر سلامتی کونسل کا اجلاس جلد یا کچھ وقت بعد ہو سکتا ہے، ہم دیکھیں گے، ہم تیاری کر رہے ہیں، یہ ہماری (یو این ایس سی) صدارت کا پہلا دن ہے۔ ‘‘انہوں نے کہا تھاکہ اب تک کسی فریق کی جانب سے اجلاس بلانے کی باضابطہ درخواست پیش نہیں کی گئی، لیکن اس طرح کی بحث کی اہمیت پر زور دیا گیا ہے۔ واضح رہےکہ گزشتہ دنوں امریکی وزیر خارجہ مارکو روبیو نے بھی دونوں ممالک سےبات کرکے کشیدگی کم کرنے کی اپیل کی تھی۔