کانگریس کے رکن پارلیمنٹ ششی تھرور ہفتے کے روز کیرالا کے ایک ہوٹل میں لفٹ خراب ہونے کے باعث تقریباً آدھے گھنٹے تک اندر پھنسے رہے، تاہم کیرالا فائر اینڈ ریسکیو سروس نے بروقت کارروائی کرتے ہوئے انہیں بحفاظت باہر نکال لیا۔ واقعے کے بعد تھرور نے سوشل میڈیا پر ریسکیو اہلکاروں کی پیشہ ورانہ مہارت اور فوری ردعمل کو سراہتے ہوئے ان کا شکریہ ادا کیا۔ اس واقعے میں کوئی جانی نقصان نہیں ہوا۔

کانگریس کے سینئر لیڈر اور تروننت پورم سے رکن پارلیمنٹ ششی تھرور سنیچر کو کیرالا کے ایک ہوٹل میں لفٹ خراب ہونے کے باعث کچھ دیر کے لیے پھنس گئے، تاہم کیرالا فائر اینڈ ریسکیو سروس نے فوری کارروائی کرتے ہوئے انہیں بحفاظت باہر نکال لیا۔ اطلاعات کے مطابق ششی تھرور روٹری کلب آف تریویندرم ایسٹ کے ایک پروگرام میں شرکت کے لیے جا رہے تھے کہ اسی دوران ہوٹل کی لفٹ اچانک خراب ہو گئی اور وہ اس کے اندر محصور ہو گئے۔ خبر رساں ادارے اے این آئی (ANI) کے مطابق ہوٹل کے عملے نے ابتدائی طور پر لفٹ کھولنے کی کوشش کی، لیکن کامیاب نہ ہونے پر کیرالا فائر اینڈ ریسکیو سروس کو طلب کیا گیا۔ ریسکیو ٹیم موقع پر پہنچنے کے بعد ہائیڈرولک اسپریڈر کی مدد سے لفٹ کے دروازے کھولنے میں کامیاب ہوئی اور ششی تھرور کو بحفاظت باہر نکال لیا۔

#WATCH | Thiruvananthapuram, Keralam: Congress MP Shashi Tharoor got briefly stuck in the lift of a private hotel while arriving to attend the installation ceremony of the Rotary Club of Trivandrum East. Fire and Rescue Services personnel reached the spot and used a hydraulic… pic.twitter.com/EA0FtTHTqZ

— ANI (@ANI) July 17, 2026

واقعے کے بعد ششی تھرور نے سوشل میڈیا پلیٹ فارم ایکس پر اے این آئی کی ایک پوسٹ کا جواب دیتے ہوئے لکھا کہ لفٹ میں تقریباً آدھا گھنٹہ گزارنا کوئی بڑا مسئلہ نہیں تھا، تاہم اس کے باعث وہ اپنی اگلی دو ملاقاتوں میں غیر ارادی طور پر تاخیر کا شکار ہوئے، جن میں ایک ملاقات ایک وزیر کے ساتھ بھی طے تھی۔ انہوں نے اپنے پیغام میں کہا کہ ’’لفٹ میں آدھا گھنٹہ گزارنا کوئی بڑا مسئلہ نہیں تھا، اگرچہ اس کی وجہ سے میں اپنی اگلی دو ملاقاتوں میں غیر ارادی طور پر تاخیر سے پہنچا۔‘‘ ششی تھرور نے کیرالا فائر اینڈ ریسکیو سروس کی تعریف کرتے ہوئے مزید کہا کہ ’’میں کیرالا فائر اینڈ ریسکیو سروس کی رفتار، کارکردگی اور پیشہ ورانہ مہارت پر ان کا تہہ دل سے شکریہ ادا کرتا ہوں، جنہوں نے ہماری کال موصول ہونے کے چند ہی منٹ بعد انتہائی قابلِ تعریف انداز میں امدادی کارروائی انجام دی۔‘‘

یہ بھی پڑھئے: سونم وانگچک کو اسپتال منتقل کیا گیا، ابھیجیت دپکے بھوک ہڑتال پر بیٹھ گئے

بعد ازاں صحافیوں سے گفتگو کرتے ہوئے کانگریس لیڈر نے بتایا کہ اس واقعے میں تمام افراد محفوظ رہے اور کسی کو کوئی نقصان نہیں پہنچا۔ انہوں نے کہا کہ ’’سب خیریت سے ہیں۔ پہلے ہوٹل کا عملہ آیا، لیکن وہ لفٹ نہیں کھول سکا۔ اس کے بعد فائر فورس کو بلایا گیا، جو تقریباً پانچ منٹ کے اندر موقع پر پہنچ گئی، اور میں ان کا تہہ دل سے شکر گزار ہوں۔‘‘ واقعے کی خبر سامنے آنے کے بعد یہ سوشل میڈیا پر بھی تیزی سے وائرل ہو گئی، جہاں صارفین نے ششی تھرور کی خیریت پر اطمینان کا اظہار کیا اور امدادی ٹیم کی بروقت کارروائی کو سراہا۔ ایک صارف نے لکھا، ’’ریسکیو اہلکاروں کی خدمات کا اعتراف کرنے پر آپ کا شکریہ۔‘‘ ایک اور صارف نے تبصرہ کیا، ’’خدا کا شکر ہے کہ آپ محفوظ ہیں۔ مجھے لفٹ سے خوف محسوس ہوتا ہے، اس واقعے نے میری تشویش مزید بڑھا دی۔‘‘ ایک تیسرے صارف نے مزاحیہ انداز میں لکھا، ’’لگتا ہے آج لغت نے ’’نہ رکنے‘‘کی تعریف کرنا بھول گئی تھی۔‘‘