اسپرے پینٹ کے ذریعے ’دہلی بنےگا خالصتان ‘ اورخالصتان ریفرینڈم زندہ باد‘ جیسے نعرےلکھے گئے

 ملک کی راجدھانی دہلی میں اگلے مہینے جی۲۰؍ چوٹی کانفرنس ہونے والی ہے جس کی تیاریاں زور و شور سے چل رہی ہیں ۔ اس درمیان خالصتان حامیوں کے ذریعے قومی راجدھانی میں ماحول خراب کرنے کی کوشش کی اطلاعات ہیں ۔ اتوار کو دہلی میٹرو کے شیواجی پار، مادی پور، پچھشم ویہار، ادھیوگ نگر، مہاراجہ سورج مل اسٹیڈیم، پنجابی باغ اور ناگلوئی اسٹیشنوں کی دیواروں پر اوراطراف کے علاقوں میں متنازع خالصتان حامی نعرے لکھے نظر آئے ۔
 موصولہ معلومات کے مطابق’ دہلی بنے گا خالصتان‘ اور’ خالصتان ریفرینڈم زندہ آباد‘ جیسے نعرے دہلی میٹرو اسٹیشن کی دیواروں پر اسپرے پینٹ کے ذریعے لکھے گئے تھے۔اس واقعہ کے بعد دہلی پولیس کے اسپیشل سیل سمیت مقامی اضلاع کی ٹیمیں الرٹ موڈ میں آگئی ہیں ۔ دہلی پولیس نے کہا کہ معاملہ کی جانچ چل رہی ہے اور اس حرکت کے پیچھے شامل عناصر کے خلاف قانونی کارروائی کی جارہی ہے۔
 دہلی پولیس کے ذرائع نے بتایا کہ جی ۲۰؍چوٹی کانفرنس سے پہلے سکھ فار جسٹس ( ایس جے ایف) نے دہلی میٹرو اسٹیشنوں کے فوٹیج جاری کئے ہیں ۔ ان میں خالصتان حامی نعرے لکھے ہوئے ہیں ۔ دہلی کے کئی میٹرو اسٹیشنوں پر شیواجی پارک سے لے کر پنجابی باغ تک ایس جے ایف کارکنان کو خالصتان حامی نعروں کے ساتھ دکھایا گیا ہے ۔
 ذرائع نے بتایا کہ دہلی پولیس ذمہ دار افراد کا پتہ لگانے کیلئے ان میٹرو اسٹیشنوں کے سی سی ٹی وی فوٹیج کا جائزہ لے رہی ہے، جہاں نعرے لکھے گئے تھے ۔ اس سلسلہ میں مدد کیلئے سی آئی ایس ایف افسران سے بھی رابطہ کیا گیا ہے ۔ دیواروں پر نعرے لکھے ہونے کی خبر ملتے ہی جائے واقعہ پر پہنچی دہلی پولیس نے دیواروں کو صاف کرا دیا ہے۔اس معاملے میں دہلی میٹروریل کارپوریشن کے ایک سینئر افسر کا کہنا ہےکہ ’’یہ لاء اینڈ آرڈرکا مسئلہ ہے،اس میں دہلی پولیس کے ساتھ تعاون کررہے ہیں ۔ واضح رہےکہ ایس جے ایف کے چیف گرپتونت سنگھ نے ایک ویڈیو پیغام میں کہا ہےکہ ۱۰؍ ستمبر کو کینیڈا کے سرے میں خالصتان کے تعلق سے ریفرینڈم کیاجائے گا۔