سنجے لیلا بھنسالی کی فلم ’’لو اینڈ وار‘‘ کی اگست میں ریلیز کی تصدیق ہو گئی ہے۔ فلم کی شوٹنگ میں تاخیر اور تخلیقی اختلافات کی افواہوں کو مسترد کر دیا گیا ہے جبکہ واضح کیا گیا ہے کہ موجودہ وقفہ پہلے سے طے شدہ تھا۔ عالیہ بھٹ، رنبیر کپور اور وکی کوشل اس بڑے پروجیکٹ کیلئے مکمل طور پر پُرعزم ہیں۔

ہدایتکار سنجے لیلا بھنسالی کی آنے والی فلم ’’لو اینڈ وار‘‘ کے حوالے سے کئی ہفتوں سے جاری قیاس آرائیوں کے بعد اب اس بات کی تصدیق ہو گئی ہے کہ عالیہ بھٹ، رنبیر کپور اور وکی کوشل کی اداکاری سے سجی یہ فلم اگست میں سنیما گھروں کی زینت بنے گی۔ حال ہی میں گردش کرنے والی افواہوں میں دعویٰ کیا جا رہا تھا کہ فلم کے سیٹ پر تاخیر، تخلیقی اختلافات اور سنجے لیلا بھنسالی اور رنبیر کپور کے درمیان کشیدگی کے باعث پروڈکشن متاثر ہو رہا ہے۔ سوشل میڈیا پر یہ تاثر بھی دیا گیا کہ شوٹنگ کا شیڈول غیر معمولی حد تک بڑھا دیا گیا ہے۔ تاہم، تازہ رپورٹس نے ان تمام دعوؤں کو بے بنیاد قرار دیتے ہوئے واضح کیا ہے کہ کسی قسم کا تعطل یا تنازع سامنے نہیں آیا۔

یہ بھی پڑھئے: ’’دھرندھر ۲‘‘ کا خوف: اکشے کمار اورپریہ درشن کی ’’بھوت بنگلہ‘‘ کی ریلیز مؤخر

مڈڈے کی رپورٹ کے مطابق، فلم کی شوٹنگ اس وقت پہلے سے طے شدہ سال کے اختتامی وقفے (اینڈ آف دی ایئر بریک) کی وجہ سے عارضی طور پر رکی ہوئی ہے۔ رپورٹ میں ذرائع کے حوالے سے بتایا گیا ہے کہ یہ وقفہ کئی ماہ پہلے سے پلان کیا گیا تھا اور اسے غلط طور پر تاخیر سے جوڑا جا رہا ہے۔ ذرائع کے مطابق، بھنسالی کے پروجیکٹس بڑے پیمانے پر ہوتے ہیں اور ان میں اس نوعیت کے وقفے معمول کا حصہ ہوتے ہیں۔ اطلاعات کے مطابق، آئندہ شیڈول کے دوران پیچ ورک، ویژول ایفیکٹس، منتخب مناظر اور میوزیکل حصوں پر کام کیا جائے گا۔ توقع ہے کہ شوٹنگ جنوری کے وسط میں دوبارہ شروع ہو گی اور مارچ تک جاری رہے گی، جبکہ پوسٹ پروڈکشن کا کام متوازی طور پر چلتا رہے گا۔ ذرائع کا کہنا ہے کہ ’’کسی قسم کا تعطل نہیں ہے۔ شوٹس طویل اور محنت طلب ہوتے ہیں۔ رنبیر، عالیہ اور وکی تینوں اس پروجیکٹ کیلئے مکمل طور پر پُرعزم ہیں۔‘‘ رپورٹس کے مطابق، اداکاروں کو توسیعی شیڈول پر کوئی اعتراض نہیں کیونکہ وہ سنجے لیلا بھنسالی کی فلم سازی کے سخت اور تفصیلی عمل سے بخوبی واقف ہیں۔

یہ بھی پڑھئے: انیس بزمی کی نئی فلم میں اکشے کمار اور ودیا بالن، شوٹنگ ۱۵؍ جنوری سے

فلم ’’لو اینڈ وار‘‘ کے بارے میں
’’لو اینڈ وار‘‘ مبینہ طور پر ایک تثلیثی محبت پر مبنی کہانی ہے۔ یہ فلم سنجے لیلا بھنسالی کے ساتھ وکی کوشل کا پہلا تعاون ہے، جبکہ رنبیر کپور کیلئے یہ ’’سانوریا‘‘ کے بعد بھنسالی کے ساتھ دوسری فلم ہے۔ اسی طرح، یہ فلم عالیہ بھٹ اور رنبیر کپور کو ایک بار پھر اسکرین پر اکٹھا کر رہی ہے، جو اس سے قبل حقیقی زندگی کے جوڑے کے طور پر ’’برہماستر‘‘ میں نظر آ چکے ہیں۔ یہ فلم ابتدائی طور پر کرسمس ۲۰۲۵ء میں ریلیز ہونے والی تھی، بعد ازاں اسے مارچ ۲۰۲۶ء تک موخر کیا گیا اور اب اسے اگست میں ریلیز کرنے کا حتمی فیصلہ کیا گیا ہے۔

یہ بھی پڑھئے: جاوید اختر نے ٹوپی پہنے اپنے اے آئی ویڈیو کی مذمت کی، کارروائی کی وارننگ

کاسٹ کے آئندہ پروجیکٹس
عالیہ بھٹ جلد ہی یش راج فلمز کے اسپائی یونیورس پروجیکٹ ’’الفا‘‘ میں نظر آئیں گی۔
رنبیر کپور کے پاس ’’اینیمل پارک‘‘ اور ’’رامائن‘‘ جیسے بڑے پروجیکٹس موجود ہیں۔
وہیں وکی کوشل اس وقت ’’مہااوتار‘‘ اور راجکمار ہیرانی کی آنے والی فلم کی تیاری میں مصروف ہیں۔