مئی میں پی ایم آئی۶ء۵۷؍ پر پہنچا۔ یہ فروری کے بعد کی کم ترین سطح ہے۔اس شعبے میں ترقی کی رفتار اب بھی برقرار ہے۔

 مئی ۲۰۲۵ء میں ہندوستان کا مینوفیکچرنگ سیکٹر قدرے سست پڑا ہے۔ ایچ ایس بی سی  انڈیا مینوفیکچرنگ پرچیزنگ منیجرس  انڈیکس (پی ایم آئی) اپریل کے ۲ء۵۸؍  سے گر کر مئی میں۶ء۵۷؍ پر آ گیا۔ یہ فروری کے بعد کی کم ترین سطح ہے۔ تاہم، یہ اب بھی ۵۰ء۰؍ کی غیر جانبدار سطح اور۱ء۵۴؍ کی طویل مدتی اوسط سے کافی اوپر ہے۔ اس سے ظاہر ہوتا ہے کہ اس شعبے میں ترقی کی رفتار اب بھی برقرار ہے۔

مضبوط ملکی اور غیر ملکی مانگ  سہارا  رہی
 مضبوط گھریلو اور عالمی مانگ، کامیاب مارکیٹنگ کی کوششوں اور برآمدی آرڈرس میں تیزی سے اضافے کی وجہ سے مئی میں مینوفیکچرنگ سیکٹر میں توسیع ہوئی۔ کمپنیوں نے ایشیا، یورپ، مغربی ایشیا اور امریکہ جیسی بڑی عالمی منڈیوں سے مضبوط مانگ کی اطلاع دی۔ برآمدی آرڈرس میں ۳؍ برسوں میں تیز ترین اضافہ ریکارڈ کیا گیا تاہم، سروے میں شامل کمپنیوں نے مئی میں مینوفیکچرنگ سیکٹر میں سست روی کی وجہ سخت مسابقت، لاگت میں اضافہ اور ہندوستان اور پاکستان کے درمیان جاری کشیدگی کو قرار دیا۔ ان کا کہنا تھا کہ ان وجوہات سے کاروباری جذبات متاثر ہوئے ہیں۔
روزگار میں ریکارڈ اضافہ
 مئی میں روزگار کے محاذ پر تاریخی اضافہ دیکھا گیا۔ پی ایم آئی سروے کی تاریخ میں یہ اب تک کی تیز ترین بھرتی تھی۔ کمپنیوں نے عارضی عہدوں کے بجائے مستقل عہدوں پر توجہ مرکوز کی۔ اس مسلسل تقرری  سے کمپنیوں کو کام کے بوجھ کو بہتر طریقے سے سنبھالنے میں مدد ملی اور بیک لاگ کے مسئلے کو روکنے میں مدد ملی جو لگاتار ۶؍ ماہ سے  جاری  تھا۔
بڑھتی ہوئی لاگت اور مہنگائی کا دباؤ
 مئی میں لاگت کا دباؤ بڑھ گیا۔ ان پٹ افراط زر کی شرح ۶؍ ماہ کی بلند ترین سطح پر پہنچ گئی۔ اس کی بنیادی وجوہات خام مال جیسے ایلومینیم، سیمنٹ، لوہا، چمڑا، ربڑ اور ریت کے ساتھ ساتھ مال برداری اور مزدوری کے اخراجات میں اضافہ تھا۔ منافع کو برقرار رکھنے کیلئے، کمپنیوں نے مصنوعات کی قیمتوں میں۱۱؍برسوں میں تیز ترین شرحوں میں اضافہ کیا ہے۔ افراط زر کے دباؤ کے باوجود، ہندوستانی صنعتکار پراعتماد ہیں۔ کمپنیوں نے آنے والے سال میں پیداوار بڑھانے کی امید ظاہر کی ہے۔ اس کے پیچھے اشتہارات اور صارفین کی بڑھتی ہوئی پوچھ گچھ کو اہم وجوہات قرار دیا گیا ہے۔
 مینوفیکچرنگ پی ایم آئی کیا ہے؟
 مینوفیکچرنگ پی ایم آئی (پرچیزنگ منیجرس انڈیکس) ایک اہم معاشی اشارہ ہے جو کسی ملک کے مینوفیکچرنگ سیکٹر کی کاروباری سرگرمیوں کا اندازہ لگاتا ہے۔ یہ سروے پرچیزنگ منیجرس سے معلومات لے کر تیار کیا جاتا ہے جو اہم سرگرمیوں جیسے کہ پیداوار، نئے آرڈرس، روزگار، سپلائر کی کارکردگی اور انوینٹری کی نگرانی کرتے ہیں۔