امریکی اداکار مارک رفیلو نے غزہ میں جاری انسانی بحران کو ’’انسان کے پیدا کردہ قحط‘‘ قرار دیتے ہوئے عالمی برادری سے فوری مداخلت کی اپیل کی ہے۔ انہوں نے کہا کہ یہ کوئی قدرتی آفت نہیں بلکہ انسانیت کے خلاف جرم ہے جس پر دنیا کی خاموشی مجرمانہ ہے۔
EPAPER
Updated: August 25, 2025, 9:56 PM IST | Washington
امریکی اداکار مارک رفیلو نے غزہ میں جاری انسانی بحران کو ’’انسان کے پیدا کردہ قحط‘‘ قرار دیتے ہوئے عالمی برادری سے فوری مداخلت کی اپیل کی ہے۔ انہوں نے کہا کہ یہ کوئی قدرتی آفت نہیں بلکہ انسانیت کے خلاف جرم ہے جس پر دنیا کی خاموشی مجرمانہ ہے۔
امریکی اداکار مارک رفیلو نے عالمی لیڈران پر زور دیا ہے کہ وہ غزہ کی پٹی میں مداخلت کریں۔ انہوں نے بگڑتے ہوئے انسانی بحران کو ’’انسانی ہاتھوں سے پیدا کردہ قحط‘‘ اور ’’انسانیت کے خلاف جرم‘‘ قرار دیا۔ اتوار، ۲۴؍ اگست کو انہوں نے انسٹاگرام پر ایک ویڈیو جاری کی جس میں انہوں نے بحران پر بات کرتے ہوئے انٹیگریٹڈ فوڈ سیکیوریٹی فیز کلاسیفکیشن (IPC) کی رپورٹ کا حوالہ دیا۔ یہ بین الاقوامی ادارہ قحط کی صورتحال کا اعلان کرتا ہے اور اس نے تصدیق کی ہے کہ غزہ قحط کے مرحلے میں داخل ہو چکا ہے۔
رفیلو نے اپنے بیان میں کہا:’’یہ کوئی قدرتی آفت نہیں ہے۔ یہ کوئی خشک سالی نہیں ہے۔ یہ ایک انسانوں کے ہاتھوں کیا گیا المیہ ہے، ایک مجرمانہ عمل ہے جس کا مقصد شہری آبادی کو ختم کرنا ہے۔ اور یہ سب اسرائیل اور آئی ڈی ایف کے ہاتھوں ہو رہا ہے۔ ‘‘انہوں نے مزید کہا کہ سرحد کے ایک جانب کھانے کی اشیاء وافر مقدار میں موجود ہیں مگر غزہ کے شہریوں کے پاس کچھ بھی نہیں ہے۔ ‘‘اداکار نے براہِ راست امریکہ، برطانیہ، جرمنی اور یورپی لیڈران سے اپیل کی کہ وہ آگے بڑھیں اور مزید انسانی جانوں کے ضیاع کو روکیں۔ انہوں نے زور دیا کہ ہلاک ہونے والوں میں سے ۸۰؍فیصد سے زائد عام شہری ہیں اور اس صورتحال کو ’’پاگل پن‘‘ اور ’’انتہائی دل توڑنے والا‘‘ قرار دیا۔
ویڈیو کے ساتھ انہوں نے ایک کیپشن بھی پوسٹ کیا جس میں غزہ میں جبری بھوک کو ایک سوچی سمجھی پالیسی قرار دیا گیا، نہ کہ کوئی قدرتی آفت۔ انہوں نے لکھا:’’غزہ میں جو کچھ ہورہا ہے وہ محض ایک سانحہ نہیں بلکہ انسانیت کے خلاف جرم ہے۔ جبری بھوک، انسانوں کے ہاتھوں پیدا کیا گیا قحط بچے اور خاندان تڑپ رہے ہیں جبکہ دنیا خاموش تماشائی بنی ہوئی ہے۔ ‘‘رفیلو نے خبردار کیا کہ عالمی برادری کی بے عملی اس جرم میں شراکت داری کے مترادف ہے۔ انہوں نے مستقل جنگ بندی، شہری زندگی کے تحفظ اور ذمہ داروں کے احتساب کا مطالبہ کیا۔ بتا دیں کہ مارک رفیلو پہلے بھی اسرائیل کی فوجی کارروائیوں کے ناقد رہے ہیں۔ وہ اسرائیل پر پابندیوں کی حمایت کر چکے ہیں اور آرٹسٹس فار سیز فائر نامی مہم کا بھی حصہ ہیں، جو فوری اور مستقل جنگ بندی کا مطالبہ کرتی ہے۔
