میراروڈ کے نیانگر میں شمس مسجد کے پاس پولیس چوکی کے باہر گستاخ رسول نازیہ الٰہی کے خلاف ایف آئی آر درج کرنے کا مطالبہ کرتے ہوئے بڑی تعداد میں مسلمانوں نے دھرنا دیا ۔یہ دھرنا بھیم آرمی کے مہاراشٹر کے نائب صدر آصف منصوری کی قیادت میں دیا گیا۔

 

 

آصف منصوری نے انقلاب کو بتایا کہ وہ گستاخ رسول نازیہ الٰہی کے خلاف میراروڈ میں بھی ایف آئی آر درج کروانے کیلئے کوشاں ہیں۔ گزشتہ کئی روز سے مسلسل پولیس کے رابطے میں ہیں اور انہیں مکتوب کے ذریعے مطالبہ کیا ہے۔ جمعرات کو بھی بعدنماز مغرب نیا نگر پولیس اسٹیشن کے باہر دھرنے پر بیٹھے رہے۔شب ڈیڑھ بجے کے قریب سینئر انسپکٹر کی ایماء پر دھرنا ختم کیا۔

انہوں نے مزید کہا کہ جمعہ کو ہمارے۲؍ ساتھی جن ایک ایڈوکیٹ اور دوسرے آئی ٹی کے ماہر ہیں انہیں پولیس اسٹیشن بلایا گیا ہے تاکہ پولیس کو پوری سچائی بتا سکیں۔ سینئر انسپکٹر نے کہا کہ وہ ویڈیو دیکھنےکے بعد ایف آئی آر درج کرنے پر غور کریں گے ۔